Dog elas ‚Baskervilles’/Kapit folid
Kapit folid. Siör: ‚Henry Baskerville’.
[edit]Janeda⸗tab obsik pibemoükon göliko, e ‚Holmes’ lenlabü cemaklot ästebedom spikoti pipromöl. Dunetäbs obsik äbinoms kuratälik kol kolköm pirajanöl: dokan ‚Mortimer’ dugädü baonan yunik ikomikom ebo ven glok äkoedon tonön flapatonis deg. Lätikan äbinom man lövik, nämedik, dofalogik, labü bäldot yelas za kildeg, logabobs blägik densitik e logod fümälik komipiälik. Älenlabom klotemi redik lainodik, ed älabom skini raodik viene e sole pisufüköli äsva älifädom gretadili lifa okik dissiliko, ab ye bos äkomädon pö loged süenik omik ed okkonfid takedik kondöta omik, kelos äträton stimabani.
„Ekö! hisiör: ‚Henry Baskerville’ ”, dokan: ‚Mortimer’ < äsagom.
„Vö!” etan äsagom, „zuo binos bisarik, o söl: ‚Sherlock Holmes’, das üf flen obik no emobomöv ad visitön oli agödo, ukömoböv ito. Elelilob, das tuvedol rätilis, ed ekolkömob uti somik agödo, kel flagedon mediti vemikum kas kanob duinön one.”
„Begö! seidolös oli! o siör: ‚Henry’! Suemob-li veräto, das ol it ebelifol bosi küpädik, posä elükömol ini ‚London’?”
„Nos tu veütik, o söl: ‚Holmes’! Bo te cog. Äbinon pened at, üf daloy nemön oni penedi, kel ereafon lü ob agödo.”
Iseitom kövi sui tab, ed obs valik ibiegobs love on. Köv äbinon komunik, labü köl gedilik. Ladet: „Siöre: ‚Henry Baskerville’, lotidöp: ‚Northumberland’ ”< pipenon me tonats grobik; stäpedöma⸗mäk potik: ‚Charing Cross’ < e dät deseda: äsoar.
„Kin äsevon-li, das ölotedol pö lotidöp: ‚Northumberland’?” ‚Holmes’ äsäkom, älülogölo dudraniko visitani obsik.
„Nek äkanon sevön atosi. Isludikobs pas ven ikolkömob dokani: ‚Mortimer’.”
„Ab dokan: ‚Mortimer’, nendoto, ya ilotädom us?”
„Nö! älotob pö flen,” dokan äsagom. „Jonäd nonik mögik ädabinon, das ädesinobs ad vegön ini lotidöp et.”
„Soö! Seman labon-la demädi vemik tefü stanedi⸗cäns olik.” Äsüramenom se köv papürabledi telplifätik foldiliko pipliföli. Äsäplifom ed äplatükom oni su tab. Love zänod bleda set balik pifomon, binädöl me vöds bükik pötöfik, len ut pifimakleiböls. Et ästeton: „Üf no vilol läsükön duli lifa u sädalabön tikäli löniks, tän mutol dakipön oli fagoto de maräd.” Te vöd: „maräd”< pipenon me nig.
„Nu”, siör: ‚Henry Baskerville’ esagom, „bo ukonolös obe, o söl: ‚Holmes’! kisi atos sinifon-li, maleditilö! e kin so vemo nitedälon-li dö jäfs obik?”
„Kisi cedol-li dö atos? o dokan: ‚Mortimer’! Siol-li, das nos susnatik komädon pö atos alo?”
„Nö! o söl! ab luveratiko at pesedon fa utan, kel süadon, das jen binon susnatik.”
„Jen kinik-li?” siör: ‚Henry’ < esäkom japäliko. „Jinos lü ob, das ols: söls valik < sevols jäfis lönik obik gudikumo, kas ob.”
„Udagetol sevi obsik lebüä osegolol se cem, o siör: ‚Henry’! Promob atosi ole”, ‚Sherlock Holmes’ äsagom. „Anu geikobsös, dälü ol, lü doküm at vemo nitedik, kel bo pelauton e pesedon äsoaro. Labol-li eli ‚Times’ ädelik? o ‚Watson’!”
