Jetiler (Qayıpnazarov)
Qıyal kólin sapırıp oy bóliner,
Oy túbinen ekshelip sóz teriler,
Sapqa turǵan usı hár bir qatardan,
Óz úlkemniń nur jamalı kóriner.
Mártler qádem qoysa, sheller sheginer,
Aqıllar jumsalar, terler tógiler,
Ásirler boyına jatqan shańǵıtıp,
Kumlar kóshiriler, gúller egiler.
Hárkim hár jol menen iske jegiler,
Iske ıqlas, uqıp inta beriler,
Miynet maydanında qızǵın gúreste,
Adamnan adamnıń parqı biliner.
Erkim júrek hámirine baǵınar,
Tınıs alsam qolım isti saǵınar,
Qansha dóretilse, sonsha azsınıp,
Kewlim úlken árman gúliy taǵınar.
Iz túspegen tıńǵa sapar etiler,
Mashaqatlı jollar júrip ótiler,
Xalqımnıń jeńisin cywretleytuǵın,
Meniń de oylarım ósip jetiler.