34. Un estranie monumento

.1 Ora io videva que justo al altere latere de iste Plana, le pelegrinos perveniva a un placia ubi, exactemente apud le via, stava un vetule monumento, al vista del qual illes esseva incuriosate a causa del bizarria de su forma. De facto illo pareva un femina, transformate in le forma de un columna. Ibi, ergo, illes continuava reguardar, e durante un certe tempore, illes non comprendeva lo que illo poteva significar.

.2 Finalmente Sperante discoperiva scripte super le capite del monumento, parolas scribite in characteres estranie. Ille non esseva un erudito, e assi ille vocava Christiano, le qual esseva tal, in le spero que ille poterea comprender le significato. Assi ille veniva, e post haber lo un poco studiate pro componer le senso de ille litteras, ille comprendeva que illos diceva: REMEMORA TE DEL SPOSA DE LOT.

.3 Assi ille lo legeva pro su companion, e illes concludeva que illo esseva le Columna de Sal in le qual esseva transformate le sposa de Lot quando illa habeva reguardate a retro con corde concupiscente quando illa fugiva de Sodoma pro salvar se [Gen 19:26]. Iste subite e stupefacente vista les dava occasion del sequente discurso.

.4 Christiano: "Oh, fratre mie, isto es un vista opportun depost nostre experientia con le invitation que Dema nos adressava a que nos veniva vider le Colle del Lucro. Si nos haberea vadite a ubi ille nos desirava, e a ubi tu mesme esseva inclinate vader, fratre mie, nos haberea devenite un spectaculo pro illes qui ha succedite a nos.

.5 Sperante: "Io regretta haber essite si folle: de facto io nunc haberea potite esser como le sposa de Lot, nam qual es le differentia inter su peccato e le mie? Illa solmente reguardava a retro, e io desirava vader a vider. Que le gratia sia exaltate, e io sia plen de vergonia, que un tal cosa habeva potite esser in mi corde!

.6 Christiano: "Vamos considerar lo que nos vide hic pro nostre adjuta durante le tempore a venir: iste femina fugiva de un judicamento. Illa cadeva non per le destruction de Sodoma, ma illa esseva destruite per un altere, proque, como nos vide nunc illa es solmente un Columna de Sal.

.7 Sperante: "Isto es a un passo del via, como esseva illa transformate in un Columna de Sal? Como illes pote assi facer viste que le judicamento que cadeva super illa la rendeva un exemplo facile a vider justo apud le placia ubi illes stava? Il esseva impossibile pro illes non vider la, solmente si illes haberea altiate lor reguardo!

.8 Christiano: "Si, isto es surprendente, e isto demonstra que lor cordes deveniva completemente pervertite, e io non pote dicer a qui io les poterea comparar adequatemente, si non a ille pickpockets qui fure in presentia del policia, o illes qui talia le bursas de alteres sub le furca ipse. Se dice del homines de Sodoma que illes esseva grandemente peccator, proque illes peccava ante al Senior [Gen 13:14], illo es, sub le reguardo ipse de su oculos, mesmo nonobstante le gratia que ille le habeva demonstrate, proque le terra de Sodoma esseva como le jardin de Eden [Gen 13:10]. Isto rendeva Deo ancora plus irate, e lor punition esseva le plus terribile que le Senior poteva mandar.

.9 On pote ergo concluder multo rationabilemente que illes qui, similemente a istes, volera peccar coram Deo, nonobstante le exemplos que sta continuemente ante a lor oculos pro admonestar les, essera digne del judicamento le plus sever.

.10 Sperante: "Sin dubita tu diceva le veritate: quante misericordia que nos ipse, e specialmente io, non deveniva un tal exemplo. Isto nos conduce a regratiar Deo, a star con timor in su presentia, e a rememorar nos semper del sposa de Lot.