„Ekö! us pö spadül gulik.”
„Kanob-li begön ole oni: pad ninik, plidö! labü dugayegeds?”
Iluxamom oni vifiko, ädalogölo kolumis löpio e donio.
„Yeged cifik at dö ted lelivik. Letolsös obe ad nunädön setrati se on. „Kanol bleinälükön oli, das febäd u jäfüd oliks löniks postütedons me tarif jelätik, ab no mutol sädalabön tikäli, üf no vilol, dat lonilonam somik fino okoedon dakipön liegi fagoto de län, läsükön völadi nüveigas obsik e tän daduliko badükumön stadi valemik lifa pö nisul at.” Kisi cedol-li tefü atos? o ‚Watson’!” ‚Holmes’ älüvokädom yöbiko, koteno äröbülölo namis okik ta od. „Senäl binon süperik, vo-li?”
Dokan: ‚Mortimer’ < älogedom as sanan eli ‚Holmes’, e siör: ‚Henry Baskerville’ < älülogom obi me pär logas dofik ibluviköl.
„No nolob vemo tarifi e dinis somik”, äsagom, „ab jinos lü ob, das edeikobs boso de penot at.”
„Güö! cedob, das ereafobs ad lüod go verätik, o siör: ‚Henry’! ‚Watson’ sevom metodis obik mödikumo kas ol, ab dredob, das igo etan no edasuemom löliko sinifi seta at.”
„Nö! koefob, das no suemob yumedi.”
„Too, o ‚Watson’ digik obik! yumed is binon so klülädik, das din bal pesüramenon se votik. Els „Üf no vilol”, „lifa”, „sädalabön tikäli”, „löniks”, „dakipön”, „oli”, „fagoto de”. Nu suemols-li, kiöpao vöds at pedesumons?”
„Vö! gidetol! Kio letälenik atos ebinon!” siör: ‚Henry’ < ävokädom.
„Üf dots seimik mögik nog posblibonsöv, tän pamoükonsös fa jenöfot, das els: „üf no vilol”, „sädalabön tikäli” ä „fagoto de”< pesekötons löliko.”
„Benö!… atos fümiko binon soik!”
„Atos, o söl: ‚Holmes’! vo plueton valikosi, kelosi äkanob-la fomälön,” dokan: ‚Mortimer’ < äsagom, stuniko älulogölo fleni obik. „Äkanob lecedön utosi mögiki, das alikan notodonöv-la, das vöds licinons se gased; ab utos, das üfümükol kiniki, ed üläükol, das ebo se yeged cifik, binon bal dinas küpädikün, kelis föro äsevob. Lio edunol-li atosi?”
„Büocedob, o dokan! das kanol-li distükön krani nägära de ut läskiomana?”
„Go fümo.”
„Ab lio-li?”
„Bi atos binon löfäl bujäfüdik obik. Difs binons logädiks. Boms sus logakevs, gul logoda, blegod maxülik…”
„Vüo atos binon löfäl bujäfüdik obik, ä difs binons leigoso logädiks. Bai ced obik, difs so vemiks dabinons vü tonatots plumbik feinik yegeda se el ‚Times’ ed uts slapik se gased alsoarik suämü pänidalaf, leigoäs vü nägär e läskioman pro ol. Fümükam tonatema binon bal jäfüdas primöfikün krimavana, do mutob koefön, das balna, ven äbinob vemo yunik, icänidob eli „Godanunan: ‚Mercury’ di ‚Leeds’ ” ko „Nuns gödik vesüdänik”. Ab dugayeged ela ‚Times’ go distikon, e vöds at no kanons padesumön se bos votik. Bi atos piduinon ädelo, luverat vemik ädabinon, das ütuvoy vödis pö dabükot ädelik.”
