Lament di tosann tutt desperaa
LAMENT DI TOSANN TUTT DESPERAA PERCHÈ GH'È I GIOVIN CHE VA A SOLDAA
(Giacinto Alfieri, 1868)
O pover tosann che secol sii rivaa
che vegnii tanto a bon mercaa
tutt a soldaa vann omen e pivei
vegnii al prezzi di zolfanei
e la mama la se stufa
ai tosann ghe vegn su la mufa
gh'avii di gœub, di nan e di stropiaa
e i pussee bei vann tucc a soldaa.
La piang adess la Tira-Cazzott
che l'è andaa via el sò merlott:
el contingent l'è andaa a l'armada
lee la voreva trass giò in strada;
ma a trass giò in strada la se fa mal
l'è andada a beven on bocal
de la passion del sò tulipan
l'ha mangiaa duu chili e mezz de pan.
La piang fort la Pissa-in-Lett
perchè gh'è andaa via el sò Richett;
pover tosann, a cunt de 'sti guaj
vegnii al prezzi giust de l'aj!
A cunt de la guerra la sciora Ruminga
la vegn al prezzi de se sa minga;
donca tosann, se pur avii intes,
sii al prezzi che costa i scires.
El cervellee per nom Clement
l'hann ciamaa su in contingent;
e per morosa el gh'aveva on madamin
che ghe dava el salamin.
Adess la piang 'sta povera madam
la g'ha domà el pan senza el salam,
e la spera la sciora Carucò
che quell di salam el torna ancamò.
Pover tosann a cunt de la guerra
sii tucc al prezzi di pom de terra
e se va inanz 'sta marmagna
vosen tucc trii sold la cavagna
e coi vegg senza discorr
o tosann avii de fà l'amor
l'ultem prezzi a divvel ciar nett
o tosann, l'è quell d'on brichett!