Djë t’ vwè volti, më p’tët Mélin

From Wikisource
Jump to navigation Jump to search
Ôtès modêyes : Rifondant namurwès
Djë t’ vwè volti, më p’tët Mélin
by Jacques Desmet
Schoûtez Jaques Desmet lu-minme.

Djë t’ vwè volti, më p’tët Mélin

On n’ cause pës waîre lë walon dins nosse Walonîye,
Ël-èst tot jësse bon à-z-aurder dins lès viserîyes.
Së place d’asteûre, c’è-st-au muséye Guggenheim.

Co saquantès djins qu’èl djaurgonenèt au Wisconsin,
One brèssîye qu’èl law’taiyenèt à Mélin :
Zèls èvôyes, ë sèrè spèpyi adlé Guggenheim.

Nos-ârans pièrdë lès paroles da nosse mame ;
Véngt-ans ? Cénquante ? Ë sèrè djës,
C’èst nos racënes qu’on arè pièrdë.

Mins më, djë n’èl rovîyerè jamais,
Jësqu’à m’ dairëne blame,
Djë causerè come nosse mame.

On m’ pëdrè quéquefîye por on dinosaure,
On d’mé-cougni, one bièsse à paurt,
Auyenéye dins l’aléye da Guggenheim…

Lë cë quë vos min.n’rè, vos dirè :
« C’èst tot ç’ quë d’mère dès Walons,
Audjoûrdë : ë n’a pëpont,

Së vos voloz co l’ ètinde causer,
Vos d’vroz nachi po-z-è trover…
Quéquefîye bén qu’à Mélin,

Vos l’ètindroz co tchanter. »
« Compëdroz co s’ tchanson,
À l’ rakëlot dè Walon ? »

Ë vos dirè :

Djë t’ vwè volti, më p’tët Mélin,
Tote më djon.nèsse i è-st-au r’cwè,
Më dîros bén ? Sés bén poqwè ?
Pace quë t’-m’as bèrci dins tès brès !

Djë t’ vwè volti, më p’tët Mélin,
Lûrot-ë co lès sèpt solias,
Lë plaîve tchaîrot co à sayas,
C’è-st-adlé twè quë dj’ so-st-au mia,

Bondjou, frérot ! Bondjou, gamin !
Vos v’s-è sov’noz dè l’ mai d’ nosse man,
Vos v’s-è sov’noz dè l’ gout d’ nosse pwin,
Quand on d’mèréve co à Mélin !

Qu’on s’assayîve à prëstë l’ pausse,
À machi l’ bëré èt lès guèsses,
Avou nos p’tëtès pougnes totes crausses,
Sayant d’ aîdi à fé soperèce.

On arot dët come s’on d’jéve mèsse,
Vos v’s-è sov’noz d’ sès doucès djèsses,
Qu’on avot co nos tâyes dë wèsse !
Èt qu’on vëkéve co à Mélin !

Quand on avot co nos bèlès croles,
Vos v’s-è sov’noz d’ sès doucès paroles,
Qu’èle dëjéve po nos rapauji
Quand nos-èstîn naujis.

Combén d’ côps avans-n’ sèmé lès wadjes,
Fait dès loyéns avou dès twatches,
Satchi l’ lacia au pés dès vatches,
Quand on vëkéve co à Mélin.

Bondjou, gamin, bondjou, frérot !
Por më, ë m’ chone quë dj’ i so co,
Vos v’s-è sov’noz dès tch’vaus d’ nosse pa
Qu’ë faléve min.ner au cwârdia ?

Nos véyîn volti lès stindéyes,
Sogni à r’laye po lès dinréyes,
Nos-ascauchîn totes lès chavéyes
Quand on-asplanéve tot Mélin.

Tot ç’ quë nosse pa nos-a aprins,
Tot ç’ quë nosse man nos-a aprins,
C’èst d’ travayî po l’ lèddëmwin,
C’èst d’ causer à môde dë djint.

Por më, të d’meûres todë l’ pës bia
Djë vou fé soyë qu’on t’èl dîye
Djë sèrè r’machi à t-y-aurzîye,
Pa d’zeû nosse man, pa d’zeû nosse pa,

Au d’ bout d’ mès rôyes, djë m’ènn’irè avou m’ lingadje,
Djë sèrè l’ daîrén, djë wadje !…
Po lès daîrënès s’minces quë dj’arè sèmé,
Djë lairè m’ place à qui mèch’ner…


CC SomeRightsReserved.png
Cc-by white.svgCc-sa white.svg
This work is licensed under the Creative Commons Attribution-ShareAlike 3.0 Unported license.