La Bibia piemontèisa/Testament Neuv/Giaco/Giaco 5

From Wikisource
Jump to: navigation, search

5[edit]

Amonission a jë sgnor[edit]

11 Ora, vojàutri ch'i seve sgnor[1], pioré e gëmme pr' ij maleur ch'a van a cascheve adòss! 2Vòstre richësse a son marse, vòste vestimente a son rusià dai verm! 3Vòst òr e vòst argent a l'ha 'l ruso, e col ruso a sarà na testimoniansa contra 'd voi e av mangiarà la carn parèj dël feu[2]; i l'eve ambaronà 'n tesòr pr' ij dì darié[3]. 4Vardé: ël salari dj'ovrié ch'a l'han mëssonà vòstri camp, e ch'i l'eve fraudà, a crìa; e ij crij ëd coj ch'a l'han mëssonà a son rivà a j'orije dël Signor dl'univers[4]. 5An sla tèra i l'eve vivù ant le delissie; i seve dave ai piasì, i l'eve mach angrassave pr' ël dì dël masel[5]. 6I l'eve condanà e butà a mòrt ël giust e chiel a l'ha nen fave resistensa.

Speté con passiensa l'artòrn dël Signor[edit]

7Ora, donca, mè frej e seur, speté con passiensa fin-a a l'artòrn[6] dël Signor. Vardé coma ij campagnin a speto 'l frut pressios dla tèra con passiensa, fin-a ch'arsèivo la pieuva dla prima e dl'ùltima stagion. 8Vojàutri 'dcò ten-e passiensa, conforté vòstri cheur, përchè l'artòrn ëd Nosgnor a l'é davzin. 9Lamenteve nen j'un dj'àutri për ch'i sie nen condanà[7]. Vardé: ël Giudes a l'é già a la pòrta, 10Pijé pr' esempi d'aflission e 'd passiensa ij profeta ch'a l'han parlà an nòm dël Signor. 11É-lo nen vera ch'i foma stima ch'a son beà coj ch'a l'han soportà con fòrsa dij patiment? I l'eve 'dcò sentì dla passiensa 'd Giòb[8] e i seve lòn che a la fin Nosgnor a l'ha acordaje, përchè Nosgnor a l'é pien ëd compassion e 'd misericòrdia[9].

Istrussion conclusive[edit]

12Ora, dzurtut, mè frej e seur, fé nen ëd giurament, né pr' ël cél, né për la tèra, né qualsëssia d'àutr giurament[10]. Dì “éh” quand ch'a l'é éh e “nò” quand ch'a l'é nò, për ch'i sie nen giudicà.

1313 I é-lo quaidun tra 'd voi ch'a patissa? Ch'a prega. I é-lo quaidun ch'a sia content? Ch'a canta dij salm. 14I é-lo quaidun tra 'd voi ch'a sia malavi? Ch'a manda a ciamé j'ansian dla cesa, e ch'a sio lor a preghé për col-lì, e ch'a-j impartisso n'onsion d'euli[11] a nòm dël Signor. 15Cola preghiera, fàita con fej, a salverà 'l malavi e Nosgnor a-j darà d'arlass e, s'a l'ha fàit ëd pecà, a-j saran përdonà.

16Confëssé l'un a l'àutr vòstri pecà, e preghé l'un për l'àutr, përch' i sie varì. La preghiera përsistenta d'un giust a l'é motobin poderosa. 17Elia, ch'a l'era n'òm parèj ëd nojàutri, a l'avìa pregà con insistensa ch'a pieuvèissa nen, e a l'é nen cascaje 'd pieuva an sla tèra për tre agn e ses mèis[12]. 18E avend torna pregà, ël cél a l'ha dàit ëd pieuva, e la tèra a l'ha dàit sò frut[13].

19Mè frej e seur, se quaidun ëd vojàutri a së slontan-a da la vrità, e n'àutr a-i lo fa artorné, 20ch'a sapia che col ch'a l'avrà torna menà 'n pecator da sò traviament, a lo salverà da la mòrt e a quaterà në strop ëd pecà[14].

Nòte[edit]

  1. Ij rich, ij ricon.
  2. Maté 6:19.
  3. O "për la fin dij temp".
  4. Deuteronòmi 24:14-15.
  5. O "carnage".
  6. O "venùa".
  7. O "giudicà".
  8. Giòb 1:21-22; 2:10.
  9. Salm 103:8.
  10. Maté 5:34-37.
  11. March 6:13.
  12. 1 Rè 17:1; 18:1.
  13. 1 Rè 18:42-45.
  14. Proverbi 10:12; 1 Pé 4:8.