Dog elas ‚Baskervilles’/Kapit kilid
Kapit kilid. Säkäd.
[edit]Koefob, das vöds at ekoedons dremälön obi. Dremäl, kel äketonon pö vög dokana, äjonon, das om it päfäkädükom fa utos, kelosi ikonom obes. Hiel ‚Holmes’ äbiegom föfio ön fäkäd okik, e logs omik älabons nidüli dudranik ä sigiki, kel süikon pö ons, ven muvemo enitedälikom.
„Elelogol-li atosi?”
„Leigoäsä kleiliko anu lelogob oli.”
„Ed esagol-li nosi?”
„Ga ön mod kinik atos äbinonöv-li frutik?”
„Kikodo nek pläamü ol älogon-li atosi?”
„Nüpedots ätopons de koap fagotü louns zao teldegs, e nek älüälükon küpäli ad ons. No üküpoböv-la etis üf no äsevoböv konädi at.”
„Galedanadogs mödik komons-li pö maräd?”
„Nendoto si! ab at no äbinon galedanadog.”
„Elesagol-li, das nüpedots äbinons gretotiks?”
„Lemu gretotiks.”
„Ab no äzugons-li lü koap?”
„Nö!”
„Neit ettimik liosotik äbinon-li?”
„Luimöfik e koldik.”
„Ab jenöfo no äreinos-li?”
„Nö!”
„Lael et kinik binon-li?”
„Labon pö flans okik buidis tel binü taxuds bäldik: labü geilot mö pieds degtel e nedudränoviks. Spataveg zänodo labon vidoti mö pieds zao jöls.”
„Bos binon-li vü buids e spataveg?”
„Si! us strip yeba labü vidot mö pieds zao 6 binons len flans bofik.”
„Äsä suemob, kanoy-li dudränön buidi taxudik pö top te balik: yan?”
„Si! medü kläpedil äl mar.”
„Lebrekod anik votik komädon-li us?”
„Nö!”
„So, ad rivön laeli taxudik, nedoy-li u doniogolön dese dom u nügolön da yan äl mar?”
„I segolöp dabinon da priel pö finot fagikum laela.”
„Siör: ‚Charles’ erivom-li osi?”
„Nö! äseatom de us fagotü louns zao luldegs.”
„Täno sagolös obe, o dokan: ‚Mortimer’! — ed atos binon veütik: nüpedots, kelis älogol, äbinons-li su gronaveg efe no su glunot?”
„Nüpedots no kanons jonodön okis su yeb.”
„Äkomädons-li pö flan ot vega leigoäs mara⸗yan?”
„Si! äkomädons lä siem vega pö flan ot leigoäs marayan.”
„Enitedälükol obi levemo. Dinäd votik: kläpedil äbinon-li färmik?”
„Pefärmüköl e pelököl.”
„Liogeilik et binon-li?”
„Geilotü pieds zao fols.”
„Täno kanoy-li lovegrämön oni?”
„Si!”
„Nüpedotis kinik elogol-li lä kläpedil?”
„Nonikis sota patik.”
„Sülö! Nek üfo evestigon-li topi usik?”
„Güö! ob it evestigob.”
„Ed esetuvol-li nosi?”
„Valikos äbinon brulik. Päküpidos, das siör: ‚Charles’ < istanom us dü minuts lul u degs.”
„Bai kis süadol-li atosi?”
„Bi zen edoniofalon dese zigar omik telna.”
„Süperö! Calasvist somik, o ‚Watson’! fredükon obis. Ab nüpedots-li?”
„Iposbinükom nüpedotis okik valöpo pö topil smalik et gronavega. No äkanob distidön votikis.”
‚Sherlock Holmes’ nesufädiko äflapom me nam omik kieni okik.
„If äbinoböv us!” ävokädom. „Klülo jenet at binon levemo nitedälik, e gevon mögis levemik jäfüdisevane nolavik. Pad et gronik, pö kel äkanoböv dereidön so mödiko, jüs gronaveg püvedükon miot bülöfik fa rein e püsädekon fa juks feilanas nulälik. Ag! o dokan: ‚Mortimer’! o dokan: ‚Mortimer’! if ilevüdolöv obi! Fe gididol demü atos.”
