Dog elas ‚Baskervilles’/Kapit mälid
Kapit mälid. ‚Baskerville Hall’.
[edit]Hisiör: ‚Henry Baskerville’ < e dokan: ‚Mortimer’ < äblümoms tü del pi⸗jonidüköl, ed obs, äsä pirajanos, imotevobs lü ‚Devonshire’. Söl: ‚Sherlock Holmes’ äke⸗vabom ko ob lü stajon ed igevom obe büdülis e lejonodi okikis leditikis lätikis.
„No okodedob tikäli olik ad bümicöd me mobs teorodas u miniludas obikas, o ‚Watson’!” äsagom; „Te vilob, das onunodolös lü ob dö jenöfots mögiküno veitöfiko, ed omogevolös obe mögi ad teoram.”
„Jenöfots liosotik-li?” äsäkob.
„Valikos, kel jinon alseimo tefön säkädi, pato kosädi vü ‚Baskerville’ yunik e nilädans omik u patis nulik seimik tefü deadam siöra: ‚Charles’. Dü dels lätik ömik ob it iseividob ömikosi, ab sek liedo äblebon noik. Din te bal bo jinon fümön: das söl: ‚James Desmond’: geran balidkömöl< binom stimaban tibäldik labü natäl mu flenöfik, kludo pöjut at no dalon pakodidön otane. Voiko cedob, das go kanobs nedemön otani pö vätäls obsik. So mens posblibons, kels jenöfiko ozüons siöri: ‚Henry Baskerville’ < pö maräd.”
„Mögos-li ad säbejäfön matanapäri et elas ‚Barrymore’ mu⸗balido?”
„Lenö! No äkanolöv pölön vemikumo. Üf etans binons nedöbiks, fe atos obinonöv negid vemik, ab üf binons kodans, täno leno ospelobsöv ad säklänedön roulis onas. Nö! nö! odakipobsös etanis pö lised obsik miniludükäbas. Zuo jevoda⸗dünan komon us pö ‚Hall’, üf memob verätiko. I farmans tel pö maralän. I flen obsik: dokan ‚Mortimer’, hikeli cedob go ritiki, ä jimatan omik, dö jikel sevobs nosi. I nativestigan et nemü ‚Stapleton’ e sör omik, jikel, äsä sagoy, binof lädül keinik. I söl: ‚Frankland’ se ‚Lafter Hall’, hikel i binom faktor nesevädik, sa nilädans votiks bal u tels. Atans fomons menagrupi, keli mutol küpedön vemo staböfiko.”
„Olejäfikob me töbids obik mögiküno valiks.”
„Labol-la vafi, vo-li?”
„Si! ädesinob ad kesumön oni zuo.”
„Go fümö! Okipolös rövulapistuli olik lä ol delo e neito, e neai oläsükolös prüdi olik!”
Flens obsik ya ikoedoms resärfön seadöpis pö levab klada balid ed ästebedoms obis su pärun.
„Nö! labobs nunis nonasotik,” dokan: ‚Mortimer’ < äbegesagom säkis flena obik. „Süadob te dö utos, das no pälükobs dü dels lätik tel. Neai äplödikobs nes lai⸗zilogedön, e nek äkanon sädrefidön küpäli obsik.”
„Ai ästadols-la kobo, vo-li?”
„Plä äposzedel. Kösömo, ven lükömob ini zif, retidob deli bal lölik pro muad, kludo älifädob oni pö mused löpatidöpa kötetavanas.”
„Zuo ätävob lü legad ad dalogön menamödoti,” ‚Baskerville’ äsagom.
„Ab leno älabobs tupis alseimik.”
„Too atos äbinon nentikälik,” ‚Holmes’ äsagom, lemufükölo kapi okik e logotölo vemo glumiko. „Begob ole, o siör: ‚Henry’! das no ozigololös soaliko! Ibä voto mifät seimik ureifon oli. Egetol-li juki votik olik?”
„Nö! o siör! emoikon fifümiko.”
