Ji sos trop p’tit magneu

From Wikisource
Jump to navigation Jump to search
Joyeux rèspleus  (1899)  by Jean Bury
Ji sos trop p’tit magneu
[ 24 ]
JI SOS TROP P’TIT MAGNEU

Air : Les Noisettes

1

Ossi pé qu’Marèye â vinaigue
N’allez nin d’jà braire tot m’waitant ;
Ie ! qui j’arawe ! comme il est maigue !
I halcotte â vint tot rottant.
J’ainm’reus baicôp mîx, ji v’dis l’vrêye,
Tot comme Râskin soffler des peus,
Min j’sé qu’ji d’meurè todis grêye
Pasqui ji sos trop p’tit magneu.

2

Mi feume mi dit qu’j’a l’pai trop streute ;
Elle âreut mutoë bin raison.
Portant ’ll’ mi fait magnî dè feute,
Dè kipcape et des pids d’mouton !
On m’dit dè fer comme les robettes,
Mi mette so n’planche ine paire di meus,
Min ji d’vinreus paur èsquèletie
Pasqui ji sos trop p’tit magneu !

[ 25 ]

3

Chal â banquet j’a bon dè vèye
Mi wèzin qui ralèche ses plats
So l’timps qu’ji lum’cène ine bèchèye
Et qu’j’ènnè lai co l’mitant là.
Hureus’mint qu’i m’fait beure è s’plèce
Ca c’n’est nin chal qui j’m’ècrâh’reus,
Seul’mint j’ennè rirè so m’tiesse
Pasqui ji sos trop p’tit magneu !

4

Bin sovint m’vîlle mére mi rèpète
Qu’elle ènn a vèyou po m’sognî ;
Disqu’à sixhe ans, j’a-st-avu l’tête
A câse qui ji n’poléve magnî.
Ossu, j’sos st-ine foért mâle pratique
Et ji v’dirè sins fer nou pleu
Qui ji n’mi mèle nin d’politique
Pasqui ji sos trop p’tit magneu !