Dog elas ‚Baskervilles’/Kapit velid
Kapit velid. Els ‚Stapletons’ di ‚Merripit House’.
[edit]Jön flifädik göda fovik boso äkvänedon se ladäls obsik magädi glumälik, pö obs fa seiv balid obsik tefü ‚Baskerville Hall’ pikodöli. Ven siör: ‚Henry’ < kobü ob äprimom ad janedön, solasviet ädadranon da fenäts geilik labü bem penditik, äfomölo stenis paelik demü sköts kölik, kels ätegons vitüris. Boada⸗jaläd änidon ön strals goldakölik, äsvo bronsöt, ed äfikulos ad fomälön, das attop äbinon cem ebo ot, kel isenälükon glumi somik pö lans obsik äsoaro.
„Niludob, das sötobs kodidön vali obes, no dome!” baonül äsagom. „Pifenükobs fa täv ed iflodilobs dub vegam, klu äcedobs lödöpi glumidiki. Nu eflifädikobs e stadobs gudiko, so atos valik evedon flenöfikum.”
„Ab ga atos no lölöfiko äbinon säkäd magäla,” ägesagob. „Samo mögädo älielol-li slokön seimani, cedü ob vomi, äneito?”
„Atos binon küpädik, bi dido, du äslipülob, ijinos lü ob, das älilob somikosi. Ästebedob lunüpo, ab no plu ätonon, kludo ikludob, das atos valik äbinon drim.”
„Älelilob atosi kleiliko, zuo süadob, das vo äbinon slok vomik.”
„Mutobs dasäkön atosi sunädo.” Ätoenom kloküli ed äsäkom ele ‚Barrymore’, va etan ökanom kleilükön belifotis obsik. Äsümätos lü ob, das logodalienäds tailafaalik domala ivedons nog paelikums, du älilom säki söla okik.
„Voms te tel komofs in dom, o hisiör: ‚Henry’!” ägesagom. „Jibalan ofas binof bovilavan[1], jikel slipof pö flanäd votik. Votikan binof jimatan obik, e kanob lesiön ore utosi, das ton at no äkanon tonön dese of.”
Ab ye ilugom, sagölo atosi, bi fädo pos janed äkolkömob lädi: ‚Barrymore’ < in luyal lunik, kö logod ofik päbesvieton dub sol. Äbinof vom geilik takedälik labü logodalienäds gretik e mudanotod koldälik. Ab logs trätik ofik äbinons rediks ed älogedons vifiliko lü ob disaü logalips svolik. Somo äbinof jiutan, jikel ädrenof äneito, ed if ädunof so, himatan ofik ga ämutom sevön atosi. Ye äsufükom oki riskäde klülabik tablöfa, ilesagölo taädi. Kikodo äbitom-li so? E kikodo ädrenof-li so ledoliko? Ya zü man gravik at labü logod paelik e balib blägik sfer müstera e glumäla päzänädon. Ebo om äbinom utan, kel bü valans ituvom koapi söla: ‚Charles’, ed älabobs te vödis omik dö dinäds valik deadami bäldana ikodöls. Ämögos-li, das ‚Barrymore’ ga äbinom utan, keli älelogobs in vab pö süt: ‚Regent Street’? Balib äkanon binön ot. Bökan ibepenom mani boso lövikumi, ab magäd somik ga äkanon binön pölik. Lio kanob-li tüvön fifümiko verati? Klülos, das mubalido nedos ad kobikön ko potacalal di ‚Grimpen’ e seividön, va telegrafot blufik obsik jenöfo pidegevon ebo ini nams hiela ‚Barrymore’. Ön tuvedot alseimik, nemu okanoböv nunön bosi hiele ‚Sherlock Holmes’.
Siör: ‚Henry’ < ämutom luxamön dokümis mödik pos janed, kludo älabob timi pötik pro zitäv. Atos äbinon spat blesirik lunotü liöls fol ve mied maräda, idugöl fino obi lü vilagil glumidik, pö kel bumots tel gretikum ka votiks — bo lotidöp e dom dokana: ‚Mortimer’ — äküpidons äd ägeilons geilikumo ka retiks. Potacalal, kel zuo äbinom pitatedülan topädik, älabom memoti kleilik tefü telegrafot et.
