Jay adam (Qayıpnazarov)
Dábdebe dańq belgisi joq tósinde,
Men bir jay adamman kóptiń ishinde,
Kewlimdegi ármanımnıń bolǵanı,
Islerim saqlansa xalıqtıń esinde.
Xalıq buyırsa xızmetine tayınman,
Jolǵa shıqsam jol qıyın dep qayırmań,
Júre almasam jumalarman xalıq ushın,
Íǵbalıma ne tússe de qayılman.
Haq kewilli adam bolsa qasımda,
Uwayımǵa orın qalmas basımda,
Watan ushın qan maydanda qarısıp,
Jaw oǵına kókirek tuttım jasımda.
Kóz aldımda qanım tamǵan kara jer,
Jeńilmestey quwat bergen ana—jer,
Bawırındaǵı tınısh miynet jemisin,
Dep turǵanday keregińshe ala ber.
Bul jemisti dóretken de jay adam,
Jay adam bul—qolı ashıq bay adam.
Molshılıqtı támiyn etken miynetkesh,
Jay adamǵa tay keledi qay adam.