Kórmedim (Qayıpnazarov)
Gewde men jol júrsem Shımbayǵa qarap,
Ne tatlı qıyallar aladı orap,
Jaslıq jıllarımnan esken samallar,
Aldımnan shıǵadı bir gúldi copap.
Men de kiyatırman sol gúldi oylap,
Sebebi ol ósken qálbimdi jaylap,
Házir tanıs emes ózge shámende,
Áliptey qáwmeti turǵandı jaynap.
Tańlar shuǵlasında shırayı enip,
Gózzal tábiyattıń erkine kónip,
Názik shaqaları jayıp japıraq,
Jazda jaynaǵandı júz álwan dónip.
Dolana-dolana óz qáddin dúzep,
Gúl zawqın bipewge qoyǵandı giznep,
Bizden ayra túsip ıǵbal soqpaǵı,
Nesip etken jerdi júrgendi bezep.
Shım qara kózleri shoq bolıp janıp,
Júrekke ot atıp ketkeni anıq.
Báhár kelgen sayın izlew salsam da,
Kórmedim nur tamǵan diydarın qanıp.