Gúz (Qayıpnazarov)
Tınıp aqtı japta suwlar,
Kún ırayı salqın tartıp,
Baǵda jasıl japıraqlar,
Sarǵaydı. Gúz keldi qaytıp.
Ǵaz, tırnalar ushıp ótti,
Kárwanday dizilip qatar,
Sesleri jańǵırtıp kókti,
Ózlerinshe qosıq aytar.
Ústimizden jılda óter,
Sesti tanıs ózimizge,
Kókte kórdik, uzap keter,
Qısta túspes kózimizge.
Araladıq baǵ arasın,
Japıraq quwrap túsipti,
Qıdırdıq kolxoz dalasın,
Eginler tegis pisipti.
Sarı atlas kóylek kiyip,
Kórindi baǵ gúzgi waqta,
Appaq shaqaların iyip,
Ashılıp turıptı paxta.
Gúz deydi-mine alıńız,
Qushaǵım tolı zúráát,
Jıynawǵa ǵayrat salıńız,
Miynetten kóriń ráhát.