La portinara
La portinara
Vespasiano Bignami
Chì inciodada!. .. Semper chì
comme on can a la cadenna!
In 'sto boeucc, doe ven mai dì
e se fiada apenna apenna!
Condannada a no sbrottà
sora i sfros de quij de cà,
sora tucc i inanz e indree!. . .
Oh, che brutt, che brutt mestee!
Quell sentì a piccà in di veder
in sul bell del so primm sogn,
per dervigh on dì al sur Peder,
per fagh ciar on dì al sur Togn;
acquistass di raffreddor,
cornpromett el so pudor,
e fass anca rid adree!. . .
Oh, che brutt, che brutt mestee!
Che se poeu, per accident,
se desquatta on altarin. . .
Tracch! Ch'hoo adoss in d'on moment
el padron, tucc i vesin!
E sont mi la cicciaronna,
mì la sprella, la birbonna. . .
Me da à tort finna el ruee!
Oh, cbe brutt, cbe brutt mestee!
Se, a Natal o a Faraost,
crôda in fall quaj palancon,
anca quell l'è tutt a cost
de resià, de fa 'l faccion!
Fan l'astratt; fan el dannaa;
o cbe passen, sti pelaa,
quand mi rughi in del vestee!. . .
Oh, cbe brutt, cbe brutt mestee!
Parlemm no del sur Padron,
ristocratich e stemegna.
"Molta luce in sul scalon!. . .
Raccomando!" Sì?!. .. Ch'el tegna
pizz i ciar finna a mattina
con trii sold de lucelina!
Bell spincin d'on andeghee!. . .
Oh, cbe brutt, cbe brutt mestee!
No! Vel disi seriament,
la po' no andà innanz inscì!
O semm besti, o cbe semm gent!
Chi voeur, staga! Quanto a mì
ancaben che già sia veggia,
sanguanon! doo on pè in la seggia!
Pienti tucc in sui duu pee. . .
e voo a fa quell tal mestee!