Deujhinme lete sint På ås djins d’ Corinte/XI

From Wikisource
Jump to navigation Jump to search
Deujhinme lete sint På ås djins d’ Corinte (2017—2020) 
Sint På, translated by Lucyin Mahin
XI

Onzinme tchaptrê

1. Sobayî si vos m’ lairîz dire ene miete des biestreyes. Alez, s’ i vs plait !

2. Paski dji so djalot d’ vozôtes, come li Bon Diu el sereut, ca dji n’ vos a lai hanter k’ on seu galant, po vs prezinter a Djezus come ene båshele etire.

3. Mins nerén, a môde do sierpint k’ edoûla Eve avou ses toûs d’ rossea tchén, dj’ a sogne ki vos idêyes n’ alexhe foû voye, et cwiter li peur messaedje da Djezus-Cri.

4. Paski, s’ i gn a des cis ki vos vegnnut acsegnî èn ôte Djezus ki l’ ci ki nos vs avans acsegnî, u ki vos fwaiynut rçure èn ôte Sint Spér ki l’ ci ki vos avoz ddja rçû, u ki vos mostrèt ene ôte evandjîle ki l’ cene ki vos avoz ddja accepté, vos vos metoz a les shuve raddimint assez, candjant d’ idêye come di tchmijhe.

5. Portant, dji n’ a nén l’ epinse ki dj’ so pus biesse ki ces djins la, ki s’ creyèt pus maléns k’ mi.

6. Cabén ki dj’ fouxhe ene miete fayé cwand dji cåze, c’ est nén po ça ki dji n’ so nén sûti; dji vos l’ avans mostré pus d’ ene feye, dins totes sôres di pondants et djondants.

7. Oudon-bén, est ç’ petchî di s’ awè abaxhî po vos sorlever, poy ki dji vos a pretchî l’ evandjîle da Djezus sins m’ fé payî ?

8. Dj’ a profité des åmonnes di des ôtès Eglijhes, ki m’ ont payî, zeles, por mi vos poleur vini siervi.

9. Et cwand dj’ esteu avou vozôtes, et k’ dj’ aveu dandjî d’ çanses, dji n’ a rén dmandé a nolu, puski c’ est les frés ki vnît del Macedwene ki m’ ont recwårlé. Adon, dji m’ a rastrindou, et dji m’ rastrindrè co, por mi n’ nén-z esse ene tchedje po vozôte

10. Pal peure verité do Criss ki dj’ poite e mi-minme, dji pou esse fir di çoula, et nouk ni mel prindrè, et tote l’ Acayeye el sårè.

11. Paski pocwè ? Paski dji n’ vos viereu nén voltî ? Mondju todi ! Li Bon Diu sait bén k’ ci n’ est nén l’ veur, mafrike !

12. Et çou ki dj’ fwai pol moumint, dji continouwrè a l’ fé a l’ avni, po rtaeyî les poretes azès cis ki s’ vantèt d’ esse meyeus k’ nozôtes po pretchî – cwand on vout bate on tchén, on trove todi bén on baston !

13. Paski, inte di nozôtes soeye-t i dit, ces djins la, c’ est des fås-djudas, des wachoteus ki s’ diguijhnut a dicipes di Djezus-Cri.

14. Çoula n’ est nén si sbarant k’ ça, puski Satan lu-minme s’ a ddja dguijhî e s’ abiyant a andje di loumire.

15. Adon, ci n’ est nén ewaerant ki ses siervants, zels avou, si dguijhexhe a siervants do droet tchmin. Mins i finixhront come i l’ meritèt; si seront i pûnis po leus målès keures.

16. Djel ridi co: ni leyîz nén les djins croere ki dj’ so fô; mins metans ki vos m’ prindrîz vormint po on sot, adon, acceptez mu pår come on sot, po ki dj’ poye, mi eto, mi recrester ene miete.

17. Çou ki dj’ di franc batant, dji nel di nén come li Signeur l’ åreut yeu dit, mins come on dmey doûs el direut.

18. Pusk’ i gn a tant des djins ki s’ vantèt d’ leu ritchesse, asteure, dji va fé di m’ nez del minme manire ki zels.

19. Ca vos edurez bén les wargnasses, vozôtes k’ est saedje.

20. Et sopoirter, sins mouvter, cwand onk vos fwait bate l’ aiwe, u vos vni magnî vosse sope, u profiter d’ vozôtes, u vos dire des påters di bourike, u vos fote on pougn e l’ gueuye.

21. Målureuzmint, djel doe bén ricnoxhe, dj’ avans stou des coyons et des schitåds. Mins si ene sakî d’ ôte si vante d’ ene sacwè – dji djåze co la come on loigne – mi ossu, dji m’ è vantrè sifwaitmint.

22. I sont-st Ebreus? Mi avou ! I sont-st Israyelites ? Mi ossu. I sont dischindants d’ Abråm? Mi eto.

23. I sont des siervants da Djezus-Cri. Dji vå mî k’ zels di ç’ costé la – cial, dji fwai co di m’ yane – si a dju-st ovré bråmint dpus k’ zels, ey esse reclôs pus sovint k’ zels, ey esse bouxhî ostant d’ feyes ki dji n’ les contreu ddja, kécfeye batou a moirt.

24. Pa cénk feyes, dj’ a stî scoryî påzès djwifs, des cwarante côps di scaswere moens onk.

25. Pa troes côps, dj’ a stî dôpiné a côps d’ baston; on côp, on m’ a caloné d’ pires; troes feyes, mi batea a-st efondré, et mi dmorer on djoû ey ene nute so ene naivlicote, e plinne mer.

26. Estant todi so tchamp so voye, dj’ a schapé ås grossès aiwes, ås hapeus d’ boûsse, a mes prôpès djins ki m’ véyént evi, ås etrindjirs ki m’ retchessént; dj’ esteu strindou d’ peu ostant dins les veyes ki dins les viyaedjes et les tchamps; dj’ a yeu des serådes so les bateas tins des timpesses, ostant k’ a cåze des fås frés;

27. dj’ a bouté et rinde do må, sovint sins poleur doirmi m’ sô, sovint e crevant d’ fwin et d’ soe, dins l’ froedeur et rén so m’ dos.

28. Ey al copete do martchî, gn a l’ angoxhe di tos les djoûs po sawè çou k’ divnèt totes mes Eglijhes.

29. S’ end a onk ki s’ sint flåwe, dji m’ sint flåwe avou lu; s’ end a onk ki tome al tere, dji m’ è fwai do må.

30. Si dji doe bråcler, adon, dji frè di m’ gueuye – såf respet – so des sacwès ki mosternut m’ fweblesse et m’ flåwisté.

31. Diu l’ Pere – k’ i soeye beni disca todi et po todi – i sait bén, Lu, ki dji n’ conte nén des mintes.

32. A Damasse, li govierneu do rwè Aretasse essera li veye di Damasse po m’ poleur ramasser

33. mins on m’ dischinda foû pa ene finiesse, dins on tchena, et c’ est insi ki dj’ lyi schipa foû des mwins.