„Fümö! o siör!” äsagom, „ekoedob getön söli: ‚Barrymore’ < telegrafoti, leigoäsä ebüdoy obe.”
„Kin eblünon-li oni?”
„Ekö! son obik. O ‚James’! eblinol telegrafoti et lü söl: ‚Barrymore’ < pö ‚Hall’ ävigo, vo-li?”
„Si! o fat! eblünob oni.”
„Ebo ini nams-li omik?” äsäkob.
„Soö! äbinom löpo in masad ettimo, klu no äkanob degivön oni ebo ini nams omik, ab egivob oni läde: ‚Barrymore’, jikel epromof lovegivön oni nenzogo.”
„Älogol-li söli: ‚Barrymore’?”
„Nö! o siör! äsä esagob ole, äbinom in masad.”
„If no älogol omi, ma kis cedol-li, das äbinom in masad?”
„Ga jimatan lönik omik sötof-la sevön topi, kö binom,” potacalal äsagom senälöfiko. „No egetom-li telegrafoti? Ifü pöl seimik söl: ‚Barrymore’ < it olofädomös kusadi!”
Äjinos nenspelik ad laifövön dasäki, ab äklülikos, das to käfod hiela ‚Holmes’ no älabobs blöfi, das ‚Barrymore’ no äkomom pö ‚London’ dü ettim. Büocedobös, das so äjenosöv, sevabo büocedobös, das man ot äbinomöv lätikan, kel älogon siöri: ‚Charles’ < as lifik, ed äbinomöv balidan, kel idatuvülon gerani nulik, ven etan igekömom ini Linglän. Kis äsekonöv-li se atos? Äbinom-li konfidovan votikanas ud älabom-li desini badik lönik? Demädi kinik äkanomöv-li labön ad dränälön famüli elas ‚Baskervilles’? Ämemikob nunedi bisarik se dugayeged ela ‚Times’ pisekötöli. Atos äbinon-li dun omik u dunot seimana, kel ästeifon ad tadunön disini omik? Dunakod tikovik balik ädabinon ut, keli siör: ‚Henry’ < ilofädom, das üf famül pümoplafükonöv isao, täno els ‚Barrymores’ ödagetonsöv lödöpi kovenik e laidiki. Ab fe plän somik binonöv vemo bisarik, demölo disini dibälik e feiniki, kel ekoedon-la vivön träpakäfodi nelogamovik zü baonan yunik. ‚Holmes’ it isagom, das säkäd komplitikum nonik päbligädon ome ünü sökod lölik gretik vestigas dastunüköl oma. Äplekob, ägegolölo ve veg soalöfik glumidik, dat flen obik suno pülelivükomös de kudadins okik, ed ökanomös lükömön ad säbligön obe böladi fikulik at gidida.
Süpiko medit obik päropon fa tons futas rönöl pödü ob e vöga nemi obik äsevokädöla. Igüflekob obi, spetölo ad logön dokani: ‚Mortimer’, ab pisüpädob ad loegön dayagön nesevädikani obi. Äbinom man lövik mägik labü logod lupuedälik kälöfiko pijeiföl ko cügs kevöfik e herem linumayelovik[2]; bäldotü yels vü kildeg e foldegs, lenlabü klotem gedik e stolahät. Tünabok pro sameds planavik älovelagon len jot omik, ed äpolom pabifanafiläti[3] grünik me bal namas okik.
„Fümiko upardol mäpüdi obik, o dokan: ‚Watson’!” äsagom, du änilikom lü ob, natemölo töbiko. „Is: pö marädän < binobs pöp grobälik e no stebedobs jonodi fomedik. Ba älilol-la nemi obik de flen kobädik obsik: ‚Mortimer’. Binob ‚Stapleton’ se ‚Merripit House’.”
„Filät e bok oliks enotükons obe leigiko mödikosi,” äsagom, „ibä äsevob, das söl: ‚Stapleton’ < äbinom nativestigan. Ab lio esevol-li obi?”
„Pivüdob lü ‚Mortimer’, ed älüjonom oli obe da fenät vobacema kötetavik okik, du äbeigolol. Bi vegam oba ed ola zugon äl lüod ot, esludob, das sötob vegamorivön oli ed ito nunädön obi ole. Bo — ma süad obik — siör: ‚Henry’ < leno pefenükom-li fa täv okik?”
