Kelshi janım kúlimlep (Qayıpnazarov)
Baǵda qızıl almaday,
Kórgende aq júzińdi.
Awdı barlıq ıqlasım,
Men súyemen ózińdi.
Súydim mende senińde,
Deymen seni súygenim.
Kóz aldımnan ketpeydi,
Kúlimlep gúl bergeniń.
Súydim degen sózdi men,
Húrmeyleymen unatıp,
Sen de bunı ózińe,
Kórshi maqul tıńlatıp.
Anıq seniń kewlińdi,
Bileyin dep júrdim kóp.
Sonda da hesh aytpadıń,
Men de seni súydim dep.
Ashıp ishki sırıńdı,
Aytpasańda bilemen.
Bilinip tur kózińen,
Meni sonday súyeseń.
Súygenligiń emes pe?
Wáde berip ótken kún.
Keldiń júrdik qıdırıp,
Birge boldıq aylı tún.
Dıqqatımdı tarrıń sen,
Ózime de bildirmey.
Ańlamappan júrekti,
Iyelepseń pútkilley.
Meyli, berdim kewlimdi,
Íqtıyarım qolıńda.
Keshegidey búgin de,
Kútip turman jolıńda.