Deujhinme lete sint På ås djins d’ Corinte/III

From Wikisource
Jump to navigation Jump to search
Deujhinme lete sint På ås djins d’ Corinte (2017—2020) 
Sint På, translated by Lucyin Mahin
III

Troejhinme tchaptrê

1. Alans dj’ don cmincî a nos rkimander pa nozôtes-minmes ! Oudon, avans dj’ co dandjî, come des cis k’ i gn a, di letes di ricmandaedje a vos mostrer, ou des sfwaites di vosse pårt (po mostrer a ds ôtes) ?

2. C’ est vozôtes k’ est parey a des messaedjes sicrîts divins nos cours – et çoula, les djins l’ savnut bén tertos – …

3. …come si vos serîz on testamint do Messeye nén scrît avou d’ l’ intche, mins avou l’ Esprit do vicant Bon Diu. Nén so des tåvletes di pire, mins so des tåvletes di tchå d’ on cour di djin.

4. C’ est l’ minme fiyate å Bon Diu ki ns avans åd triviè do Messeye.

5. Nos n’ estans nén capåbes di rclamer åk come si ça vénreut d’ nos-minmes ; nosse capåbté vént do Bon Diu…

6. …ki nos a dné l’ polance d’ esse des ovrîs d’ ene novele aloyance. Nén si scrijhaedje, mins si Esprit. C’ est k’ li scrijhaedje vos towe, mins l’ Esprit vos fwait viker.

7. Asteure, si l’ ovraedje del moirt, schavé a môde di letes dins des pires, dinéve del glwere po fé, tantea ki les fis d’ Israyel n’ ont nén polou loukî l’ vizaedje da Moyisse di cåze di cisse glwere la, – et mågré k’ elle esteut po disparexhe – …

8. …adon, kimint çki l’ ovraedje di l’ Esprit ni sereut i nén co, aprume, pus glorieus ?

9. Paski, si l’ fwait di codåner a stî èn oneur, li siervaedje del djustice est co bråmint pus onorant.

10. Pask’ a ç’ moumint la, çou k’aveut stî glorieus ni l’ a pus stî gote, a cåze d’ ene ôte glwere co pus grande ki ça.

11. Paski, si çou k’ aléve disparexhe a stou glorieus, çou ki va dmorer po todi va co esse pus glorieus, dabôrd.

12. Come nos avans cist espwer la (d’ ene sacwè eternele), nos nos sintans pår libes divant les djins…

13. …et n’ nén-z esse come Moyisse ki muchive si vizaedje po k’ les fis d’ Israyel ni voeyénxhe nén li finixhmint d’ ene sacwè k’ esteut po disparexhe.

14. Mins leu tuzaedje s’ a aspexhi ; paski, disk’ å djoû d’ ouy, cwand i lijhèt l’ Vî Testamint, li minme vwele est todi la po lzî catchî l’ veur, ca l’ verité n’ est discatcheye ki på Messeye.

15. Taiss k’ åy ! Disk’ asteure, cwand i lijhnut Moyisse, gn a todi on vwele dissu leu cour.

16. Mins Moyisse, lu, cwand i rariveut adlé l’ Bon Diu, i rdiscatchive si vizaedje.

17. Ca l’ Bon Diu, c’ est l’ Esprit, et la k’ i gn a l’ Esprit do Signeur, i gn a l’ liberté.

18. Nozôtes tertos ki rwaite li glwere do Signeur a vizaedje discatchî, come s’ on waitreut dins on muroe, nos divnans ciste imådje la, et passer d’ ene glwere a l’ ôte come on passe do Signeur a l’ Esprit.