Kim deysiz?! (Qayıpnazarov)
Jaǵasına Araldıń,
Urǵan tolqınǵa qarap.
Bir qız kelip otırdı,
Shashın tarqatıp tarap.
Tolqın qayta urǵanda,
Jaǵadaǵı jartasqa.
Jas júregin tolqıtıp,
Oy túsirdi bir basqa.
Keshki teńiz samalı,
Oynar shashların julqıp.
Aral bolsa lepirip,
Tınım tappay tur tolqıp.
Onnan sayın júregi,
Alıp ushıp tınımsız.
Tolqın atqan teńizden,
Kóz almaydı usı qız.
Álle kimniń jolında,
Kózi, oyı, úmiti.
Keshte teńiz boyında,
Kút dedi me jigiti?
Nede bolsa kóp kútti,
Kimdi kútti bilmeymiz.
Qızdı bunsha kúttirgen,
Kewlin tartqan kim deysiz?!