„Üf suemob oli verätiko, o söl: ‚Holmes’!” < siör: ‚Henry Baskerville’ äsagom, „seiman eseköton nunedi at me jim…”
„Nueli⸗jim”, ‚Holmes’ äsagom. „Kanol küpön, das äbinon jim labü lam vemo brefik, bi sekötan ämuton dunön dukötis tel pö „fagoto de”. ”
„Verätö! Kludo seiman eseköton nunedi me jim labü lam brefik, ekleibon oni me kleibot…”
„Me gumäd Rabänik”, ‚Holmes’ äsagom.
„Me gumäd Rabänik sui papür. Ab vilob sevön: kikodo vöd: „maräd” < päpenonöv-li?”
„Kodä etan no äkanon tuvön oni pö bükot. Vöds valik retik äbinons geböfiks, e kanons patuvön pö bükot alik, ab „maräd” binon läs geböfik.”
„Ga sio, atos plänon osi. Edereidol-li nog bosi de nuned at? o söl: ‚Holmes’!”
„Is jons bal u tels binons, toä töbids lemuik peduinons ad moükön retodis valik. Küpedolös! ladet pepenon me penamamals raodik. Ab el ‚Times’ binon gased, kel selediko ereafon ini nams seimik pläamü uts menas benodugälik. Kanobs büocedön, kludo, das pened pilauton fa kulivan, kel ästeifon ad lüjinön äs lumen, e steif etana ad klänedön penäti lönik sinifon-la, das penät et kanon sevädön u sevädikön pö ol. Zuo küpedolös! das vöds no pelenkleibons ad kedet kuratik, ab das aniks stadons plu löpikumo ka votiks. Samo „lifa” stadon vemo fagiko de plad lönik gidöfik. Atos kanon jonön nekäli u jonon-la fäkädi e spidi pö sekötan. Vätälölo valikosi, lüälob ad ced lätik, bi säkäd klülädo äbinon veütik, e binos neluveratik, das lautan peneda somik äbinonöv nekälik. Üf etan äspidonöv, atos süükon säki nitedik: kikodo etan äspidon, bi pened alik pisedöl bü mugöd örivonöv siöri: ‚Henry’, büä üditom de lotidöp okik. Lautan ädredon-li tupi, e de kin-li?”
„Bo nu ereafobs ad räyun hüpotetas”, dokan: ‚Mortimer’ < äsagom.
„Luveratikumo ad räyun, kö vätälobs mögis e välobs kredabikünis. Atos binon gebäd nolavik fomälama, ab ai labobs stabi seimik dinik, dese kel primobs ad büocedön. Bo ustetol atosi as nilud, ab ti kredob, das ladet at pepenon in lotidöp.”
„Ma kis üfo kanol-li lesagön atosi?”
„If küpäliko udalogol nüpenädi, täno oküpol, das pen e nig bofiks ätupons pö penam. Pen telna ispränülon nigi love vöd ot, ed isägikon kilna pö ladet brefik, jonädölo, das nigiär älabon nigi vemo nemödiki. Peni e nigiäri lönikis nesuvo leadoy binön pö stad somik, zuo kobojen döfas penamastömas tel muton binön vemo seledik. Ab sevol, das nigiär e pen lotidöpiks selediko binons votiks. Si! ti no zogob ad lesagön, das üf kanobsöv nülogön rägabäsetis lotidöpas zü ‚Charing Cross’, sovüo jüs utuvobs retis dugayegeda pesädeköl ela ‚Times’, täno nemediko okanobsöv fanön utani, kel esedon nunedi patik at. He! He! Kis atos binon-li?”
Älülogetom küpäliko papüri, sui kel vöds pilenkleibons, äkipölo oni ön fagot mö puids tel u bal de logs okik.
„Kis-li?”
„Nos”, äsagom, ädojedölo eti. „At binon bled lafik vagik papüra, igo nen vatamäks[1] su ut. Cedob, das ekludobs valikosi mögöl se pened bisarik at; e nu, o siör :‚Henry’! bos votik nitedik ejenon-li pö ol, sisä ekömol ad ‚London’?”
„Nö! o söl: ‚Holmes’! Nos cedü ob.”
„No äküpedol-li seimani, kel äsökon ud älükon oli?”