„Stadom vemo gudiko, danö!”
„Obs valik vemo äludredobs, das pos deadam lügik siöra: ‚Charles’ < hibaonül nulik mogädiko ürefudom ad lödön is. Binos tuvemik ad flagön de man benolabik ad ditön de zif e fimalödikön pö top somik, ab no nedob sagön ole, das atos vemo veüton pro lödans länäda. Siör: ‚Henry’ < labom, äsä niludob, dredälis lukredik nonik tefü mijenot?”
„Cedob otosi.”
„Fümo sevol-li konädi tefü dog milananik, kel dayagon famüli?”
„Elelilob atosi.”
„Binos bisarik, kio⸗kredäliko feilans träitons atosi! Alikan onas blümon ad yulön, das älogon jafäbi sümik pö maräd.” Äspikom atosi smilülölo, ab äküpob pö logs omik, das äjinom dacedön yegädi fefikumi. „Magäl siöra: ‚Charles’ < vemo peglepädon fa jenotem, e no dotob, das eseikon ome deadami lügik.”
„Ab lio-li?”
„Nevasit omik päfäkädükon sovemo, das komikam doga seimik äfägon ad blinädön vobedi deidöl lade malädik omik. Fomälob, das fe älogom bosi sümik ün neit et pö lael taxudik. Ädredob, das mifät seimik ökanon jenön, bi vemo älöfob bäldädani ed äsevob, das lad omik äbinon ifibiköl.”
„Se kis äsevol-li atosi?”
„Flen obik: ‚Mortimer’< ikonom obe.”
„Cedol-li täno, das dog seimik äpöjuton siöri: ‚Charles’, e das seko ideadom sekü lejek?”
„Labol-li pläni seimik pötöfikum?”
„Ereafob ad slud nonik.”
„Söl: ‚Sherlock Holmes’ ereafom-li üfo ad seimos?”
Vöds at äkoedons töbidön obi ad natemön dü timül, ab loged lü logod takedälik e nüloget kipälik tävakompenana obik äblöfons, das süpäd nonik pidesinon.
„Binos nensiämik pro obs bofik ad simulön, das no sevobs-la oli, o dokan: ‚Watson’!” äsagom. „Penots dö täktifan olik erivons obis is, e no kanolöv famükön omi nes dagetön sevädi pro ol it. Sosus ‚Mortimer’ enunom obe nemi olik, no äkanom noön dientifi olik. Üf komol is, täno se atos sekodon, das söl: ‚Sherlock Holmes’ it nitedälom tefü säkäd, e dido nulälob ad sevön: tikädöpi kinik labom.”
„Liedo no kanob begesagön säki at.”
„Dälolös ad säkön: va desinom-li ad stimön obis me visit pösodik?”
„Nu no kanom lüvön zifi. Labom säkädis votik, kels jäfükons küpäli omik.”
„Pid kion! Kanomöv kleilükön boso utosi, kelos binon nefümik pro obs. Ab tefü vestigs olik lönik, üf mod mögik anik dabinon, me kel kanob frutön oli, ogebidükob obi ole ad ledunön komitis olik. Üf laboböv jonädi seimik tefü binäl miniludas olik u tefü mod, me kel desinol ad vestigön säkädi, ba täno ebo anu gevoböv ole yufoti u konsäli.”
„Lesiob ole, das komob is te kodü visit lü flen obik: siör: ‚Henry’< e neodob yufi lenonik.”
„Süperö!” ‚Stapleton’ äsagom. „Go gidetol, bitölo prüdiko e tödiko. Jiniko änu peblameton obe vüjäfükam nesäkusadovik[4], e promob ole, das no omäniotob dini at dönu.”
Ikömobs lü utöp, kö luvegil nabik yebagik äflaniozugon[5] de veg ed äsnekozugon fagio love maräd. Lubel skapik me klifablögs pibeseitöl ätopon deto, kel ün rutim piceinon ad stonicöpöp granoinik. Föfaflan onik äl obs ätopöl äfomon klifavöli dagik labü filigs e bramarubuds gloföls in niks oksik. Fago lefog gedik mismokik älöpiofliton.
„Spat nevifik ve luvegil at love maräd udugon obis lü ‚Merripit House’,” äsagom. „Ba ufegebolös düpi bal, dat olaboböv blesiri ad jonodön oli söre obik.”