„Jö! Atos binon vemo nitedik. Soö! adyö!” äläükom, ven tren äprimon ad sleafön dese pärun. „Demolös! o siör: ‚Henry’! bali fraseodas se konäd bisarik vönik et, keli dokan: ‚Mortimer’ äreidom obes, ed ovitolöd marädi ünü düps dagik somik, ven näms diabik nämädons.”
Ägülogob lü pärun, posä idetävobs fagiko dese on, ed äloegob stanön nenmufiko e lulogön obis magedi geilik mägik hiela ‚Holmes’.
Vegam äbinon vifik ä plitik, ed älifädob oni, lesevädikumo seividölo tävakompenanis tel obik e muadölo obi me Spanyänadog dokana: ‚Mortimer’. Pos düps anik glun braunik icenon ad redik, bakastonikos icenon ad granoinikos, e kuns ruilakölik äyebidofs su feiläns pikiudöl kö yebs flifädik äsi planem luglofik votik, kelos äjonon klimati fluköfikum to luimöf vemikum. El ‚Baskerville’ yunik nenropiko älulogom plödio se fenät e laodiko ävokädom dafrediko, kodä ämemosevom patis sevädik länoda di ‚Devon’.
„Ibetävob gretadili vola, sisä iditob isao, o dokan: ‚Watson’!” äsagom, „ab neai älogob topi leigodovik ko atos.”
„Neai älogob elani di ‚Devonshire’, kelan no fanatilon dö grafän okik,” äküpetob.
„Atos sekidon de menasot, leigoäs de grafän it,” dokan: ‚Mortimer’ äsagom. „Logam flena obsik is komöla leadon küpön kapi klöpik kältana, kel ninakipon lanäli e divodi namälik kältanikis. Kap siöra mifätik: ‚Charles’< älabon patedi mu selediki ma patöfs lönik: äbinon lafo gaelanik, lafo Libeiränik. Ab äbinol vemo yunik, ven älogol eli ‚Baskerville Hall’ lätiknaedo, vo-li?”
„Äbinob timanül dü tim deadama fata obik e neai älogob eli ‚Hall’, bi ätopätobs in löd smalik tö jolän sulüdik. Usao idetävob nemediko lü flen ini Lamerikän. Sagobös ole: valikos at binon nulik pö ob, leigoäsä pö dokan: ‚Watson’, e ledesirob ad lelogön mögiküno suno marädi.”
„Sio-li? Täno desir olik fasiliko pejenöfükon, bi us balidnaedo kanol logön marädi,” dokan: ‚Mortimer’ < äsagom, älüjonölo plödio da fenät trenalevaba.
Fagoto sus kvads grünik felas e blegod lövik fota lubel glumidik gedik ägeilon labü sömit krenik küpädik: paelik e jadöfik fagao, leigoäs länod drimamagotik. ‚Baskerville’ äseadom lunüpo, älogetölo usio, ed äreafob ad suemön dub logodanotodot desirik omik, viovemo atos veüton pro om: logam balidnaedik at topa bisarik ut, kö mens bludaröletik omik änämädons so lunüpo ed iposbinükons retodi so dibätiki. Äseadom su gulaseadöp trenalevaba komunik, lenlabölo klotemi binü ‚tweed’ e labü pükasotül Lamerikänik, ab ye, älogölo logodi dofik ä notodiki omiki, äsenälob vemikumo, ka alseimüpo, geran vio legik äbinom tefü tribütalien noubik lunik menas lefäkälik e nämädikas etas. Noub, kurad e nämäd äkomädons pö logabobs densitik omik, nudahogs feinik omik ä logs dofabraunik omik. Üf suk fikulik e riskädik öfütüronöv pro obs pö maräd neflenöfik et, atan äbinom nemu kekomipan, pro kelan ökünoyös ad riskön, süadölo, das utan kuradiko östütomöv oyi.