„Jinos lü ob, das ereafob ebo ad zänod jenas pö jodabuk”, visitan obsik äsagom. „Kikodo üfo seiman muton-li sökön u lükön obi?”
„Ebo nu nilikobs äl atos. Labol-li nosi ad nunädön obes, büä obejäfobs dini at?”
„Atos sekidon de utos, kelosi cedol mäniotadigädiki.”
„Cedob valikosi plödü jenäd komunik lifa mäniotadigädiki.”
Siör: ‚Henry’ < äsmilom. „No nog sevob mödikosi dö lif Britänik, bi älifädob lifatimi obik ti fuliko pö Tats[2] e Kanadän. Ab spelob, das ad sädalabön bali jukas oyik no binos dil leoda aldelik is.”
„Eperol-li bali jukas olik?”
„O siör löfik obik!” dokan: ‚Mortimer’ < ävokädom, „eti te epölaseitoy-la. Otuvol eti, posä ugekömol ini lotidöp. Frut kinik binos-li ad böladön söli: ‚Holmes’ me näidins somik?”
„Ga ebesäkom obi tefü valikos plödü jenots aldelik.”
„Vö!” ‚Holmes’ äsagom, „igo if jenot lüjinon äs fopik. Esagol-li, das iperol bali jukas olik?”
„Si! ab mögädo ipölaseitoy oni. Ipladob bofikis plödü yan äneito, e te bal onas äbinon agödo us. No ikanob dagetön pläni atosa de hilepul, kel klinükom onis. Badikünos atosa binon, das iremob päri brefobüo äsoaro pö süt: ‚Strand’< e neai älenükob.”
„Üf neai ilenlabol onis, kikodo äpladol-li onis plödio ad paklinükön?”
„Äbinons juks braunataenik e neai päglodons. Kodü atos ipladob onis plödio.”
„Äsä esuemob, pos köm olik ini ‚London’ ädelo, imotevol-li sunädo ed iremol päri jukas?”
„Iremob mödikosi. Dokan: ‚Mortimer’ < ädugädom obi. Suemolös, üf obinoböv glunidalaban us, täno mutob labön klotamamodi gidöfik, ab äbinob-la nekälik tefü klotem obik ünü lifatim pö vesüdän. Bevü klots votik iremob jukis braunataenik at, efe ipelob dolaris mäl[3] tä uts, e bal onas pitifon büä ülenükob onis nemu balna.”
„Binos-la bisarik ad tifön dini negebovik somik”, ‚Sherlock Holmes’ äsagom. „Koefob, das baicedob ko dokan: ‚Mortimer’, das juk emoiköl putuvon pos brefüp.”
„E nu, o söls!” baonan äsagom, äfümälölo, „lüjinos lü ob, das go saido enotükob utosi nemödik, kelosi sevob. Timül ekömon, dat oledunols promi olsik e lölöfo ununols obe utosi, kelosi obs valik diseinobs.”
„Flag olik binon go gitöfik”, ‚Holmes’ ägesagom. „O dokan: ‚Mortimer’! cedob, das buiküno okonolös konoti olik, leigoäsä ekonol uti obes.”
Flen nolavik obsik, somo pikuradüköl, äseramenom papüris okik se pok lönik ed äleblünom jeneti lölik, leigoäsä iduinom tü göd büik. Siör: ‚Henry Baskerville’ < älelilom vemo küpäliko, lunomiko ävokädölo demü stun.
„So ejinob-la gerön pöni,” äsagom, posä kon lunik pifinükon. „Ga sio älelilob dö yagadog ya sisä äbinob cil. Äbinon konot pälöföl famüla, fe neai fefiko äträitob oni büіko. Ab tefü deadam zioma obik, atos valik nu äsva pülsifon ninälü tikäl obik e no nog kanob sumodön atosi kleiliko. Ols it jinols zogön: va jenet at duton-la lü jäfüd poldana u pädana.”
„Vö!”
„E zuo din at tefü pened lü ob pö lotidöp. Niludob, das atos i tefon säkädi valemik.”
„Jinos, das seman nolon-la mödikumosi ka obs dö utos, kelos jenon pö maräd,” dokan: ‚Mortimer’ < äsagom.
