La Bibia piemontèisa/Testament Vej/Salm/Salm 14

From Wikisource
Jump to: navigation, search

Salm[edit]

14. A son pròpi 'd fòj[edit]

Le scritor ambelessì a armarca che l'umanità a l'é tanme 'd pòm mars, corumpù ant la moral. Ij malfator as na sbefio del pòpol ëd Nosgnor e a-j fan d'ògni sòrt ëd brut ëschers, ma lë scritor ëd cost Salm a l'ha fiusa che Nosgnor a-j guerna e a vnirà 'l dì che Chiel as ciaprà soa arvangia.

1Për ël magìster dla musica, ëd David. A son pròpi 'd fòj coj ch'a diso drinta 'd lor[1]: "Tant, Nosgnor a j'é nen!". A l'é 'd gent ch’a l’é guastasse tanme 'd pom mars, a fan gnente ch'a sia drit; gnun ëd lor a fà lòn ch'a l'é giust. 2Nosgnor a varda dal cel e a marca j'òm për vëdde s' a-i sia quajdun ch'a l'abia 'd bonsens e ch'a Lo serca. 3Nò, tùit a l'han voltaje le spale, tùit a son përvertisse; a-i é gnun ch'a fasa 'l bin, gnanca un. 4Amprendran-ne mai coj-là? Mè pòpol as lo mangio ant un bocon tanme 'd pan; a-j passa gnanca 'nt la ment dë scoté Nosgnor. 5Contut ël dì a vnirà quand ch'a saran ciapà da lë sparm, përchè Nosgnor a l'é con coj ch'a lo scoto[2]. 6Vojàutri i veule mach smerdé ij chërdent[3] ma Nosgnor a l'é col ch'a-j giuta[4]. 7A-i é fòrse quajdun an gir[5] ch'a salvrà Israel? Èh, a-i é: a l'é Nosgnor. Quand che Chiel a ristablirà Sò pòpol, Giacòb a crijarà 'd gòj, e Israel a spricerà d'esultansa!

Nòte[edit]
  1. O "An sò cheur".
  2. O "con la generassion dij giust".
  3. O "coj ch'a son crasà".
  4. O "sò arfugi".
  5. O "dal mont Sion".