Jaz (Qayıpnazarov)
Báhár ornın almastırdı jaz benen,
Jaslıq kúnlerimdey jaynap keldi jaz.
Kóllerdi toltırıp úyrek, ǵaz benen,
Gúllerge bóledi shadlı eldi jaz.
Jayna jaz, jaynasın qushaǵında el,
Xalıq maqtasın, ráhátli jazım dep,
Baxıt baǵlarınan jemis alıp kel,
Xalıq ház etsin miynet miywasın jep.
Jayna jaz, jayna sen, salqın túnleriń,
Ósirsin paxtanı, ósirsin dándi.
Jer bawırın iydirip, ıssı kúnlerin,
Jaynaǵan ómirge kirgizsin sándi.
Jayna jaz, jaynasın jazǵı gúllerdey,
Baxıt nurın emgen awıl jerleri.
Jayna jaz, jazdaǵı ıssı kúnlerdey,
Is pátin qızdırsın miynet erleri.
Jayna jaz, dáryanıń suwları tasıp,
Paxtalardıń tamırına qan bersin,
Paxta pissin, appaq górekler ashıp,
Qúdiretli elge kúsh-quwat bersin.