Deujhinme lete sint På ås djins d’ Corinte/VIII

From Wikisource
Jump to navigation Jump to search
Deujhinme lete sint På ås djins d’ Corinte (2017—2020) 
Sint På, translated by Lucyin Mahin
VIII

Ûtinme tchaptrê

1. Vos, mes frés, nos vlans sawè cwè rapoirt a l’ åjhmince ki l’ Bon Diu a dné ås Eglijhes di Macedwene;

2. Paski, mågré totes les eguegnes k’ elle ont rescontré et mågré k’ leu djins n’ avént rén, elle ont todi mostré djoye et contintmint, et on î a todi stî rçû avou les cosséns so les xhames;

3. Dji vos l’ pou acertiner : i nos ont dné tot çou k’ il avént, et pår çou k’ i n’ avént nén, et l’ epronter po nozôtes.

4. et nos hairyî po poleur diner leu ptit scot el tcharité ki nos portchessans po les dicipes.

5. ca i n’ ont nén seulmint dné leu pårt, come nos l’ rawårdéns, mins i s’ ont dné tot etirmint å Signeur, pu a nozôtes, ‒ çoula, pal volté do Bon Diu.

6. Ça fwait ki nos dmandîs a Titusse di porshuve emon vozôtes ciste ouve di bénfjhance la, poy ki c’ est lu k’ aveut-st ataké cisse bouye la.

7. Come vos estoz al copete del schåle po totafwait: pol fwè, po l’ cåzaedje, pol syince, pol coraedjeusté dins tos les dominnes, et po vosse vir-voltî eviè nozôtes, sayîz d’ fé parey dins ciste ouve di tcharité la.

8. Dji vs di çoula sins vs kimander, mins po mostrer ås djins ki vosse vey-voltî po nozôtes est vraiy et veritåve.

9. Poy ki vos cnoxhoz les cwålités di nosse Signeur Djezus Cris, lu ki, estant ritche, divna pôve po vozôtes, çoula po k’ vos polîxhe divni ritche tot s’ rashiant so s’ pôvurté.

10. Et dji vos va la dire li minne, platezak: çoula vos serè rindou å dobe et å radobe, vozôtes k’ a-st ataké a fé cist ovraedje la, gn a ddja èn an did ça, nén paski vos î årîz stî oblidjîs, mins avou l’ rafiya del fé.

11. Adon, finixhoz lu come vos l’ avoz cmincî ; insi, tot come vos avîz bon d’ aveur håsse del fé å cmince, vos seroz mo binåjhes di l’ aveur tot fwait.

12. Paski, si vos estoz presses a l’ fé, vosse boune volté serè bénvnowe, avou les moyéns do bôrd, come di djusse, nén les cis ki vos n’ avoz nén.

13. I n’ est nén d’ kession di vos mete dins l’ imbaras po solåcyî les ôtes ‒ nonna ca nonna ‒ ,

14. mins come vos avoz po fé di ces tins ci, et k’ zels ont dandjî, tuzez k’ on bea djoû, motoit, c’est zels k’ åront di cwè vos rinde çou k’ vozôtes, vos åroz mezåjhe, et sifwaitmint, i s’ åront racwité.

15. Insi k’ il a stî scrît: « Gn a des cis ki ramassèt toplin, et k’ i nelzî dmeure djamåy rén, et des cis ki spårgnèt mastoke pa mastoke, et k’ ont djourmåy po fé. »

16. Ki l’ Bon Diu fouxhe rimerciyî, lu k’ a metou dins l’ cour da Titusse li minme boune volté ki l’ cene ki dj’ aveu po vozôtes.

17. Ca i n’ a nén fok respondou a nosse dimande, mins lu-minme estant mo voltrûle, il a prind l’ voye sins k’ on lyi ridmande

18. Avou lu, nos evoyans nosse fré k’ a divnou fén rlomé avå totes les Eglijhes pask’ il est foirt capåbe po pretchî l’ Evandjîle.

19. Et ci n’ est nén tot: il a ossu stî relî pa les Eglijhes po nos acpagnter so nosse voye po rimpli nosse mission pol glwere do Signeur lu-minme, et po vos mostrer nosse boune chôze.

20. Nos fjhans insi po n’ nén esse barboté d’ awè portchessî ostant ki nos l’ avans fwait.

21. ca nos avans l’ dår di dmorer des pus oniesses, nén seulmint ås ouys do Signeur, mins eto ås ouys des djins d’ nos djins.

22. Et c’ est po ça ki nos evoyans avou zels ci fré la ki nos avans asprové, et todi trové sins rprotche dins tos les dominnes, et k’ est co asteure pus voltrûle ki djourmåy, pask’ il a pår fiyate a vozôtes.

23. Tant k’ a Titusse, c’ est m’ copleu et mi aidant, et c’ est tot benefice po vozôtes. Pareymint po nos ôtes frés ki sont les messaedjîs des ôtès Eglijhes, ki c’ est l’ glwere do Criss.

24. Bén dabôrd, ci côp ci, dinez ås Eglijhes li prouve ki vos estoz midones, et mostrez lzî ki dj’ avans bén råjhon di vos vanter tofer.