Tikod balid obik äbinälon ad utos, das ömutob blibön nilü siör: ‚Henry’. Ab täno ämemob kumi dokümas e kalotas, fa kel vobatab omik pibundanükon. Äfümos, das no ökanoböv yufön omi tefü etos. Zuo ‚Holmes’ kazeto isagom, das övestigobös nilädanis tefü ‚Hall’ pö maräd. Ädasumob vüdi ela ‚Stapleton’, ed älüodikobs kobo ad luvegil.
„Top kio dafredüköl binon maräd!” äsagom, lovelogölo geilöpis lubelik, pö länod kelik planems zilidafomik lunik labü fäits binü granoin japagulik ägeilons, äs vefs lafamagälik skömöl. „Maräd at neai onaüton oyi. No kanol tikodön, klänis milagik kinik kipedon. Kio binon veitik, ä soalöfik, ä müsterik!”
„Täno sevol oni staböfiko, vo-li?”
„Älödob is dü yels te tels. Laida⸗lödans[6] patöfonsöv obi as enu ekömölan. Äkömobs suniko pos tim, kü siör: ‚Charles’ ilomädikom. Ab lefäks obik äkoedons beletävön obi topi alik länäda is zi, e dalob cedön, das mens nemödik dabinons, kels sevons oni staböfikumo, ka ob.”
„So vemo fikulos-li ad sevön oni?”
„Vemo fikulos. Ekö! samo kamalän gretik et veitik lüodü nolüd de top isik, efe labü lubels bisarik löpü on seädöls. Küpedol-li bosi küpädik pö on?”
„Binonöv-la top seledik ad galotön.”
„Binosöv natöfik ad cedön so, ab tikod somik jünu ya efrädon ömikanes lifis oksik. Eküpol-li yebafeledis klilagrünik et densitiko da on spearölis?”
„Si! jinons fluköfikums, ka retikos.”
‚Stapleton’ äsmilom. „Atos binon dreamöp sevädik: ‚Grimpen’,” äsagom. „Step pölik pö top et malon deadi pro men u nim. Ebo ädelo eloegob goulön jevodili bal topikas lü on. No efägon ad gekömön. Eloegob lötirön oni kapi okik saidiko lunüpiko se marädaläned, ab fino enütiron oni. Igo pö säsuns sigik nesefos ad lovegolön love on, ab pos fluküp reinöfik at top usik binon vemo riskädik. Ab ga kanob tuvön vegi lönik ebo lü zän ona e gekömön lifiko. Nämätü saludan: ‚George’, ekö! jevodil neläbik nog bal!”
Bos braunik ärölon oki ed ämufedon in jugs grünik. Poso särvig lunik demü dol ädremilöl pitenükon löpio, e vokäd lejeikik ispearükon leogi love maräd. Atos iflodöfükon obi dub ledred, ab nevs kompenana obik äjinons nämöfikums, ka uts obik.
„Emoikon!” äsagom. „Mar emosumon oni. Nims tel ünü dels tel, e ba mödo mödikumo, ibä kösömikons ad tävön usio pö stom sigik, e neai suemons disti, jüs mar ogleipon onis. Dreamöp sevädik at: ‚Grimpen’< binon top badik.”
„Ab esagol, das kanol-li dudranön ini on?”
„Si! usio vegils ömik dabinons, kelis men skilik kanon begolön. Etüvob onis.”
„Ab kikodo vilol-li tävön ini top so jeikik?”
„Soö! logol-li lubelis etflano? Binons nisuls voik pededitüköl valaflano fa mar nebegolovik, kel züon onis ya dü yels mödik. Us planis e pabis seledikis kanoy getön, üf sevoy, vio rivön onis.”
„Osötob steifön ad xamön benofäti obik seimüpo.”
Ästunolülogom obi. „Godo sädesinolöd tikamagoti somik!” äsagom. „Odöboböv demü deadam olik. Lesiob ole, das mögod nonik pülikün geköma ola ön stad lifik odabinonöv. Atos mögon te dub memäl tefü mäks topädik komplitik semik, kelosi sevob.”
„He!” ävokädob. „Kis atos binon-li?”