Tren istopon len stajon smalik soalaseatik, ed obs valik änexänobs. Plödo, etflanü kiud vietik lövik, vab telfimädik ästebedon. Köm obsik fe äbinon jen gretik, bi stajonacif e päkemipolans igrupons okis zü obs ad blinön päkemi obsik. At äbinon vilagil zänedöfik blesirik, ab ästunob, küpedölo soldatis tel lenlabü dünädaleiged dagik stadölis lä leyan, kels ästutoms su güns brefik okik ed äsölogetoms, vio äbeivegobs omis. Bökan: hilepul labü logod grobik koldälik < iglidom siöri: ‚Henry Baskerville’, e pos minuts anik vifiko ävabobs ve veg vidik vietik. Bäläts lubelik ägeilons blegikölo bofaflanü obs, e doms bäldik labü nufs tipik äsestegons plödio da bledem grünik densitik, ab pödü länäd stilik ä solöfik at blegod glumidik lunik maräda, ko lubels krenik e mimaliks as gäps, älöpikon, magölo oki dagiko ta sil soarik.
Bamavab[1] ideflekon oki sui näisüt, ed älöpiovegobs love grufs dibik, pivorüköl fa luibs dü tumyels, vü daems löpik bofaflano, su kels äglofons musk töföl e filigs labü bleds stiföfik bigik fomü stägalineg. Pteridofüts bronsötakölik e bramarubuds stenülik äglimons dub lit sola ädoniköl. Ai nog löpio⸗vegölo, iduvabobs love pon rovik granoinik ed ibeivabobs ve siem bluka noidik, kel ädonio⸗fonon vifiko, skömölo e dumodölo vü stonablögs gedik. Bofiks veg e bluk äzugons love fälid fa kvärabimafot e firafot pibegloföl. Pö flek alik hiel ‚Baskerville’ ävokädom dafrediko, äzilogedölo ziliko ed äsäkölo säkis susnumik. Valikos äjinon jönik pö om, ab cedü ob lämig glumaladäla ätegon-la länädi, kel so küpidiko älabon mäki yela finiköl. Bleds yelovik äbeseitons vegilis ed ädonio⸗vebons sui obs, du äbeivabobs. Noidül luibas vaba obsik ai äläsikon, du ädutävobs sadotis planema puridiköl: legivots lügik, bai ced obik, kelis Nat äjedon fo vab gerana lomiovegöl elas ‚Baskervilles’.
„He!” dokan: ‚Mortimer’ ävokädom, „kis atos binon-li?”
Blegod skapik brüyäraläna: bümal fagik maräda < ätopon fo obs. Pö sömit ona soldat dofik e sevärik deodöl kleiliko pälogon, solidiko stadölo äsvo monitanamagot su disstütot okik, gün omik äseaton blümölo su föfabrad omik. Ädaküpedom vegi, ve kel ävabobs.
„Kis at binon-li? o ‚Perkins’!” dokan: Mortimer < äsäkom.
Vabistiran obsik lafo igüflekom oki pö bök okik. „Fanäb efugom se ‚Princetown’, o siör! Elibükom oki ya bü dels kil, e galedans daküpedons vegi e stajoni alikis, ab no nog etuvons omi. Feilans topädik neplidons atosi, o siör! ga sio.”
„Soö! äsä sevob, udagetoyöv pounis lul, üf okanoyöv nünön dö fugan.”
„Si! o siör! ab mögod ad pouns lul binon din te nenvöladik leigodü mögod ad gug oyik padukötön. Bi etan no binom fanäb komunik. Man at stopedom-la demü nos.”
„Kim üfo binom-li?”
„Panemom ‚Selden’: sasenan di ‚Notting Hill’.”
