Iyilip (Qayıpnazarov)
Tańnan turıp qádem qoydım jaz kúni,
Kútip aldı baǵdıń taza jas gúli,
Tárbiyalap júrer eken baǵmanı,
Qulpı dónip kóz tartadı gúl túri.
Terbeledi qıyabandı toltırıp,
Gúllenedi kún nurına umtılıp,
Keń daladan esken erke samallar,
Geyde shańın qaǵıp óter julqınıp.
Gúl názik bolsa da tózimli, bekkem,
Abaylań, ázzi dep julqılap ótpeń,
Tábiyat gózzalı zawıqqa bólenip,
Jilwa-nazı menen kóriner kórkem.
Názeri túskenniń kóz otın alıp,
Úzilip keterdey belleri talıp,
Shámenlerde jawdırasıp jaynaǵan,
Gúller zawqı júregime shoq salıp.
Qarap tursam qáwmetińe súysinip,
Qızlarday tap jańa shıqqan kiyinip,
Gúl turıptı gúlge qumar kózime,
Sulıwlıǵın inám eter iyilip.