Hag lunik nelaodik ä nebepenamoviko lügik ispearikon love mar. Äfulükon luti lölik, ab ga änemögos ad fümükön, kitopao ätonon. De mur dumik icenon ad ror donöfik, e täno ige⸗cenon dönu ad mur glumidik peböl. ‚Stapleton’ älogedom obi ko notodot bisarik su logod okik.
„Kio nekösömik top at binon: maräd!” äsagom.
„Ab kis üfo atos binon-li?”
„Feilans lesagons, das Dog elas ‚Baskervilles’ somo lävokon lefanäbi okik. Ya älilob atosi ömna büikumo, ab neai sovemo laodiko.”
Ilovelogob, labölo jeiki pö ladäl, kamaläni gianik geilikumöl fagio, stenöfiki dub diledils grünik jugas. Nos ämufon ad givön mali lifa pö spad veitik plä pär rabas, kels ägratons laodiko de klifatipot pödü obs.
„Binol kulivan. No kredol nesiämi somik, vo-li?” äsagob. „Kise kodidol-li toni so bisarik?”
„Mars jafädons noidis bisarik semikna. U binos sad släma, u löpikam vata, u bos somik.”
„Nö! nö! at äbinon vög lifota.”
„Soö! ba so äbinos. Älielol-li föro vokädön boturi?”
„Nö! neai.”
„Binon böd vemo seledik — ledino edadeadon — nu pö Linglän, ab valikos mögon pö maräd. Si! no ostunoböv dö utos, das uklülädobsöv lilön rori bala boturas lätik.”
„Din at binon dremälabikün ä bisarikün, keli föro älilob dü lifüp obik.”
„Sio top at binon valemo go miklänöfik. Lülogolös lubela⸗klivi et! Magädi kinik kodon-li pö ol?”
Kliv skapik lölöfiko pätegon fa lins sirköfik binü ston gedik, mödotü nemu teldeg.
„Kins binons-li ats? Jipaceks-li?”
„Nö! ats binons lödöps ruröletanas dalestümabik obsik. Mens rutimik äbelödon marädi densitiko e, bi nek pato siso älödon is, ai tuvobs konömömis pülik valik büanas, leigoäsä utans eposbinükons onis. Ekö! ludom balana utanas nen nuf pe⸗deüköl. Igo okanolöv logön filetatopi e bedi utanas, üf labolöv nuläli ad nügolön.”
„Ab at ga binon zif. Kitimo pebelödon-li?”
„Mens stonatimäda nulik; period no pasevon.”
„Me kis äjäfons-li?”
„Äbälätons veteri oksik pö lubelaklivs at ed idalärnons ad sesepön[7] stanini, ven gläv bronsötik iprimon ad plaükön cüdi stonik. Lülogolös söpi gretik pö lubel visoik! Atos binon retod dabina menas et. Si! otuvol topis anik mu patiks pö maräd, o dokan: ‚Watson’! Ag, nenzogiko säkusadolös obi! At fümo binon el ‚Cyclopides’.”
Musak u pab smalik ilufliton love luvegil obsik, e pos timül ‚Stapleton’ mu süpiküno lezilo ijutedom ad vifiko pöjutön oni. Lejeko äloegob flitön jafäbi stediko lü mar gretik e love⸗bunön kompenani obik de lubelil yebatuifagik bal sui votik, paudi dü timül pülik nonik laböli, du fanafilät grünik omik äfänädon pö lit. Klotem gedik e mufs letirik zigzagik nenomädik omiks äsümükons omi it ad pab seimik gianik. Ästanob, küpedölo pöjuti omik, ottimo senälölo stunidi demü jäfäd plödakösömik omik e ludredi tefü utos, das ökanom pölatridön pö mar cütidöl, ven älelilob toni stepas ed, igüikölo, äküpob vomi nilü ob pö luvegil. Ilükömof de lüod, pö kel lefogil smoka älüjonon topami ela ‚Merripit House’, ab donikamageilot mara änelogädükon ofi, jüs istanof vemo niliko.
