De Mossen Gaston de Moncada, seignor de Bearn (Gaston VIII de Bearn)
En las canonigas de Fransa se liec que, l'an de Nostre Seignor Diu DCCXV, Carles Martel, rey de Fransa, payre del rey Pepi, en lo temps de papa Gregori, fec gran guerra contra los Sarrasis et mescrestias ab sos guerroyadors et valedors en lo pays de Guyana et de Gasconha, et lo conquestec. Et, per lo bon secors que feyt li avian, donec als guerroyadors los delmes, et als que eran de Berna en Alamanha donec la terra de Bearn ab los delmes que encara tenen; et per so que era terra deserentabla, los fec de franc aloy per las valencias que feytas avian contra los Sarrasis.
Et, per la natio don venian, foc impausat ad aquela terra per nom Bearn. Demoren sens seignor entro que anen cercar en Auvernha un cavalher, loqual auciguen per so que no los tenia en lors fors et costumas. Et apres anen cercar un cavalher en Begorra; loqaul, (que) no los volguec tenir en lors fors et costumas, auciguen ab un espiut sus lo pont de Ausseranh.
Se liec en las istorias de Carles Magnes que los Bearnes lo secoren al seti de Narbonna contra lo rey Matran de Narbonna et contra lo rey Borreilh, son cunhat, ab los Gascos, que entre touts foren septanta mil combatans, en tal partit que lo payre no excusava lo fil, ny lo fil lo payre. Fen com bons et verays crestias, se adjusten ab los Gascos, fen valentas armas et prenguen la ciutat de Narbonna ab los autres de la companhia de Carles Magnes.
Et apres per so que no avian trobat seignor que los volguec tenir en lors fors et costumas, demoren sens degun seignor long temps, et apres aguen coseilh entre lor que era razo que aguessan seignor. Van tramettre de notables homes que anessan en Catalonha requerir Mossen Guilhem, seignor de Moncada, que lor dones un de sos fils per seignor. Et ayssi ac fen; lo seignor de Moncada lor donec liesta de dos fils, que avia en un lieyt que dormian, que causissan de aquel lor plaguera. Troben los endormits, la un tenia la ma uberta et lo autre la ma clausa; van elegir per seignor Gaston que tenia la ma uberta, et aquel s'en menen et lo noyrin a lor plaser. Et los tenguec en los fors et costumas.
Et apres aucun temps, so es, l'an MCCXXIX, lo rey En Jacmes de Arago fasia guerra contra Malhorca, et Mossen Guilhem de Moncada et son fil foren morts a lo assaut de la ciutat de Malhorca, et Mossen Gaston, seignor de Bearn, demorec heritier de Moncada, Vic de Alzona, Martoreilh, Castel Vieilh de Roanes, et autras seignorias aqui appartenens, et del pays de Bearn. Aguec per molher Madona Matha, filha de Mossen Esquivat, comte de Begorra, et de Madona Agnes de Foix.
Lodit Mossen Gaston aguec de Madona Matha, sa molher, laqual era filha, cum es ja dit, de Mossen Esquivat, comte de Begorra, et de Madona Agnes de Foix, so es, doas filhas: la una foc molher del comte de Armanhac, et la autra del comte de Foix.
En l'an mil CCLX, Mossen Gaston passec en la Santa Terra de Jerusalem contra los iretges et Sarrasis ab la assemblada que foc feyta a Paris, et foc capitany major de la gran artilharia del rey de Fransa. Et mort Mossen Esquivat, comte de Begorra, Madona Matha, sa filha, molher de Mossen Gaston, demorec heritiera del comtat de Begorra et del vescomtat de Marsa, pacifiqu(amen) ab Mossen Gaston, son marit. En l'an mil CCLXXXVI, Mossen Gaston fec guerra al rey de Navarra; lo comte de Foix Roger Bernard, son gendre, ab sa poissansa, lo secorec et fec li sos accords ab lo rey de Navarra. Et per so, Mossen Gaston et Madona Matha fen heritiera Madona Margarida, comtessa de Foix, et Mossen Roger Bernard, son marit, comte de Foix, del pays de Bearn et de Begorra, de Marsa, de Moncada, de Vic de Alsona, de Martoreilh, de Castel Vieilh de Roanes, et de las autras seignorias aquy apartengudas, et asso ab coseilh et deliberatio dels tres estats de son pays de Bearn et de Begorra et de las autras seignorias, que avian Mossen Gaston et Madona Matha; (per) las ditas terras (las) gens de aquelas fen l'homenatge al comte de Foix et a la comtessa.
L'an mil CCLXXXVI, XV° idus de May, foc feyta la unio de Foix et de Bearn, et (Mossen Gaston et Madona Matha) expelin et refusen lo comte et comtessa de Armanhac, car degun secors no li avian feyt ni donat; et per so lo comte Roger Bernard et Madona Margarida de Bearn demoren heritiers de las seignorias susditas.
Aqueste bon seignor Mossen Gaston, seignor de Bearn, moric la vesprada de Sant Marc Evangelista, l'an mil CCLXXXXI. Et apres ausirets los bons secors, que lo comte de Foix li fec, et aussi be los que lo seignor de Bearn fec al comte de Foix.
Lo seignor de Bearn las armas fasia, so es, un triden ab doas vaquas rotjas et un castel negre dejos significan sable, lo castel per Moncada, las vaquas per Bearn.
L'an mil IIcLII, foc feyt lo matrimoni entre Mossen Roger Bernard, comte de Foix, ab Madona Margarida, filha de Mossen Gaston, seignor de Bearn, ab voler de Madona Garsen, sa mayre, dona de Moncada, que lausec et approvec lodit matrimoni.