Jeńis kúni (Qayıpnazarov)
Asa qurallanıp láshkerin úygen,
Bizge urıs ashıp ózleri tiygen,
Tınısh ana jerge bastırıp kirgen,
Jawǵa qarsı turıw mártke tán edi.
Buzılmas birliktiń kúshine isenip,
Xalıq kollap boyǵa quwat-kúsh enip,
Jawdı shegindirip, ústine dónip,
Qan maydanda júrgen soldat men edi.
Dushpan oǵı tiyip jıǵılǵanımda,
Tura almay eńbeklep jılısqanımda,
Qansırap, hálsirep qısılganımda,
Ot ishinen alıp shıqqan sen edi.
Qızıl gúldey jaynap ısıq júzleriń,
Ullı úmit otı tolı kózleriń,
Jazılıp ketesen degen sózleriń,
Jaradarǵa shıpa, dártke em edi.
Top atılıp bomba túsip jarılǵan,
Hár adım jeńisli alǵa barılǵan,
Gúres penen jawdan qaytıp alınǵan,
Bir súyem jer tánde janǵa teń edi.
Qasha-qashtan jaw ókpesi sıǵıldı,
Eń izinde óz inine tıǵıldı,
Reyxstag alındı, tuwı jıǵıldı,
Bizler jeńgen bul jeńisli kún edi.