No äkanob dotön, das äbinof lädül: ‚Stapleton’, dö jikel inünoy obe, kodä vomüls alseimik ämutofs nemödön pö maräd ed ämemikob, das ilielob bepenön seimani ofi as jijönan. Vom äniliköl lü ob go fümo äbinof somik, efe vemo nekomuniko jönik. Taäd vemikum nonik äkanonöv dabinön vü blod e sör, bi ‚Stapleton’ älabom skini neudakölik, heremi blonik e logis gedik, du äbinof dofikum, ka blägajiheran[8] alseimik, keli ilogob pö Linglän; i lunedik, deköfik e geilik. Älabof logodi pleidik feinik, sovemo nendöfiki, das äjinonöv nenlefäkik, if pö on no ädabinonsöv mud senälilabik e logs jönik dofik vifilik. Dub maged nedöfik e klotem klotugik ofiks go äbinof späkamaged bisarik pö vegil soalöfik marädik. Logs ofik älüodons lü blod ofik, ven äflekob obi äl of, ab täno äjutedof lü ob. Ideükob häti obik e tio äprimikob ad sagön pläni seimik, ven vöds lönik ofik ilüodükon tikis valik obik ad lüäl nulik.
„Gekömolöd!” äsagof. „Gekömolöd ebo lü ‚London’, nenzogo.”
Äkanob te logetön lü of fopiko dub süpäd. Logs ofik älülulogons obi levemiko, ed ätagof ta glun nesufädiko me fut okik.
„Kikodo mutob-li gekömön?” äsäkob.
„No kanob plänön atosi.” Äspikof me vög spetätik nelaodik labü säy bisarik pö pron. „Ab Godo fölolöd utosi, kelosi begob ole. Gekömolöd e neai onüvegolöd ad maräd dönu.”
„Ab ga ekömob ebo änu.”
„Godö!” ävokädof. „Ga no kanol suemön nunedi gönü ben olik, vo-li? Gekömolöd ini ‚London’! Motävolöd aneito! Lüvolöd topi at ön mod seimik! Sö! blod obik isiokömom! Sagolöd vödi nonik dö utos, kelosi esagob! Kanol-li plökön rogidi et pro ob bevü els ‚Hippuris vulgaris’ et? Rogids vemo bundanons pö maräd obsik, ab ga boso elatikol ad logedön logöfotis jönik topa at.”
‚Stapleton’ istöpedom yagi ed ägegolom lü obs, änatemölo töbiko ed iredikölo dub tutöbidam okik.
„Glidö! o ‚Beryl’!” äsagom, ed älüjinos lü ob, das tonod glidota omik leno äbinon ladöfik.
„Ö! o ‚Jack’! binol vemo hitik.”
„Si! äyagob bali elas ‚Cyclopides’. Binons vemo selediks e ti neai komädons ün latafluküp. Pid kion! das enegetob fanölo oni!” Äspikom nenglifiko, ab logs smalik klilik omik nenzediko älogedons vifiliko nu lü vomül, täno lü ob.
„Äsä logob, esevädükols olis ode”.
„Si! Äspikob siöre: ‚Henry’, das boso elatikom ad logedön jöni legik maräda.”
„Liö! kim cedü ol binom-li atan?”
„Niludob, das atan mutom binön siör: ‚Henry Baskerville’.”
„Nö! nö!” äsagob. „Binob te komunan pülik, ab flen etana. Panemob dokan: ‚Watson’.”
Logodared lusidina äsüikon pö logod notodik ofik. „Täno äbespikobs dinis nebaiädik,” äsagof.
„Sio-li? no älabols timi saidik ad spikotön,” blod ofik äküpetom labü logs leigoso dasäköls.
„Äspikotob, äsif dokan: ‚Watson’ < äbinomöv belödan isik, plas äbinomöv te lotan,” äsagof. „No kanos veütön vemo pro om, va binos gölik u latik pro rogids. Ab ulükömol ad dalogön eli ‚Merripit House’, vo-li?”
Spat nelunik idugon obis lü on: dom marädik glumidik, seimna farm bridana seimik ün dels vönädik beniköl, ab nu pinätüköl e pivedüköl lödöp nulädik. Flukepagad äzüon oni, ab bims, äsä kösömo binos pö maräd, äbinons emaratiköl e pedämüköl fa klimat isik, e top lölik ävobedon, äs ut tämöfik e glumälik. Hidünan bäldik dasägik bisarik labü gun vorik ä ruilakölik, hikel imaifükom obes yani, äjinom lönedön lü dom. Ye nino ädabinons cems gretik kil so feiniko pimöböls, das äjinons jonülön güti domaläda. Ilülogölo da fenäts doma etanas mari nenfinik fa granoin pitegöli e daduliko lü horit fagio zugöli, te äkanob stunön, kis üfo ikoedon-la lödön mani danolik at kobü vom jönik at pö top somik.
