La Bibia piemontèisa/Testament Neuv/Corint/2Corint 12

From Wikisource
Jump to: navigation, search

12[edit]

La spin-a ant la carn ëd Pàul[edit]

12:1 A l’é parèj che le circostanse am fan l’òbligh ëd vanteme. I lo sai bin ch'a sarìa nen na ròba da fé, contut i veulo arfeme ‘dcò a le vision e a j'arvelassion che Nosgnor a l'ha acordame. 12:2 I conòsso n'òm an comunion con ël Crist che, a-i é quatòrdes agn fà, a l'é stàit portà sù fin-a al ters cel. Ciameme nen s'a l'é stàit ant ël còrp o fòra dal còrp: mach Nosgnor a lo sa. 12:3 Èh, mach Nosgnor a sa s' i j'era ant mè còrp o fòra dal còrp: mi i lo sai nen. 12:4 A l'é sicur ch'i son stàit portà sù 'n paradis e i l'hai sentì 'd ròbe ch'a saria fin-a malfé a butesse an paròle, ëd ròbe che a gnun uman a l'é consentì 'd conteje. 12:5 Ëd cola esperiensa im na podrìa bin vanteme, ma i lo farai nen. Im vanterai mach ëd mia dëbolëssa. 12:6 An tute manere, s'i volèissa vanteme, i saria nen un fòl, përchè i dirìa bin la vrità. Contut, i lo faso nen, përchè i veuj nen che quaidun as fassa n'opinion ëd mia person-a ch'a sia pì granda'd lòn ch'a l'ha vëddume fé o ch'a l'ha sentì dì 'd mi, 12:7 bele s'i l'hai arseivù cole strasordinàrie arvelassion da Nosgnor. Parèj, përchè im dèissa nen d’arie, a m'é stàita ficà ant la carn na spin-a: un mëssagé 'd Sàtana ch'am dèissa 'l torment përch' i montèissa nen sle scagn a vanteme. 12:8 I l'hai ciamaje tre vire a Nosgnor ch'am na liberèissa, 12:9 ma chiel a l'ha dame costa rispòsta: "Tut lòn ch'it l'has da manca a l'é mia grassia e gnente 'd pì. Mè podej a travaja mej ant la dëbolëssa. A l'é parèj che mi i veul vanteme dzurtut ëd mie dëbolësse, përché la fòrsa dël Crist a peussa travajé an mi. 12:10 A l'é për motiv ëd lòn ch'i aceto con piasì le dëbolësse, ch'am faso dij tòrt, tùit j'antrap, le persecussion e tùit ij sagrin ch'i l'hai për càusa dël Crist. Përché pròpi quand ch'i son débol i peudo dì d'esse fòrt.

Ij segn d'arconossiment ëd n'apòstol[edit]

12:11 I son stàit malprudent a vanteme, ma vojàutri i l'eve obligame a felo. I dovrìe pitòst esse vojàutri a scrive 'd racomandassion an mè favor, përchè i son ëstàit an gnun-e manere da men-o 'd coj  "super-apòstoj" ch'a son rivà da voi - contut che an mi medésim i sia gnun. 12:12 Quand che mi i j'era da vojàutri i l'hai dave 'd preuve sicure che mi i son n'apòstol genit: passiensa costant, segn, prodis, miràcoj. 12:13 Tra 'd voi i l'hai mancà 'd fé na ròba sola - lòn ch'i faso pro ant j'àutre cese - visadì d'esse për vojàutri un pèis da la mira econòmica. Përdoneme costa ingiustissia!

12:14 Ora i son pront a ven-e a feve visita për la tersa vira e i sarai nen ëd pèis për vojàutri. I veuj nen lòn ch'i l'eve: i veulo vòstre përson-e! A toca nen ai fieiuj ëd buté da part për pare e mare, ma a son pare e mare ch'a buto da part pr' ij sò fieuj. 12:15 Con piasì i spendria për vojàutri tut lòn ch'i l'hai e fin-a mi medésim, bele se a më smija che pì ch'i veulo bin a vojàutri, meno vojàutri im veule bin! 12:16 A-i é tra 'd voi chi a sa bin ch'i son nen ëstàit ëd pèis për vojàutri, ma a-i é d'àutri ch'a penso che mi i sia stàit mach furb e ch'i l'abia pijave con l'astussia. 12:17 Ma com é-lo che mi i l'avrìa mai podulo fé? Magara a son profitasse 'd vojàutri coj ch'i l'hai mandave? 12:18 Quand ch'i l'hai arcomandà a Tito 'd feve visita ansema a col àutr frel, forsi che Tito a l'é profitasse 'd vojàutri? Nò, perché noi i l'oma l'istess ëspirit e i seguitoma le pianà l'un ëd l'àutr: i foma le còse dl'istessa manera. 12:19 Peul esse ch'i pense ch'i disoma adess ste còse per dësfend-ne. Nò, i disoma sòn coma 'd sërvent ëd Crist e con Nosgnor Dé coma nòstr testimoni. Tut lòn ch'i foma, car ij mè amis, a l'é për vòstra edificassion. 12:20 Përché i l'hai tëmma che quand ch'i rivrà, iv trovrà nen tal com' i vorìa, e che vojàutri im trovrà nen tal coma vojàutri i vorìe. I l'hai tëmma ëd trové an tra 'd vojàutri ëd dëscòrdia, d'invidia, ëd furia, ëd rivalità, ëd maldicensa, ëd mormorassion, d'arrogansa, ëd disòrdin. 12:21 Éh, i l'hai tëmma che quand ch'i rivrà, mè Dé am umiliera dë 'dnans a voi. E mi i na sarai motobin crussià përché tanti an tra 'd voi a l'han nen chità 'd fé ij pecà ch'i fasìo an passà. Iv na seve nen pentì 'd vòstra mancansa 'd puressa, dle còse inmoraj ch'i fasìe, da l'anvìa ch'av ciapa për ij piasì dla carn.