„No äkanob levüdön oli, o söl: ‚Holmes’! nes sevädükön dinädis at vole, ed ya ekleilükob kodis obik ad no vilön dunön utosi. Zuo, zuo...”
„Kikodo zogol-li?”
„Jäfüd dabinon, pö kel visedälikünan e daskilikünan täktifanas binon nenyufik.”
„Me atos diseinol-li, das din at binon sus⸗natik?”
„No elesagob atosi.”
„Nö! ab jiniko dacedol atosi somiki.”
„Sis mijenot, o söl: ‚Holmes’! sagäds edudranons lü ob dö jenots anik, kels töbo palönedükons ad jenäd natöfik.”
„Samo-li?”
„Etüvob, das, büä jenot jeikik ijenon, mens anik älelogons pö mar jafäbi, kel baiädon ko milanan di ‚Baskerville’, e kel ba no kanon-la binön nim seimik sevädöl pö nolav. Etans valik äbaicedons, das et äbinon jafäb gianik: litiköl, dredabik e späkik. Ekrodadasäkob menis et: feilan dinöfälik, safaferan e farman marädik, kels valik ikonons jenotemi ebo oti dö späk lejeikik at, ko dog diabik se konäd lölöfiko baiädöl. Lesiob ole, das jeik dareigon pö ziläk e te men kuradik kanon loveön da maräd neito.”
„Ab ol: men labü lüälastad nolavik < kredol-li, das atos binon susnatik?”
„No sevob: kisi mutob kredön.”
‚Holmes’ ätovülom jotis okik.
„Jünu ämiedükumob vestigis obik ad vol at,” äsagom. „Ätadunob badi me näms obik pülik, ab komipön ta Fat it bada binos-la blig tu rogik. Ye mutol siön, das nüpedot binon stöfik.”
„Dog rigik äbinon tu stöfik, adas ikanon sleitön gugi manik, ab ye leigo äbinon diabik.”
„Küpob, das go elecenol ad daced sus⸗natavanas. Ab täno, o dokan: ‚Mortimer’! sagolös obe: if labol meugis somik, kikodo üfo ekömol-li ad yufidön obi? Lesagol obe, das binos vanik ad vestigön deadami siöra: ‚Charles’, ab ottimo begol obe ad dunön atosi.”
„No äsagob, das vilob koedön dunön oli atosi.”
„Täno lio kanob-li yufön oli?”
„Ukonsälölo obe: kisi mutob dunön tefü siör: ‚Henry Baskerville’, hikel ukömom ad stajon: ‚Waterloo’ ” — dokan: ‚Mortimer’ älogedom gloki okik — „kurato pos düp bal e foldil.”
„Binom-li geran?”
„Si! Pos deadam siöra: ‚Charles’ eseividobs hibaonüli at, ed eklülädos, das feilom pö Kanadän. Ma cödots, kels erivons obis, binom man ön tef alik süperik. Nu spikob noe as sanavan, abgüä as fiedakomitäb e ledunan vila siöra: ‚Charles’.”
„Flagodan votik nonik dabinon-li, äsä büocedob?”
„Nö! Röletan votik balik, keli ekanobs tuvön, binom ‚Rodger Baskerville’: yunikünan bevü blods kil, tefü kelans siör: ‚Charles’ < neläbik äbinom bäldikün. Telidan yunüpo edeadöl binom fat yunana at: ‚Henry’. Kilidan: ‚Rodger’ < äbinom jemodasten famüla. Igeredom däspotäli di ‚Baskerville’, ed, äsä äsagoy obe, älogotom leigoäs pöträt dafamülik hiela ‚Hugo’ ettimik. Ikoedom binön Lingläni tu nekoveniki kol ok dub fäkädäl okik, ifugom ad Zänoda⸗Merop, ed ideadom us tü yel: 1876 kodü yelovatüfud. ‚Henry’ binom lätikan elas ‚Baskervilles’. Pos düp bal e minuts lul ukobikob ko om pö stajon: ‚Waterloo’. Egetob telegrafoti, das agödo ükömom lä ‚Southampton’. Nu, o söl: ‚Holmes’! kisi konsälolöv-li obe ad dunön kol om?”