„Kludo”, ‚Holmes’ äsagom, „seman at no neflenon kol ol, bi nunedon oli dö riskäd.”
„U mögos, das vilon, demölo diseinis lönik, dejeikön obi.”
„Fe atos i mögon. Danöfob vemo kol ol, o dokan: ‚Mortimer’! das edäpol obi ön säkäd, kel gebidükon tuvedotis nitedik ömik. Ab säkäd dranöfik, tefü kel nu mutobs sludön sökölosi, o siör: ‚Henry’! va binos-la frutik pro ol u va no ad tävön lü ‚Baskerville Hall’.”
„Kikodo no utävoböv-li?”
„Jinos, das binos-la riskädik us.”
„Diseinol-li riskädi de milanan famülik at, u diseinol-li riskädi de dabinäds menik?”
„Ebo atosi omutobs daseivön.”
„Alo gespik obik binon nevotöfik. Diab nonik pö disvol, o söl: ‚Holmes’! e men nonik pö vol dabinon, kel kanonöv neletön obe ad tevön lü davedöp röletanefa obik, e kanol cedön atosi as gespik obik fifümik.” Äfronükom logabobis dofik okik, e logod omik ädindunaredikon, du äsagom. Äklülädos, das ladäl fäkädälik elas ‚Baskervilles’ no imoikon pö licinan lätik onas. „Vüo”, äsagom, „no älabob timi saidik ad fi⸗tikädön valikosi, keli ekonols obe. Binos fikulik ad dasuemön lekläravifiko oni e sludikön. Viloböv labön düpi nemu bali ad ito sludikön. Anu, o söl: ‚Holmes’! binos düp: degbal e laf, ed anu devegob lü lotidöp obik. Ol e flen olik: dokan: ‚Watson’ < no dodolsöv-li ad visitön obis e koledön kobü obs tü düp: tel? Täno okanob-la nunädön oles fümikumo, vio din at lüjinon lü ob.”
„Atos pötöfon-li pro ol? o ‚Watson’!”
„Fümö!”
„Täno ospetolös obis. Ubüedoböv-li kömön loatavabi?”
„Ubuükumob ad spatön, posä din at efäkädükon obi.”
„Blesiro okedugob oli pö spat”, kompenan omik äsagom.
„Täno ukobikobs dönu tü düp: tel. Dönulogö! e gödi gudik!”
Älielobs nexänön stepis visitanas obsik ve tridem e poso dumodön domayani. Dü timül ‚Holmes’ icenom de teoran koveniälik ad men vilälik.
„Lenükolöd häti e jukis olikis, o ‚Watson’! vifö! Timül lenonik muton paperön!” Isejutedom ini cem omik, älenlabölo cemakloti, e pos sekuns anik igekömom, älenlabölo leguni. Äspidölo inexänobs kobo ve tridem ed isegolobs ini süt. Dokan: ‚Mortimer’ < e ‚Baskerville’ nog älogädoms pö fagot mö louns ze teltum fo obs lüodü süt: ‚Oxford Street’.
„Ulürönoböv-li nilikumio e täno ustöpobös-li etanis?”
„Lenö! o ‚Watson’ digik obik! Sog olik go kotenükon obi, üf osufädol uti obik. Flens obsik binoms dinöfäliks: verato göd go pöton ad spat.”
Ävifikumom jüs lafo iläsükobs fagoti ad etans. Pas täno, ai nog äblibükölo obis pödo pö fagot mö louns tum, äsökobs etanis ve süt: ‚Oxford Street’ e poso ve ‚Regent Street’ äl zänod zifa. Ven flens obsik istopoms ed älogetoms da vitür selidöpa, ‚Holmes’ sunädo ibitom leso. Pos timül lekoteniko ivokädom nelaodiko, ed, ifi⸗sökölo lüodi nülogeta spetätik omik, iküpob, das bökavab telluibik labü men nino, istopöl len flan süta visoik, anu dönu äföfiomufon nevifiko.
