Evandjîle sorlon Marc/II

From Wikisource
Jump to navigation Jump to search
Evandjîle sorlon Marc (s.d)  by s.n.
II

II.

On trô è teût.

1. Is rim’nèt a Capharnaüm
quéques djoûs pus tård.

2. Lès djints oyèt dire qu’èst rintré.
Is s’rassonlèt èl mohone,
leûs tél’mint,
qu’i-n-a pus nole plèce
minme so l’ ouh,
Elzî dit l’Parole.

3. Is m’nèt po lî aminer onk
qui n’si sét bodjî :
èls pwèrtèt a leû cwate.

4. A cåse dès djints
is n’polèt lî mostrer.
Adon sins tchik’ter
is d’montèt l’teût
al copète di Jèzus,
î fêt-st-on trô
èt lèyèt d’hinde l’ome
so s’payasse.

5. Leû fwè crîve lès oûys.
Jèzus s’adrèsse a l’ome
qu’èst la tot long stindou :
« Fi,
tès fåtes sont rabatowes. »

6. Quéquès docteûr di li lwè
sont-st-assious la.
Is ram’tèt è leû coûr :

7. « Qwè ?
Ci-la djåze insi…
I djeûre li nom dè bon Diu …
Enn’a qu’onk
qui pout rabate lès fåtes :
èt c’èst Diu. »

8. Mins è si-èsprit,
Jèzus k’nohe so l’côp
çou qu’å-d’vins d’zêls
is trovèt-st-a r’dire.
Elzi dit :
« poqwè lèyîz-v’ vos coûrs
s’èbaler insi ?

9. Qu’a-t-i d’pus åhèye ?
Dîre a ci-chal
tès fåtes sont rabatowes,
ou lî dîre :
dispiète-tu, apougne ti payasse,
èt rote ?

10. Adon,
po qu’vos sèpéze qui so l’tére
li Fi d’l’ome a l’pouvwér
di rabate lès fåtes. »
Jèzus louke li paralitike :

11. A twè djèl dit,
dispiète-tu,
apougne ti payasse
èt va-r’-z-è è t’ mohone. »

12. L’ome si dispiète,
èt å pus abèye,
apougne si payasse
èt ènnè r’va d’vant turtos.
Vor’mint,
is d’monèt tot estoumaké.
Is glôrifiyèt l’bon Diu.
Is d’hèt :
« Nos ’nn’avans co måy vèyou ’ne parèye… »

Matî s’fêt houkî.

13. I sôrtêye a novè so l’bwérd dèl mér.
Lès djints m’nèt ad’lé Lu.
Elz’ac’sègne.

14. Tot passant,
I veût Matî, l’fi d’Alphêye,
qu’ e-st-assiou la,
al bawète dèl douwåne.
I lî dit :
« Vin-st-avou mi… »
L’ôte si drèsse èt sût…

15. Vo-l’chal al tåve amon Matî.
Sacwantès gabelous,
pus ot’tant d’coupåbes
î magnèt-st-ossi
avou Jèzus èt sès discipes.
Awè,
is sont tél’mint al sûre…

16. Dès docteurs di li lwè
qui sont po lès farisyins
vèyèt çoula :
I magne avou dès gabelous
èt dès coupåbes.
Is d’hèt don a sès discipes
« Qwè,
I magne avou zèls… »

17. Jèzus l’ètind èt ’lzî dit :
« Ci n’èst nin lès hêtîs
qu’ont mèzåhe dè docteûr,
mins lès cis qu’ont må ;
dji n’so nin m’nou
po houkî lès djusses,
mins po houkî lès coupåbes. »

Li vî èt l’noû.

18. Lès discipes d’a Dj’han,
èt lès farisyins fêt djeune.
Is m’nèt trover Jèzus.
Is d’hèt :
« Poqwè lès discipes d’a Dj’han
èt lès cis dès farisyins fêt-is djeune
adon qu’lès-tonk nèl fêt nin ? »

19. Jèzus èlzî dit :
« Pout-on fé djeuner lès camarådes
qu’ont stu houkî al nôce,
tot fant qui l’marié è-st-avou zèls ?
Tot l’tins
qu’ ils ont l’marié avou zèls
is n’polèt fé djeune.

20. Mins vochal,
dès djoûs arivèt,
wice qui l’marié èlzî sèrè r’sètchî ;
adon awè,
Is f’ront djeune ci djoû la. »

21. « Nouk ni keûse ’ne noûve pèce
so dès vèyès håres :
pace qu’adon,
li noûve sitofe sètche so l’vî mouss’mint
èt l’hiyeûre èst todi pé. »

22. « Nouk ni mète dè djonne vin
d’vins on vî sètch’ di cûr :
pace qu’adon,
li vin fêt pèter l’sètch’,
li vin èst pièrdou
èt l’sètch’ ossi.
Po dè djonne vin
i fåt-st-on noû sètch’. »

Li Mêsse dè sabat.

23. Vochal li sabat.
Jèzus trivièsse on tchamp d’blé.
Tot fant l’vôye
sès discpes råyèt quéquès pôtes.

24. Lès farisyins lî d’hèt : « Louke…
poqwè fêt-is
çou qu’i n’èst nin pèrmètou
li djoû dè sabat ? »

25. Elzî rèspond :
« N’av måy lèhou çou qu’fat Dåvid ?
Il èsteût d’vins l’mezåhe,
sès k’pagnons èt lu-minme
assotihît d’faim.
Dè tins dè grand Prête Abiatår,

26. Il a moussî èl mohone dè bon Diu
èt a magnî lès pans ofrous.
Portant, nouk såf lès prêtes
ni pout ’nnè magnî.
Enn’a minme diné a sès k’pagnons. »

27. Elzî dit co :
« Li sabat a stu fêt po l’ome.
Ci n’èst nin l’ome
qu’a-stu fêt po l’sabat.

28. Insi,
li Fi d’l’ome èst l’Mêsse,
minme dè sabat. »