31. Incontro con Interessose

.1 Assi io videva tosto que illes exiva del Feria que illes passava preter un homine qui les precedeva, cuje nomine esseva Interessose. Assi illes le demandava: "De ubi veni vos, senior, e a ubi vade vos?. Ille les respondeva que ille veniva del citate de Belleparlar, e que ille vadeva al Citate Celestial. Ille, tamen, non diceva su nomine.

.2 "De Belleparlar?, diceva Christiano, "esque il ha bon homines ibi? [Prov 26:25]. Interessose: "Io lo spera. Christiano: "E vos, senior, como pote io appellar vos?. Interessose: "Io es un estraniero pro vos, e vos es un estraniero pro me. Si vos va in iste direction, io essera felice de esser vostre companion, si non, io essera contente le mesmo.

.3 Christiano: "Io audiva plure vices de iste citate de Belleparlar e, si io ben rememora, se dice que illo es un citate opulente. Interessose: "Certo, io vos lo pote assecurar; io ha ibi multe ric parentes.

.4 Christiano: "Pote io hardir vos demandar qui es vostre parentes ibi?. Interessose: "Quasi le integre citate e, in particular, mi Lord Inversion, mi Lord Servetempores, mi Lord Belleparlar (de cuje ancestres nostre citate prendeva su nomine), alsi senior Blandehomine, senior Duplefacie, Senior Comovosvole, e le parocho de nostre parochia, senior Duplelingua. Iste ultime esseva le fratre de mi matre, del parte del patre. A dicer vos le veritate, io deveniva un gentilhomine de bon qualitate. Nonobstante isto mi avo esseva un barchero, le qual reguardava de un latere e remaneva del altere. Io acquireva mi position facente le mesme mestiero.

.5 Christiano: "Esque vos es maritate?. Interessose: "Si, e mi sposa es un femina multo virtuose, le filia de un femina virtuose. Illa esseva filia de Lady Fiction, ergo illa veniva de un familia multo honorabile. Illa perveniva a tal culmine proque illa sape multo ben como mercar con totes, sia princes, sia paisanos. In ultra, nos differe aliquanto in religion de celles del sorta plus stricte, specialmente in duo parve punctos: primo, nos nunquam effortia nos vader contrarimente al vento o al currente; secundo, nos es semper multo zelante in nostre religion quando illo procede in pantoflas de argento; nos ama multo camminar con illo per le vias si le sol brilla e le gente lo applaude.

.6 Alora Christiano se removeva un poco de Interessose e ille flancava Sperante e le diceva: "Io opina que iste typo es Interessose de Belleparlar e, si ille lo es vermente, nos ha incontrate le plus grande picaro qui habita in iste region. Alora Sperante diceva: "Demanda le lo, ille certo non haberea vergonia de su proprie nomine, nonne?.

.7 Alora Christiano se avicinava de novo a Interessose e le diceva: "Senior, vos parla como si vos sapeva alco plus de lo que le tote mundo sape e, si io non erra, io reputa cognoscer vostre nomine: esque vos non es Interessose de Belleparlar?. Interessose: "Isto non es mi nomine, illo, tamen, es solmente un supernomine que me esseva date per alcuno qui non me tolerava, e io debe satisfacer me de tener illo como un reproche, como altere gentil-homines ha portate le lores ante me.

.8 Christiano: "Ma esque tu nunquam dava occasion a alcuno de appellar te assi?. Interessose: "Nunquam! Nunquam! Le pejor cosa que io unquam faceva pro donar a illes le occasion de appellar me per iste nomine, esseva que io semper habeva le fortuna de concordar in mi discursos con le spirito del tempores, qualcunque illos esseva, e assi toto vadeva semper ben pro me. Si isto me eveniva, isto certo esseva un benediction pro me; io non sape proque iste seniores me reprochava solmente pro isto.

.9 Christiano: "Sin dubita io errava in non pensar que tu es le homine del qual io audiva e vole ben creder me, io pensa que tu nomine es tanto plus convenibile pro te quanto tu es preste a admitter lo. Interessose: "Ben, si tu pensa assi, io non lo pote obviar. Si tu ancora desira que io remane vostre companion, vero mi compania essera agradabile a vos.

.10 Christiano: "Si tu vole venir con nos, tu debera alsi camminar contrarimente al vento e al currente, e io time que illo non es conforme a tu opinion. Tu debera alsi professar un religion vestite de vetule pannellos, non solmente uno que porta pantoflas de argento, perseverar in illo mesmo quando illo porta pedicas de ferro, e non solmente quando illo cammina per le vias con multe applausos. Interessose: "Tu non debe imponer tu opiniones sur mi fide, ni tu debe dominar lo; lassa me a mi libertate e permitte que io veni con te. Christiano: "Non un passo plus in ultra! A minus que tu facera como nos secundo lo que io te propone.

.11 Alora Interessose diceva: "Io nunquam abandonara mi vetule principios, nam illos es innocue e profitabile. Si io non pote vader con vos, io debe facer como io faceva quando io vos incontrava. Io vadera mesmo sol, usque quando io incontrara alcuno qui essera felice de mi compania.