Kleiliko ämemob jeneti at, bi ‚Holmes’ änitedälom dö on dub kruäl seledik krima e mekäd nensiämik, kels ivedükons dunotis valik sasenana plödakösömikis. Plaäd miserik deidacödeta omik pidunon demü dots anikanas tefü saun tikäla omik, so mostöfik kondöt omik äbinon. Vab obsik älöpiovegon, e fo obs spad veitik maräda älöpikon, labü stonakums raodik e lubelasömits klifagik. Vien koldik älebladon donio usao ed äkoedon dremön obis. Us seimöpo: pö kamalän vorädik et < hietan diabälik äklänedom oki, disnufölo oki in nimanäst, leigoäs natädanim; ladäl omik älfulon me het ta menef lölik, kel irefudon omi. Atos äläfulükon miklänöfi pläo glumäliki läna nefluköfik, viena flödik ä sila dagiköl. Igo ‚Baskerville’ iseilikom ed ivilupom oki nabikumo me gun lönik.
Ibeivegobs länädi fluköfik, kel äblibon pödü e donü obs. Nu äpödiologobs lü on: flanao⸗strals sola donik ävedükons blukis fadis goldakölik e nidons pö taledaglun redik piplaudöl e grup veitik fotülas. Veg fo obs äglumidikumon ed änatädikumon, zugölo ve klivs braunaredik e learaköliks gianagretiks petegöls fa stons gianik. Aidönu äbeivegobs lödöpis marädik: pikiudöl e pinuföls fa ston, nen tedrilaplans ad distöfükön fomi grobik onas. Süpiko äküpobs dono in tälod bovülafomik kvärepis e firis lövikis fa yels tepas mäpetik pimifomölis e piblegükölis. Tüms geilik nabik tel älöpikons löpü bims. Stiran älüjonom me bat okik.
„Ekö! ‚Baskerville Hall’,” äsagom.
Kasedidalaban ilöädom ed älogetom labölo cügis irediköl e logis lehitik. Pos minuts anik irivobs cifayani: fomü labüren filegrana magälik binü gifafer, labü kölüms isuföl mistomi bofaflano, pistenöls fa ligens e löpo labü kaps hisagliedas: sköt elas ‚Baskervilles’. Dom leyananik äbinon bumädafailot binü granoin blägik e bems sestegöl, ab fo on bumot nulik lafo pibumöl ästanon: sek balid golda Sulüda⸗Frikopik siöra: ‚Charles’.
Iduvegobs leyani ad lael, kö luibs dönu äseilons dub bledem, e bims bäldik älütenükons tuigis oksik, fomölo tönuli glumidik love kaps obsik. ‚Baskerville’ ädremikom, äloegölo löpiozugön laeli lunik dagik lü top, kö dom äluliton äsvo späk fagiko.
„Atos is äjenon-li?” äsäkom visipölo.
„Nö! nö! pö taxuda⸗lael votaflano.”
Geran yunik äzilogedom labü logod glumik.
„No binos stunabik, das ziom obik äbüosenom, das mifät üdrefonöv omi pö top somik,” äsagom. „Züam isik labon saidikosi ad dredükön alani. Ukoedob süikön kedi lampadas lektinik is ünü muls mäl, e no omemosevols attopi, pas ven lampads labü lita⸗näm äsvo kandelas mil fiamü ‚Swan’ ed ‚Edison’ olitons ebo is: föfü cifayan.”
Lesüt iveitikon ad spad lardik glunota e lödöp ipubon lo obs. Pö lulit äkanob küpön utosi, das zänoda⸗dil ona äbinon fasad masifik doma, se kel pärunül äseädon. Föfadil ti löliko pibeglofon fa hed, te gäps nemödik töbo äsüstegons is ed us, kö fenät u skötaplatäd ädudränon veali dagik. Tüms telatik: vönik, labü krens e pihogöls fa skers mödik < älöikons se zänodadil at. Flanäds nulikum binü granoin blägik äbinons detü e nedetü krens. Lit paelik ädudranon da fenäts bemik masifik, e se cims geilik, kels älöons su nuf skapik klivik, smokakölüm blägik soelik äsejuton.
„Benokömö! o hisiör: ‚Henry’! Benokömaglidobs ori pö ‚Baskerville Hall’!”
Man geilik iföfiostepom se jad pärunüla ad maifükön yani vaba. Maged voma päsilhuäton taädölo ta lit yelovik vestibüla. Jietan äsegolof ed äyufof mani ad sälodön päkemi obsik.
