La Bibia piemontèisa/Testament Vej/Salm/Salm 4

From Wikisource
Jump to: navigation, search

Salm[edit]

4. Nosgnor! Rëspond-me quand ch’it ciamo[edit]

Ël poeta a ciama a Nosgnor ë'd scoté soa preghiera, a manifesta soa fiusa che chiel as anteressrà e cissa ij sò nemis a cambié soa condòta 'd lor e avej fiusa an Nosgnor A finiss con n'àutra preghiera për l'antërvent ëd Nosgnor e a fortiss soa completa fiusa ant soa protession.

1Për ël diretor dël còro, pr' esse companià da strument a còrda. Salm ëd David. Rëspond-me, quand ch'it ciamo, Nosgnor, ch'it diciare mia nossensa. Liberame da tùit ij me sagrin. Àbie misericòrdia 'd mi e scota mia preghiera. 2Sarà-lo ancora për tant vojàutri ch'i veule guasté mia arputassion? Sarà-lo ancora për tant ch'i l'hai da sente d'acuse contra 'd mi sensa fondament? Sarà-lo ancora për tant ch'i l'hai da sente dì 'd busiardarie a mè rësguard? [Interludi]. 3I peude sté sicur ëd sossì: Nosgnor a manifesta Sò favor a coj ch'a-j son fedel, e Chiel a rispondrà quand ch'i-j faso mie sùpliche. 4Fé nen dij pecà an lassand la rabia pijé control ëd vojàutri. Pensje bin durant la neuit e sté ciuto. [Interludi].

5Smon-e 'd sacrifissi con në spirit giust e àbie fiusa an Nosgnor. 6A son tanti coj ch'a diso: "Chi farà-ne vëdde dij temp ch'a sio mej?". Nosgnor! Che toa facia an sorida! 7Ti 't l'has dame na gòj ancora pì granda che coj ch'a l'han avù n'arcòlt bondos ëd forment e 'd vin neuv. 8Im butrai a cogé an pas e i deurm-rai përché mach Ti 't peule feme sté al sicur.