Kettiń (Qayıpnazarov)
Dúnyaǵa keliwdin ketiwi de bar,
Qızıqlı kúnlerdiń ótiwi de bar,
Oylaǵan oylardıń pitiwi de bar,
Xalqıńnıń xızmetin pitkerip kettiń.
Kúshińdi sarp etip emlew isine,
Jetkenshe asıǵıp nawqas kisige,
Mashina joq jerde eldiń ishine,
Dári-dármaǵıńdı bókterip kettiń.
Doktor degen isenimdi aqlawǵa,
Kúshti jumsap kesellikti saplawǵa,
Xalqımızdıń den sawlıǵın saqlawǵa,
Medik kadrlardı jetkerip kettiń.
Insanǵa kópsinip ómir súriwdi,
Ájel pánje ursa qısıp júrimdi,
Arashalap, uzaq sozıp ómirdi,
Geyde ólimge de pánt berip kettiń.
Keselin anıqlap, emin bergizip,
Awır qástelerge dińke engizip,
Bir kórinsek bolar edi degizip,
Xalıqqa qádirińdi ótkerip kettiń!