Keleshekke jalǵasıp (Qayıpnazarov)
Men xalqıma tileymen tek jaqsılıq,
Xalıq mehrin túyip aldım tas qılıp,
Xalıqqa degen húrmet, izzet, ıqlasım,
Qoyadı meni máńgi gúldey jas qılıp.
Shıqqan uyam, xalqım meniń tiregim,
Xalıq ishinen tabıladı keregim,
Bar uqıbım arnaladı xalıqqa,
Ómirimshe xalıq dep soǵar júregim.
Xalqım, saǵan oylanıp kóz salaman,
Qosıq jazsam ózińnen sóz alaman,
Alda turǵan ullı mánzilge qaray,
Júrseń ayaq, qarasań kóz bolaman.
Men xalqıma ábden isenip qaldım da,
Meni kókke kótermeler xalqım da,
Tabjılmastan qaytpay qarsı baraman,
Xalqım ushın ot tursa da aldımda.
Bul mártlikti júrmen ata saltım dep,
Súrnikkende súyew bolar xalqım dep,
Úmitimdey keleshekke jalǵasıp,
Hár birińdi máńgi qalar dańqım dep.