Júrekte (Qayıpnazarov)
Gúresli jıllardıń jalının bergen,
Baxıtlı kúnlerdiń qızıǵın kórgen.
Zamanıńda talay baǵdan gúl tergen,
Jaslıǵım bar janıp turǵan júrekte.
Aylar, túnler gezip júrgen sırlasıp,
Tańlar-tańǵa, kúnler-kúnge almasıp,
Jetip kelgen qarrılıqqa jalǵasıp,
Jaslıǵım bar janıp turǵan júrekte.
Buyra shashlarıma qıraw tússe de,
Narttay júzlerime ájim ense de,
Jıllar jıljıp, jasıma jas minse de,
Jaslıǵım bar janıp turǵan júrekte.
Mıńq etpeymen dáwir júgin artsa da,
Kewlim órler waqıt keyin tartsa da,
Jiger semip, bilekten kúsh qaytsa da,
Jaslıǵım bar janıp turǵan júrekte.
Márt anadan námárt perzent tuwılmas,
Tuwılsa da janına jan juwımas,
Qartaysam da xalqım ushın suwımas,
Jaslıǵım bar janıp turǵan júrekte.