Jaw ústinde (Qayıpnazarov)
Márt qaharman jawıngerler,
Fronttaǵı batır erler,
Anamız-Watan mádetker,
Dóndir oqtı jaw ústine.
Atqan oq ketpesin bosqa,
Gózlep at, óltirip tasla,
Dushpanǵa ayaw joq hasla,
Dóndir oqtı jaw ústine.
Qarsı tursa aybat etip,
Óltire ur ǵayrat etip,
Eger qashsa quwıp jetip,
Dóndir oqtı jaw ústine.
Kúsh ústine qosıp kúshti,
Qızdır maydanda gúresti,
Tezletiw ushın jeńisti,
Dóndir oqtı jaw ústine.
Artillerist, minometchik,
Stankovoy pulemetchik,
Jerden tankist, kókten letchik,
Dóndir oqtı jaw ústine.