„No protestol-li ta täv nenzogik obik lomio? o siör: ‚Henry’!” dokan: ‚Mortimer’ äsagom. „Jimatan obik stebedof obi.”
„Ostebolös ed ofidedolös!”
„Nö! mutob motevön. Utuvob-la vobodi anik flagöl kejäfikami obik. Osteboböv ad jonön domi ole, ab ‚Barrymore’ obinom geidan gudikum, ka ob. Adyö! e neai zogolös ad levüdön obi neito u delo, üf okanob yufön oli.”
Vabaluibs änelaodikumons pö vabam donio ve veg, du siör: ‚Henry’ < ed ob äkekömobs ini lecem, e yan änoidülon nämöfiko pödü obs. Ireafobs ini lödöp jönik: vidik, geilik, labü bems mödik masifik binü kvärepaboad idofiköl dub bäldikam. In filetatopafön vönädavogädik fil äknätäron ed äsnipon me filamaboad pödü fönajelöm. Siör: ‚Henry’ ed ob ätenükobs namis obsik lü on, bi iflodikobs dub vegam lunik obsik. Poso äzilogedobs züamo; dins valik: fenät geilik rovik labü vitür bäldik pistenöl, jaläd kvärepaboadik, kaps stägas, skötaplatäds len völs < äbinons paeliks e trubiks pö lit nenämöfik lampada zänodik.
„Attop logoton, leigoäsä äfomälob oni,” siör: ‚Henry’ < äsagom. „Atos ga binon selogam lödöpa famülik bäldädik, vo-li? Tikoyös! das pö lecem ebo at büröletans obik älifons dü yels lultum. Atos kodon magädi dibätik pö ob.”
Äloegob litikön logodi dofik omik dub lanäl hipulik, du älulogom zü ok. Lit äbesvieton utöpi, kö ästanom, ab jads lunik päjedons sui völs ed ädoniolagons äsvo nufül blägik sus om. ‚Barrymore’ idönukömom, pas imosumom päkemi obsik ini cems obsik. Nu ästanom lo obs, kondötölo sumätäliko, äsä dünan beno pibetidöl. Äbinom man küpädik: geilik, gravik, labü balib blägik vidik e logodalienäds feinik paelik.
„Vilor-li büdön ad bebötön sänedi nenzogo? o siör!”
„Binon-li blümik?”
„Pas minuts vemo nemödik, o siör! Utuvors vati hitik pö cems orsik. Jimatan obik kobü ob, o siör: ‚Henry’! fredo oblibof nilü or is sovüo jüs ulonülor leodükama⸗mesülis nulik, ab osuemor, das demü dinäds nulik dom at oflagon dünanis mödik.”
„Dinäds kinik-li?”
„Te ediseinob me vöds obik, o siör! das siör: ‚Charles’ < älifädom lifi vemo soelöfiki ed äplöpobs ad käledön neodotis omik. Dido ovilor labön flenis mödikum, klu oneodor votikamis pö konöm orik.”
„Diseinol-li, das vilol necalikön kobü jimatan olik?”
„Pas if atos kotenükon ori, o siör!”
„Ab famül olik äcalon pö obs dü menäds mödik, vo-li? Opidoböv sludi ad primükön lifi obik is me breik tanäta famülik vönik.”
Äsva älogob-la malis anik fäkama pö logod vietik domala.
„I senälob otosi, o siör! äsi jimatan obik. Ab koefo, o siör! obs bofik äbinobs vemo ledivodiks kol siör: ‚Charles’, e deadam omik ifäkükon obis ed ivedükon züamöpi isik vemo dolöfiki pro obs. Dredob, das neföro okanobs senälön obis koveniko in ‚Baskerville Hall’.”
„Ab kisi üfo desinols-li ad dunön?”
„No dotob, o siör! das obenoplöpobsös pö büsid seimik. Giviäl siöra: ‚Charles’ < iseikon obes monamedi ad duinön atosi. Ab anu, o siör! bo sötob jonön ores cemis orsik.”