„Bo ovegomöv-li lü lödöp büröletanas okik?”
„Atos jinon natöfik, vo-li? Ye demolös, das alan elas ‚Baskervilles’, kel tevon usio, kosgolon mifäti. Süadob, das üf siör: ‚Charles’ < äkanomöv spikön ko ob bü deadam okik, inunedomöv obi ad no dugön lätikani dafamüla vönik ä valigerani liega gretik lü top deidöl at. Ab ye no mögos ad noön, das benikam länäda neläbik glumik lölik sekidon de kom omik. Dunikams gudik valik, kels pedunikons fa siör: ‚Charles’, umiplöponsöv üf dalabotan ela ‚Hall’ onekomon. Dredob, das nitedäl logädik obik tefü din nüvobedon obi tu vemiko, e demü atos büiküno elonülob säkädi ole ed anu konsälidob oli.”
‚Holmes’ äletikom pülatimilo.
„Me vöds balugik din binälon in sökölos,” äsagom. „Bai ced olik, faktor diabik dabinon, kel koedon binön eli ‚Dartmoor’ steböpi nesefik pro el ‚Baskerville’, vo-li?”
„Nemu kanob stetön, das blöfastabs ömik dabinons ad atos.”
„Vö! Ab fe, üf teor susnatik olik veräton, bad kanon dämükön yunani pö ‚London’ leigoäsä pö ‚Devonshire’. Diab labü nämäds te topiks äsvo cäm pädänik binonöv din tu neluveratik.”
„Ceidol säkädi nensüenikumo, o söl: ‚Holmes’! kas bitolöv, üf pösodiko äkosikolöv ko dins et. Kludo konsäl olik, äsä suemob, binälon in utos, das yunan ostadom sefo pö ‚Devonshire’ leigoäsä pö ‚London’. Ukömom pos minuts luldeg. Kisi komandolöv-li?”
„Komandob, o siör! das ovokolös loatavabani, odevokolös Spanyänadogi olik domayani obik anu kratöli, ed otävolös lü ‚Waterloo’ ad koskömön siöri: ‚Henry Baskerville’.”
„E täno-li?”
„E täno osagolös go nosi etane sovüo jüs ufivätälob säkädi.”
„Liolunüpo ovätälol-li?”
„Dü düps teldegfol. Vemo odanädob ole, o dokan: ‚Mortimer’! üf uvisitol obi is tü düp degid odelo, id obenükolöv desinis fütürik obik üf ukedugolöv siöri: ‚Henry Baskerville’ < ko ol.”
„Udunob atosi, o söl: ‚Holmes’!”
Äpenülom timi kolköma sui slivül okik ed ämojutedom, zilogölo bisariko e disipiko. ‚Holmes’ ästöpädom ilüvokädölo etani pö löpadil tridema.
„Säk te nog bal, o dokan: ‚Mortimer’! Esagol-li, das bü deadam siöra: ‚Charles Baskerville’ < mens ömik älogons späki at pö maräd?”
„Mens kil älogons oni.”
„Anikan älogon-li oni poso?”
„No elelilob dö atos.”
„Danö! Dabeni ole!”
‚Holmes’ egeseidom oki sui seadöp okik, älabölo logodi takik somik kotenükama ninälik, kelos ämalon, das äjäfom me säkäd omi digädöl.
„Anu degolol-li? o ‚Watson’!”
„Üf no kanob yufön oli.”
„Nö! o flenädan löfik obik! yufidob oli ifü tim dunöfa. Ab atos binon magifik, vo patädik ma tikädöps anik. Ven obeigolol eli ‚Bradley’, ubegolöv-li ome ad sedön pauni tabaka raodik nämöfikün? Danob oli. Obinosöv leigoso gudik üf okanol no gekömön jüi soar. Täno ofredob ad leigodön magädis obas tefü säkäd at mu nitedik, kel pebligädon obes agödo.”