„Topil bisarik ad topät, vo-li?” äsagom äsif geölo tiki obik. „Ye eplöpobs ad vedükön obis go läbikis, vo-li? o ‚Beryl’!”
„Vemo läbikis,” ägesagof, ab tonod süada ädefon pö vöds ofik.
„Älabob juli,” ‚Stapleton’ äsagom. „Ätopon pö nolüd läna. Jäf et pro man labü natäl obik äbinon rotik e naütik, ab privileg ad lifön zänodü yunanef, födön dafomi täläktas etanas, e spiretön etanis me kalad e dials löniks vemo pädigidon fa ob. Too fätots ätadunons obis. Peideim vemik inüdranon ini jul, e kilans hipulas ideadoms. No plu ädönulifikon pos mijenot, e pluamanum katäda obik nesavoviko pifegebon. Ab ye, üf no demoy peri kompenanefa keinik hipulas, fredoböv dö mifät lönik, bi, dub klien vemik obik ad planav e nimav, etuvob is mögis nenmiedik tefü bujäfüd oba, e sör obik divodof kol Nat, leigoäs ob. Atos valik, o dokan ‚Watson’! ireifon oli dub ol it, efe logodanotod olik, du älülogetol mari da fenät obsik.”
„Tik fe esüikon pö tikäl obik, das atos binon-la boso naütik, ba läs pro ol, kas pro sör olik.”
„Nö! nö! neai naütob obi,” spidöfo äsagof.
„Labobs bukis, labobs vestigadunikamis obsik, i labobs nilädanis nitedik. Dokan: ‚Mortimer’ < binom man nolikün pö jäfüd okik. Siör: ‚Charles’ < neläbik id äbinom kosädan legudik. Äsevobs omi vemo gudiko e lügobs demü deadam omik vemikumo, kas kanob notodön atosi. Cedü ol, va tuvemo ovüjäfükoböv-li obi, üf uvisitoböv siöri: ‚Henry’ < aposzedelo ad kosükön obi ko om?”
„Süadob, das odafredom.”
„Täno umäniotolös lü om, das desinob ad dunön atosi. Okanobs-la me yuf pülik obas dunön bosi ad fasilükumön dinastadis pro om, jüs ukösömikom ko züäd nulik okik. Ba ulöpiogolol-li? o dokan: ‚Watson’! ad dalogön konleti obik elas ‚Lepidoptera’? Cedob oni fulanumiküni pö Linglän sulüdavesüdik. Sosus ulovelogol onis, koled ti pofimökon.”
Ab ästeifob ad geikön lü blig obik. Glumid maräda, deadam jevodila mifätik, ton bisarik teföl konädi miklänöfik dö els ‚Baskervilles’: dins valik at iglumükons tikis obik. Läyümü magäds pidagetöl et pluuneplu nefümiks, nuned balsiämik e kleilik fa lädül: ‚Stapleton’ äkomädon, ko fef so vemöfik pinotodöl, das no äkanob dotön dö utos, das vöds ofik pikodidons kode semik veütik ä dibätike. Ätadunob töbodis valik ad koedön blibön obi in dom pro koled, e sunädo ädetävob ad täv geik obik, begolölo luvegili yebagik ut, me kel ikömobs.
Ye jiniko be⸗gol seimik brefik ämuton-la dabinön pro utans, kels äsevons oni, bi büä üreafob sui veg, päsüpädob ad loegön seadön lädüli: ‚Stapleton’ < su ston flanü veg. Logod ofik jöniko iredikon dub töbidam ofik pö isiovegam, ed äkipof bradi len koapaflan okik.
„Ebevifagolob vegi lölik ad büogleipön oli, o dokan: ‚Watson’!” äsagof. „Igo no älabob timi ad lenükön häti obik. Mutob no stebön, ibä voto blod obik uküpom nekomi obik. Ävilob sagön ole, das pidob pöki fopik, keli idunob cedölo oli siöri: ‚Henry’. Plidö! glömolös vödis, kels pesagons fa ob e leno tefons oli.”
