La Bibia piemontèisa/Testament Vej/Salm/Salm 45

From Wikisource
Jump to: navigation, search

45. Na bela canson a dësborda da mè cheur[edit]

Ël Salm 45 a l'é 'n poema romàntich ch'a celebra le nòsse d'un re davìdich a na bela principëssa. Ël poeta a làuda 'l re për soa valentìa militar e angagg për la giustissia. A esorta la sposa a esse fidel al re, e a varda con spetativa 'l dì che 'l mariagi a sia benedì con na fiolansa regal. Ël Testament neuv a lo interpreta  'd manera spiritual coma prefigurassion dël trionf dël Crist e 'd sò "mariagi" con ël pòpol ëd coj ch'a saran salvà.  

1Per ël diretor dla mùsica, conforma 'l ton "Liri", dai Koraita, na poesia bin scrita, un cant d'amor. Na bela canson a dësborda da mè cheur. Mi i adressa costi vers a 'n re; mia lenga a l'é tanme na piuma[1] d'un scriba an gamba. 2Ti't ses l'òm pì bel ch'a-i sìa. Paròle 'd grassia a son stàite versà an sij tò làver: për sòn Nosgnor at acòrda 'd benedission ch'a finìran mai. 3Sangia ai tò fianch toa spa, ò gajard guerié[2]; fate v​ëdde an tut tò splendor maestos. 4Fate vëdde an tuta toa majestà e sie vitorios! Cavalca anans për fé trionfé la vrità e la giustissia, parèj che toa man drita a compissa dj'at potent. 5Toe flecie a son molà e a intro drint' ai cheur dij nimis dël re. Ëd nassion a dròco ai tò pé.

6Nosgnor! Tò tròno a sarà mai campà giù[3]. Toa cavija regal a l'é na cavija 'd giustissia. 7Ti 't l'has a cheur la giustissia e 't l'has an ghignon la malissia. A l'é për lòn che Nosgnor, tò De, a l'ha onzute con l'euli[4] dla gòj e a l'ha butate pì àut che tùit ij tò compagn. 8Toe vestimenta a son tute ampërfumà 'd mira, àloe e canela. Dai palass spatussant a ven na musica d'ëstrument a còrda ch'at fà avèj-ne gòj. 9Antrames ij tò òspiti a-i é 'd principësse. Toa sposa a sta a tòa drita e a l'ha adòss giojera pressiosa fàita dl'òr ch'a ven da l'Ofir.

10Scota, ò principëssa, varda e fà atension! Dësmentia dël tut ël paìs d'andoa ch'it ven-e e toa famija! 11Antlora 'l re a sarà anciarmà da toa blëssa. Dòp tut, chiel a l'é 'l tò signor. Sie sogetà a chiel! 12Dij sgnor da Tir a sërcheran tò favor e at porteran un cadò. 13La principëssa a compariss an tut sò splendor: a l'ha adòss colan-e ëd perle e a l'é vestìa 'd brocard ornà d'òr. 14Con ëd veste brodà chila a l'é scortà anvers ël re. Le damisele d'onor che la cudisso ven-o dapress a chila e at la pòrto. 15L'argioissansa dla procession a l'é granda: adèss a intro ant ël palass dël re. 16Ij tò fieuj a daran séguit a la dinastìa dij tò vej. Ti ij faras dij prinsi për tut ël paìs  

17Mi i proclamraj tò grandeur da generassion a generassion: antlora le nassion at laudran për sèmper.

Nòte[edit]

  1. O "stilèt".
  2. Let. "ò òm potent".
  3. O "a l'é për sèmper".
  4. O "a l'ha date 'l crisma".