Jır arnası (Qayıpnazarov)
Nawayı—ol jır arnasa,
Sarası tawsılmas bulaq,
Qımbatlı, shiyrin sózlerin,
Tıńlawdan jalıqpas qulaq.
Xáwes ettirip sózine,
Tıńlawshınıń kewlin burdı.
Oy teńiziniń órine,
Ullı talant qulash urdı.
Qıyal dáryasında júzdi,
Zamanında baxtın sınap.
Sózden sulıw marjan dizdi,
Qaldı miyras xalıqqa unap.
Ádebiyat maydanında,
Oyı dárya kibi aqtı.
Tereń oylı, dana shayır,
Qıyalı—qus, qanat qaqtı.
Ushtı bálent shıńdı gózlep,
Kókte kúnge talwas etti.
Tolqınlanǵan okeanday,
Kewlinde yosh párwaz etti.
Shayırlıq shıńına shıǵıp,
Tilden hasıl dúrler shashtı.
Qıyınlıq bógetin jıǵıp,
Náwpir jırǵa saǵa ashtı.
Ada bolmas aǵıslı jır,
Tınbay aralap el ishin.
Biziń kúnge kelip jetti,
Sóz hinjisi joytpay kúshin.
Xalıq umıtpay saqlap keldi,
Kórkem sóz marjanın tanıp.
«Farxad Shiyrin» qıssasın,
Men oqıdım miyrim qanıp.
Dástanların kewlim súyip,
Oqıǵanda yosh artadı.
Sonday sulıw jazılǵan sóz,
Eriksiz ózine tartadı.
Nawayı—ol jır arnası,
Saǵası tawsılmas bulaq,
Qımbatlı, shiyrin sózlerin,
Tıńlawdan jalıqpas qulaq.