Jasay ber sen, Keńesbay (Qayıpnazarov)
Túnlerde tınshımay tereń oy súrip,
Kewilge qonımlı sulıw sóz terip,
Jolmurza aǵanıń jolınan júrip,
Izimizdi basa shıqqan Keńesbay.
Qaǵaz-qálem alsa arqası qozıp,
Ullı árman shıńlarına qol sozıp,
Talay sózge dilwar júyrikten ozıp,
Irkilmesten shıǵa shapqan Keńesbay.
Hasıldı izleseń tabılar tastan,
Aqıldı izleseń shıǵadı jastan,
Júrekte yosh jiger, talantı tasqan,
Kórkem sóz sheberi, shayır Keńesbay.
Qosıq qumarlardıń awdarar zeynin,
Oqıp kórgenlerdiń qandırar miyrin,
Júrekke jaǵımlı sózleri shiyrin,
Kitapları qoldan túspes Keńesbay.
Xalqın qanat berse kókke usha ber,
Dáwir ilham berse shaǵlap yosha ber,
Ádebiy qazanǵa úles qosa ber,
Shiyrin sózler dórete ber, Keńesbay.
Qutlıqlap qarasam elli jasıńda,
Birli-jarım aq kórindi shashıńda,
Jazıw ushın aman bolsın basıń da,
Júzden asıp jasay ber sen, Keńesbay.