El leu et l’ tchén

From Wikisource
Jump to navigation Jump to search
Ôtès modêyes : Feller-BarryOrtografeye do scrijheu
El leu et l' tchén (diviè 1860) 
by Horace Piérard, edited by Jules Lemoine (1892), adon-pwis pa Émile Lempereur & Félicien Barry (dins: 200 septante écrivains dialectaux du Pays Noir, 1958, p. 102), pu pa (Lucien Mahin (droci, 2020)

On leu ki moreut d' fwin,
K' daléve dimander s' pwin
Rescontere on djoû on tchén d' coû,
Gros come on boû.

- " S' dj' el oizreu-st ataker !
Si dj' el pôreu stronner !
Mins va-z è, t'-minme, eterprinde
D' ataker on tchén d' coû cwand ti n' as rén dins l' vinte.

Vårè co mia
Pårler bea !...
Bondjoû, monsieu Liyon !
Comint va-t i, hon ? ",
Dit-st i l' leu d' ene vwès d' basse
Come el vicaire des Håyes cwand i tchante el preface.
- " I va foirt bén ! " - " Oyi, on voet a vo frimousse
Ki vos mindjîz pus d' lård ki d' crosses ! "
- " I n' tént k' a ti
D' fé come mi :
E l' plaece d' aler å bos rletchî les foyes
Vén t' egadjî a l' cinse, c' est le k' on fwait fristouye !
T' årès la po ddjuner del cabolâye ås poes
Et po dinner troes plats å tchoi ! "
- " Godouche !
Ti m' fwais vni l' aiwe a l' boutche !
Cwè çk' i fåt fé po ça ? "
- " Plaire å cinsî, diner l' pate a s' feme
Ey apicî les cis ki vegnnut scheure nos pemes. "
- " Sins pus tårdjî,
Dji m' va egadjî ! "

Mins l' leu k' aveut rmarké
Ki l' cô do tchén esteut pelé :
- " Cwè çki t' as la ? T' es plin d' mås ! "
- " C' est cwand on m' mete el laxhe, å trô ! "
- " A l' laxhe ? Ti n' vas nén ou çki t' vous ? "
- " Nén tos les djoûs,
Mins ça n' fwait rén ! "
- " O ! Comint ça n' fwait rén ! Por mi, ça fwait si bén
Ki dj' fwai ene croes
So t' cabolêye ås poes
Et tes troes plats å tchoi ! "

Ladsu l' leup toûne ès dos
Pete evoye et court co !

C' est po t' dire
Ki sins l' liberté, va-z è tchire !



Note Wikisourd

Li prono coplemint est rmetou divant l' aidant viebe, çou k' oblidje pacô a des spotchaedjes diferins do mwaisse tecse.

Dins l' mwaisse sicrijhaedje, on a pour ti dîre; li dvancete «po» ni prind on coron -r ki dvant l' prono tonike «ti», nén divant l' prono coplemint «ti dire». Adon: c' est po t' dire.