„Ekö! men obsik, o ‚Watson’! Sögolobsöd! Olülogedobsös omi, üf no kanobs dunön mödikumosi.”
Tü timül ot äküpälob, ad balib blägik densitik e pär logas dudranik, kels älüodikons lü obs da flanafenät vaba. Sunädo keutakläped löpik ilöpiofliton, bos pivokädon bökane, e vab ärönon jutölo donio ve süt: ‚Regent Street’. ‚Holmes’ däsperiko äzilogedom sukölo votiki, ab vab labülabik nonik äkomädon züo. Täno äjutedom ad dayag zänodü flum dakosädik, ab devegam vaba äbinon tu vemik, e vegöm ya änelogädikon plödiü portat logama obas.
„Ekö!” ‚Holmes’ äsagom biedäliko, heköl e vietik dub skan äsekömölo se flum vabas. „Mifät e neskil somiks sovemiks ädabinons-li föro? O ‚Watson’! o ‚Watson’! üf binol men ritik, unüpenolös id atosi leigo ko plöps obik!”
„Kin äbinon-li men et?”
„No sevob atosi.”
„Lükan-li?”
„Si! klülikos sekü utos, kelosi älelilobs, das ‚Baskerville’ päküpedom kläno fa ek sisä äkomom in zif. Lio voto isevedikoyöv-li so vifiko, das ivälom ebo lotidöpi: ‚Northumberland’? Üf etans äküpedons omi ün del balid, äbüocedob ma atos, das öküpedonsös omi id ün telid. Bo äküpol, das äspatob telna lü vitür, du dokan ‚Mortimer’ äreidom konädi okik.”
„Si! memob atosi.”
„Äselogob zitevanis pö süt, ab älelogob noniki. Bejäfobs meni visedik, o ‚Watson’! Din at binon vemo plödakösömik, e toä no nog edasuemob fifümiko: va binon faktor, ko kel kosikobs, plitiälik u badivilik, ai seivob nämädi e desini. Sosuvä flens obsik imogoloms, äsögolob omis‚ spelölo ad belükön dugädani nelogädik utanas. Äbinom so lekäfik, das no älekonfidom futis okik, abgüä ägebom vabi, dat ökanom sötevön pödü u jutedön bei oms e so no leadön küpön utanis omi. Mod omik älabon buädi zuik, das üf ögebomsöv vabi, öbinomöv ya blümik ad sötevön pödü utans. Ye älabon döfi bal klülik.”
„Reifon omi ini nämäd vabana.”
„Vö!”
„Kio pidabik binos, das no edagetobs nümi!”
„O ‚Watson’ digik obik! äbinob neskilik, ab ga no niludol-li fefiko, das änekälob ad dagetön nümi? Ekö! 2704 tefon meni obsik. Ye atos binon nenfrutik anu.”
„No kanob magälön, kisi zuik äkanolöv dunön.”
„Bisü küped vaba, ösötob güflekön obi e gegolön. Pas täno ömutob, no spidölö, loatön vabi e sövegön po balid pö fagot vemik, u, buikumo, vabön lü lotidöp: ‚Northumberland’ < e stebedön us. Pas ven nesevädan obsik üfi⸗sökon eli ‚Baskerville’ jüi lotidöp, ölabobsöv pöti ad cütön omi me mod omik, ölükölo kiöpio ölütevom poso. Nü, dub spidöf nesüenik, kel pifrutidon fa taan obsik me skiläd e viläl plödakösömiks, iträtobs obis ed iperobs meni obsik.”
Timü spikod at äspatobs nevifiko donio ve süt: ‚Regent Street’, e dokan: ‚Mortimer’ < kobü tävakompenan omik ya bü lunüp inepubom fo obs.
„No nedobs sökön omis”, ‚Holmes’ äsagom. „Späk emovegon e no ugeikon. Mutobs dalogön: buädis kinik labobs < e fümädiko jäfidükön etis. Kanol-li süadön tefü logod mana et ninü loatavab?”
„Kanob süadön te dö balib.”
„I kanob lesagön te leigo; se kelos kludob, das mu niludo ut äbinon dobik. Men visedik pö dünet so riskülik no gebonös balibi pläsif klänedon logodalienädis lönik. Isiö! o ‚Watson’!”
