35. Le agradabile riviera

.1 Inde io videva que, in prosequer lor cammino, illes perveniva a un agradabile riviera, le qual le Rege David appellava `le Riviera de Deo' [Sal 65:9], ma Johannes `le Riviera del Aqua del Vita' [Ap 22:12,2; cf. Ezek 47]. Ora lor cammino passava justo per le ripa del riviera. Hic ergo Christiano e su companion camminava con grande delecto; illes bibeva alsi del aqua del Riviera, le qual esseva agradabile e benefic pro lor spiritos fatigate.

.2 In ultra, sur le ripas de iste riviera, sur ambe lateres, il habeva verde arbores que portava omne sorta de fructos; e le folios de iste arbores esseva mesmo medicinal. Illes se delectava in mangiar le fructos de iste arbores, e illes mesmo mangiava lor folios a prevenir le indigestion e le altere maladias que occurre a illes qui, in viagiar, se caleface le sanguine.

.3 Sur ambe lateres del riviera il habeva alsi un prato, curiosemente imbellite per lilios, e illo esseva verde durante tote le anno. Super iste prato illes jaceva e dormiva, proque hic illes poteva esser in tote securitate [Ps 23; Is 25:8]. Quando illes se eveliava, illes colligeva de novo le fructos del arbores, e illes bibeva de novo del aqua del riviera, e pois illes de novo jaceva pro dormir. Assi illes faceva durante plure dies e noctes.

.4 Alora illes assi cantava: "Reguarda como iste riviera de crystallo glissa a confortar le pelegrinos durante lor viage. Le pratos verde con lor perfumo fragrante, dona a illes delicias; e qui pote describer qual agradabile fructos, e mesmo folios, iste arbores dona, certo volera vender tote su possessiones solmente pro acquirer iste campo.