Äsevob, das deditükam e soal ats vemo äzesüdons pro flen obik pö düps somik leküpäla vemöfik me tik, dü kels ätikädom diledili alik temunoda, ästukom teoris valasotik, ävätälom utis bal pos votik, ed äsludikom: dins kinik äbinons binäliks, e kiniks äbinons neledemabiks. Dubo ilifädob deli pö klub obik, e no ägekömob lü süt: ‚Baker Street’< jüi soar. Nogna ireafob ad lomöfacem za düp zülid.
Ven imaifükob yani, primo ilüjinos lü ob, das fil ilibükon oki, bi cem äfulon me smok sovemo, das lit lampada su tab pänelogädükon fa ut. Ye, ebo ven inügolob, isädredikob, kodä at äbinon mismok lebiedik tabaka vemöfik raodik, kel ikoedon dolön gugi obik ed ikoedon kögön obi. Älogob da fogül nofümiko eli ‚Holmes’ lenlabü[1] cemaklot omik, iblotüköli oki su bradastul e labü pip taimik blägik omik vü lips. Ruläds papürik ömik äseatons zü om.
„Ekoldätikol-li? o ‚Watson’!” äsagom.
„Nö! atos pekodon dub lutem venenöfik.”
„Cedob, das binon legudiko densitik is, pas nu emäniotol atosi.”
„Densitik-li!? Binon nesufovik.”
„Maifükolöd fenäti, täno! Äblibol pö klub olik dü del lölik, äsä küpob.”
„O ‚Holmes’ digik obik!”
„Gidetob-li?”
„Fümö! ab lio-li…?”
Äsmilom dö logod bluvik obik.
„Balugäl lejuitik olik, o ‚Watson’! bönon blesiri ad skilükön me ol fägis pülik obik, kelis labob. Söl detävom ün del reinöfik e slämik. Getävom ön stad leklinik soaro lenlabü hät e juks jünu nog glimiks. Kludo äblibom seimöpo laidiko dü del lölik. No labom flenis nilöfik. Kitopo üfo äkanom-li topön? Atos no klülon-li?”
„Si! atos bo klülon.”
„Vol fulon me dins klülik, kelis lenonikan küpon. Pö top kinik ästadob-li ma ced olik?”
„Pö top fümöfik, leigoäsä ob.”
„Taädo äbinob pö ‚Devonshire’.”
„Lanöfo-li?”
„Leso. Koap obik äblibon pö bradastul at, e zu, konstatob pidabiko, ifegebon kafakenis gretik tel e fegeboti nekredoviko gianiki tabaka moamü ob. Posä idegolol, ilesedob lü ‚Stanford’ ad kaed fa ‚Ordnance’[2] dila at maräda, e tikäl obik ävebon sus ut dü del lölik. Flätob obi, das edavestigob uti staböfiko.”
„Äsä büocedob, kaed gretamafädik-li?”
„Vemo gretamafädik.” Ämairölom dili bal ed äpladom oni love kien okik. „Is logol ziläki ebo uti, kel nitedon obis. Ekö! ‚Baskerville Hall’ zänodo.”
„Kobü fot zütopöl?”
„Leso. Büocedod, das lael taxudik, toä no pemalon me nem at, muton zugön ve lien at, äsä logol, detaflanü maräd. Grup smalik at bumotas is binon vilagil: ‚Grimpen’, kö zänabür flena obsik: dokan: ‚Mortimer’< topon. Äsä logol, us ninü raidasäktor mö liöls lul lödöps espeariköl te nemödiks komädons. Ekö! ‚Lafter Hall’ pö konäd pämäniotöl. Ekö! dom pemalon is, kel kanon binön lödöp natavana — üf memob verätiko — panemöla ‚Stapleton’. Ekö! farmadoms marädik tel: ‚High Tor’[3] e ‚Foulmire’[4]. Ön fagot mö liöls degfol de us fanäböp gretik di ‚Princetown’ topon. Maräd soalöfik nenlifik tenikon vü e zü tops espeariköl et. Kludo atos binon jenöp, pö kel lügadramat peplösenon, e pö kel kanobs-la koedön paplösenön oni nogna.”