Yal stedagulik labü balutastutöm äzugon löpo zü lecem bäldik, lü kel me tridem tel⸗tenodik älügoloy. De top zänik at luyals tel lunik ätenikons ve lun lölik bumota, dese kels slipacems valik äbinons rivoviks. Ut obik lönik ätopon pö flanäd ot, äs ela ‚Baskerville’ e ti len omik. Cems at iklülädons binön plüo nulädikums, ka zäna⸗top doma, e tapot levielik sa kandels mödik ästeifons ad moükön magädi glumälik, keli köm obsik ikodon pö ob.
Ab fidalecem, kel älogädon dese vestibül, äbinon top dofik e glumidik. Äbinon cem lunik labü trid demiedüköl geiledi, kö famülalimans äseadons, de diläd donikum pijonidüköl pro reigäbs onas. Pö finot bal löpayal pro mastanakanitans ätopon sus on. Bems blägik äzugons sus kaps obsik, labü nufed, dub smok idofiköl, löpü oks. Pö keds pägaflamotas flamülöl ad litükön attopi, e pö yof levielik e levemik lefideda vönädik, is äbinos-la jönikum; ab nü söls tel me blägaklotem piklotöls äseadoms ninü sirk smalik lita fa kapütalampad päjedöla, vög alana pädumükon e lan alana äteafülon. Ked jadöfik büröletanas lenlabü klotem fomas valasotik: de lesiör timäda di ‚Elizabeth I’ jü dändin ön stül guvalama < ädoniologon de völ obis ed äjeikon obis me kom seilik okik. Äspikotobs nemödiko, ed ob pösodiko ifredikob, ven fidäd ifinikon ed äkanobs golön ini biliara⸗cem nutimik ad smökön zigarüli.
„Cedü ob, top at fe no binon vemo plitik,” siör: ‚Henry’ äsagom. „Niludob, das seiman okanonöv kösömükön oki ko attop, ab anu senälob obi nekoveniko. No küpädos, das ziom obik äbinom boso närvodik, älifölo go soaliko pö dom somik. Too, üf balädol ko ob, täno aneito ugolobsös ad slipön göliko, e gödo züäd ologoton-la plitikumo.”
Ämaitirob körtenis cema obik, büä ügolob lü bed, ed iplödiologob da fenät obik. Ätopon äl läned gramenik fo domayan topöl. Fagikumo fotils tel äfrakatons ed äkledons ön vien nämikumöl. Lafamun älogädikon semikna da slitods bevü lefogs jutöl. Ön lit koldik stralas onik äküpedob pödü bims belemakedi neplenik, ä krugalieni lunik tälik maräda glumidik. Ifäitirob körtenis, senälölo, das magäd obik lätik no ädifon leigodü ret.
Ab iklülädos, das ga no äbinon lätik. Äbinob fenik ab ga ne⸗slipöfik, netakediko zigolölo ad kodön slipi no äkömöli. Fagiko glok pätoenon aipos düpafoldil, ab reto deadastil äfulükon domi vönik. E täno süpiko, ön lestil neita, ton kleilik ä vemik irivon lilis obik. Äbinon slok dumöl: yam pätaetöl < voma fulik me lied no päbemastöl. Älöikob in bed ed ädalilob küpälo. Noid no äkanon tonön fagao efe äbinon ninü dom. Dü laf düpa ädastebedob galälo, ab nog ton nonik votik ätonon plä glok pätoenöl e hed len völ änoidedöl.
- ↑ Sevabo el ‚wagonette’, kel älabon bamis tel pro tävans. Logolsös magodis fa ‚Sidney Paget’ pö vödem!
MAGODS.
[edit]
Se Vög Volapüka 2023, Nüm: 5, Pads: 46-47, Nüm: 6, Pads: 54–56, Nüm: 8, Pads: 70–72, Nüm: 9, Pads: 79–80.
VV. 2023. V, 46-46; VI, 54-56; VIII, 70-72; IX, 79-80; X, 87-88; XI, 95-96; XII, 102.