Deujhinme lete sint På ås djins d’ Corinte/VII

From Wikisource
Jump to navigation Jump to search
Deujhinme lete sint På ås djins d’ Corinte (2017—2020) 
Sint På, translated by Lucyin Mahin
VII

Setinme tchaptrê

1. Puski dj’ avans cisse prometance la, rapurans nos di totes les toursiveuzreyes do coir et do tuza, po-z avinde pår li sintté, tot rcrindant l’ Bon Diu.

2. Fijhoz nos ene plaece dins vos cours. Ca nos n’ avans fwait do toirt a nolu; nos n’ avans splawné nouk; nos n’ avans profité d’ persoune.

3. Dji n’ di nén çoula po vs codåner, dismetant ki dji vén d’ dire enawaire ki vs serîz dins nos cours tant k’ nos vicrans, et minme après, si nos morans.

4. Dj’ a pår fiyate dins vozôtes, et dji so carapmint fir di vozôtes ; dji so fén ricfoirté, plin d’ djoye mågré totes nos rascråwes.

5. Paski, dispu k’ dj’ avans-avnou e l’ Macedwene, nos tcherpintes ni s’ ont nén rispoizé ; nos esténs catibulés tocostés : si dveur bate difoûtrinnmint, et n’ pont fé d’ bén divintrinnmint.

6. Mins l’ Bon Diu, ki solåceye les cis ki sont djus, nos a rconsolé avou l’ arivêye da Titusse.

7. et nén fok pa si arivêye, mins copurade pal binåjhté da Titusse lu-minme cwand i m’ djåzéve di vozôtes : di vos djeriaedjes, di vos ploraedjes, di voste atimprance por mi, tantea ki dj’ end a stî tot mouwé.

8. Paski, minme si dji vs a ene miete coixhî avou m’ lete, dji nel rigrete nén – mågré k’ djel rigretaxhe ene miete paski cisse lete la vos a poenné, cabén djusse po on court moumint

9. Tot conté tot rabatou, dji so binåjhe, nén paski dji vs a metou dins l’ penin, mins paski cisse poenne la vos a moenné a vos rpinti; paski vos avou bén sintou ki c’ esteut l’ Bon Diu ki vos fjheut des rprotches, et nén nozôtes asprovant d’ vos fé do toirt.

10. Paski les rprotches do Bon Diu codujhnut al ripintance ki moenne, sins nou rgret, å schapaedje, dabôrd ki les rprotches des omes kidujhèt al moirt.

11. Paski : loukîz bén li kéne håsse di rapurer vos cours ki ces rprotches la do Bon Diu ont askepyî dins vos-minmes ; vos avoz tant djeryî après l’ droete voye, tot åyant sogne del pûnicion, tot volant dmorer degnes, ki vos avoz prové noer so blanc ki vos estîz droets dins vos botes dins cist afwaire la.

12. Adon, si dji vos a scrît, ci n’ esteut nén a cåze do ci ki vos a fwait do toirt, ni a cåze do ci k’ a stî djosté di ces målès paroles la, mins c’ esteut po k’ on sepaxhe avå vozôtes – et dzo les ouys do Bon Diu – ki vos nos veyîz co todi voltî.

13. Ci côp ci, vo no la tot ricfoirtés. Et houte di nosse binåjhté, dj’ estans co pus binåjhe do contintmint da Titusse, paski s’ tuza a stî rafristé pa vozôtes tertos.

14. Et si dji m’ a ene miete vanté dvant lu di mes bounès keures emey vozôtes, ci n’ esteut nén d’ mwaijhe chôze ; mins puski tot çki nos vos avans dit, c’ esteut l’ veur, adon, çou k’ nos avans dit a Titusse avou l’ air di nos è vanter, c’ esteut l’ veur eto.

15. Et si binamêyisté po vozôtes end a co crexhou, dabôrd k’ i s’ rimimbere vosse boune aschoûte, a tertos, et k’ vos l’ avoz rçû tot-z åyant peu et tot tronnant.

16. Vo m’ la don fén binåjhe, paski dj’ a èn etir fiyate dins vozôtes.