„Top et binon-la natädik.”
„Si! züäd et binon digädik. Üf diab desironöv ad kompenön pö dunikam menas…”
„Klu ol it lüälol ad plänäd susnatik.”
„Kekodädans diaba kanons binädön me mid e blud, vo-li? Primo säks tel stebedons obis. Ut balid: va krim seimik piduinon-li valemo; ut telid: kis krim binon-li e lio at piduinon-li? Dido, üf nilud dokana: ‚Mortimer’ veräton, e tadunobs nämädis plödü lons natöfik Nata, täno vestig obsik finikonös. Ab bligidobs ad fiblufön hüpotetis votik valik, büä ugeikobs ad et. Anu färmükobsös fenäti at dönu, üf no dodol osi. Binos bisarik, ab cedob, das lutem densitik födon leküpäli me tik. Nog no nedob ninikön ini bog ad tikön, ab atos binon kludod tikavik cödotas obik. Äletikol-li dö jenot?”
„Si! ätikob nämöfiko dö on dü del lölik.”
„Ad kludod kinik ereafol-li tefü atos?”
„Binon vemo brulik.”
„Binon ebo somik. Nebaiäds dabinons pö din at. Samo votikam futanüpedotas. Lio plänädol-li atosi?”
„Hiel ‚Mortimer’ esagom, das etan äbegolom dili et laela su futofinots oka.”
„Te esösagom utosi, kelosi fopan seimik älesagon pö dasäkam vestigik. Kikodo men nedon-li begolön laeli su futofinots?”
„Kikodo-li täno?”
„Etan ärönom, o ‚Watson’! ärönom däsperiko, ärönom demü lif okik, ärönom jüs ikoedom spranön ladi okik ed ideifalom sui logod okik.”
„Ärönom… de kis-li?”
„Atos binon säkäd obsik. Jonäds dabinons, das man älienetom dub dred lebüä ijutedom ad rönön.”
„Demü kis kanol-li lesagön atosi?”
„Büfo niludob, das kodian dreda omik älügolon lü om vegü maräd. Üf äjenos ebo so, bi etos jinon mu kredabik, täno te men süeni oka iperöl ärönonöv de dom plas lü on. Üf temunod zigana veratonöv, täno ärönom, ävokädölo ad yuf, lüodü utöp, kö yuf töbo päspeton-la. Zuo kini ästebedom-li pö neit et, e kikodo ästebedom-li etani pö lael taxudik plas pö dom lönik?”
„Cedol-li, das ästebedom eki?”
„Äbinom bäldilik e malädülik. Kanobs büocedön, das äduinom spati soarik, ab glun äbinon luimöfik e neit mistomik. Binos-li kredabik, das äkanomöv stanön dü minuts lul u degs, äsä dokan: ‚Mortimer’, suemamod kelana binon plagälikum, kas klienoböv ad dasevön, ekludom se zen zigara?”
„Ab etan äsegolom ad spat alsoariko.”
„Cedob, das no ästebom-la alsoaro lä marayan. Güo notets dabinons, das ävitom marädi. Ab tü neit et ästebom us. Neit et äbinon lätik büä üdetävom lü ‚London’. Din fümikon pianiko, o ‚Watson’! Yumedikumon. E nu lovegivolös obe viäli obik, ed ozögobsös mediti fovik säkäda at sovüo jüs ukosädobs ko dokan: ‚Mortimer’ < e siör: ‚Henry Baskerville’ < ogödo.”
- ↑ Sevabo: lenlabölo (klotemi), Linglänapüko: ‚in’.
- ↑ Bür kaedidäsinik Britänik.
- ↑ Vödiko: „Belasömit geilik”.
- ↑ Vödiko: „Mar gagik”.
MAGODS.
[edit]
Se Vög Volapüka 2021, Nüm: 2, Pads: 17-18, Nüm: 3, Pads: 17-18, Nüm: 4, Pads: 34-35, Nüm: 5, Pads: 46-48.