„Ab no kanob glömön onis, o lädül: ‚Stapleton’!” äsagob. „Binob flen siöra: ‚Henry’, e ben omik vemo jäfükon obi. Konolös obe kodi, demü kel laidälol, das siör: ‚Henry’ < sötomös getävön lü ‚London’.”
„Kaprit vomik, o dokan: ‚Watson’! Pas ven useivol obi, ureafol ad suemön, das no ai kanob plänön kodis, dub kels spikob u bitob.”
„Nö! nö! Memob muifi pö vög olik. Memob logedi pö logs olik. Plidö! plidö! binolös snatik kol ob, o lädül: ‚Stapleton’! bi, sisä ekömob isio, valemo ejinob pazüön fa späkamageds. Lif evedon äsvo dreamöp sevädik et: ‚Grimpen’: labü diledils grünik valöpo, pö kel mögos ad mosadön e nos lüjonon vegi verätik. Täno nunolös obe utosi, kelosi ädiseinol, ed upromob, das oloveblinob nunedi ola siöre: ‚Henry’.”
Notod nefümäla ipubon dü timül pö logod ofik, ab loged ofik idüfälikon dönu, du ägesagof obe.
„Demol atosi tu vemo, o dokan: ‚Watson’!” äsagof. „Blod obik ed ob vemo päjeikülobs fa deadam siöra: ‚Charles’. Äsevobs omi vemo nätimiko, kodä vegäd spata omi äplitöla äzugon love mar lü lom obsik. Mifät famüli omik ätädöl äkodon magädi dibätik pö om, e pos mijenot fe äsenälob, das kods seimik ämutons dabinön tefü dreds, kelis änotodom. Kludo äkudob dö utos, das famüla⸗liman votik ikömom ad lomädikön is, ed äcedob, das üsötom panunedön dö riskäd, ko kel ökolkömom. Atosi valik ädiseinob ad nunön.”
„Ab riskäd kinik-li?”
„Sevol-li konädi dö dog?”
„No kredob nesiämi somik.”
„Ab ob kredob. If labol fluni alseimik ad siör: ‚Henry’, täno dedugolös omi de top, kel ai äbinon mifätik pro famül omik. Vol binon lardik. Kikodo vilomöv-li lödön pö top riskädik at?”
„Bi top at binon riskädik. Natäl siöra: ‚Henry’ < binälon in atos. Dotob, das omögos ad dunükön omi, üf no ugivol obe nüni seimik fümikum, ka at.”
„No kanob spikön seimosi fümik, bi no sevob bosi fümik.”
„Vilob säkön ole säki nog bali, o lädül: ‚Stapleton’! Üf ädiseinol te atosi, ven balidnaedo äspikol obe, kikodo no ävilol-li, das blod olik ödelilom utosi, kelosi äsagof? Atos ninädon nosi, kelosi hiutan u seiman votik kanonöv taspikön.”
„Blod obik vemo senälom neodi, das el ‚Hall’ pabelödonös, bi cedom atosi gudiki pro pöp pöfik pö maräd. Vemo äskanom-la, üf äsevomöv, das isagob bosi, kelos ökanon dunükön siöri: ‚Henry’ < ad motävön. Ab nu efidunob bligi obik e no plu osagob bosi. Mutob gegolön, voto uküpom moami obik ed ominiludom utosi, das udönulogob oli. Adyö!”
Ägüflekof oki ed änepubof pos minuts ömik bevü klifablögs pizijedöl, du äfövob vegami obik lü ‚Baskerville Hall’ ko lan fulü kuds nofümik.
- ↑ Sevabo: ‚scullery maid’.
- ↑ …ko herem linumayelovik = ‚flaxen-haired’.
- ↑ Pabifanafilät = ‚butterfly-net’.
- ↑ nesäkusadovik = ‚unjustifiable’
- ↑ flaniozugön (nelov.) = ‚to strike off’
- ↑ laidalödan = ‚a resident’
- ↑ Sesepön = ‚to dig for’.
- ↑ ‚A brunette (woman)’.
MAGODS.
[edit]
Se Vög Volapüka 2023, Nüm: 12, Pads: 102-103; 2024, Nüm: 2, Pads: 17–19, Nüm: 3, Pads: 28, Nüm: 4, Pads: 35–36, Nüm: 5, Pads: 42–43.