Änükömom ini bal sedabüras ziläkik[4], kö päbenogetedom fa büracif.
„Ag! o ‚Wilson’! logob, das no eglömol jeneti pülik, pö kel älabob benopöti ad yufön oli?”
„Nö! o hisiör! fe no glömob atosi. Espalol benorepüti obik, e bo lifi obik.”
„O flen digik obik! tuükol atosi. Mebob, o ‚Wilson’! das bevü hipuls olik älabol hibalani nemü ‚Cartwright’, hikel äjonom fägi pö vestig.”
„Si! o hisiör! ai nog blibom lä obs.”
„Kanol-li büedön kömön omi? Danö! Zuo ofredoböv ad cänön bankazöti at völadü pouns lul.”
Hiyunan bäldotü yels degfol, labü logod sagatik, ilobedom büadi büracifa. Nu ästanom, älogetölo ko piet vemik lü täktifan famik.
„Givoyös obe eli „Registar lotidöpik” ”, ‚Holmes’ äsagom. „Danö! Ekö! o ‚Cartwright’! nems lotidöpas teldegkil komädons is, valikas nemediko nilü ‚Charing Cross’. Logol-li?”
„Si! o siör!”
„Ovisitolös valikis etas balposvotiko.”
„Si! o siör!”
„Alna oprimolös me giv jilida bal yanane. Ekö! jilids teldegkil.”
„Si! o siör!”
„Osagolös etane, das vilol dalogön moükoti papürik ädelik. Okonolös, das telegrafot veütik peblinon lü ladet pölik, e das sukol uti. Suemol-li?”
„Si! o siör!”
„Ab jenöfiko osukolös padi zänik ela ‚Times’ labü hogs anik pö et me jim pesekötöls. Ekö! kopied ela ‚Times’. Pad at zesüdon. Okanol memosevön oni fasiliko, vo-li?”
„Si! o siör!”
„Pö jenet alik yanan olesedon lü vestibülan[5], kelane leigo ogivolös jilidi. Ekö! jilids teldegkil. Tän pö jenets bo teldegs bevü teldegkils oklülädos, das moükot etdelik ya pufilükon u pumoükon. Pö jenets kil votik odajonoy ole kumi papürik, ed osukolös padi at ela ‚Times’ pö on. Mögods mu nevemiks dabinons, das utuvol oni. Ekö! jilids zuik deg ifü jenets no peniludöls. Ununodolös pro ob in ‚Baker Street’ me telegrafot bü soar. E nu, o ‚Watson’! te dutülos lü obs ad datuvülön me telegraf dientifi loatavababökana labü nüm: 2704, e pas täno unükömobsös ini bal pänotamusedas pö süt: ‚Bond Street’< ed olifädobsös timi jüs onedobs vegön lü lotidöp.”
- ↑ Ü: filegran. Deutänapüko: ‚Wasserzeichen’, Linglänapüko: ‚watermark’.
- ↑ Tats pebalöl Lamerikäna.
- ↑ Suäm at nu baiädonöv ko dolars zao tumluldegs.
- ↑ sedabür ziläkik = ‚district messenger office’.
- ↑ vestibülan = ‚hall porter’.
MAGODS.
[edit].jpg)
Se Vög Volapüka 2021, Nüm: 8, Pads: 81-83, Nüm: 9, Pads: 92, Nüm: 10, Pads: 99–100, Nüm: 11, Pads: 106–107; 2022, Nüm: 2, Pads: 15-16, Nüm: 3, Pads: 19-20, Nüm: 5, Pads: 40–41.
Yel: 2021. Nüm: 8. Pads:81–83. Nüm: 9. Pad: 92. Nüm: 10. Pads: 99–100. Nüm: 11. Pads: 106–107. Nüm: 12. Pad: 120. Yel: 2022. Nüm: 2. Pads: 15–16. Nüm: 3. Pads: 19–20. Nüm: 4. Pads: 27, 34. Nüm: 5. Pads: 40–41.