Cronike d’ ène minêye

From Wikisource
Jump to navigation Jump to search
Ôtès modêyes : Rifondou
Cronike d’ ene minêye  (2020) 
E.G. (ki vout dmorer anonime), edited by Lucien Mahin, Singuliers, 1 & 2/ 2020
Lu cron vîrûsse

Dupwis l’ mwès d’ fèvrî, li monde est tout a l’ aviêr. In novê voyadjeû, nin åjî du tout, vint dusbråler l’ payis. C’ è-st in måvês byin. I fwêt brâmint des ravadjes amon les djins. C’ è-st in vîrûsse, ây (mins nin on brâve vî Rûsse ki djoûe dul balalayca). In lêd djâle ki lêche des traces èt rind les djins in pö malèreûs. La peûr est dins toutes les måjons. N’ åyoz nin peûr. Vola kékes rêgues po n’ nén l’ atraper. - su laver les mwins sovint ; - nu pus dènè la mwin po dîre bondjoû : in clignadje dul tchêsse sufit ; - nin toussè dins la figure des djins, ca des ptitès goutes di toussadje pörint vs dènè l’ vîrûsse ; - cåzè a on mète des djins ; - motchèz vosse nez avu des motchwès an papî ou dins vosse kûte ; - dumèrèz a vosse måjon si z astoz malåde ; Nu vs è fjèz nin. On-z è vêrè a bout. Gn è des djins pus savants k’ nozötes ki kèrèt in vaccin. I trovront bin, mês fåt ratinde in pö.


Lu 15 du mârs

Cwè è sondjèz, vos, du ç’ cron vîrûsse la ?

Çu k’ dj’ è sondje ? Rin d’ bon, hin ! ou moutèt on pö do bon… - Des mwârts èt des mwârts dins tos les payis… ça va chûrmint règlè lu trop d’ djins su l’ tère… èt la fwin dins l’ monde. - Moutèt bin k’ les djins vont-z èsse pus « åjîs a vikè » èt k’ les bounes valeûrs sront rmètûyes a leû plèce. - Mès gn è ossi les sous a trovè. A ! les sous ? Fårè chûr su lèvè d’ boune eûre ! Ça va costè tchîr. Comint fére ? - Dju su chûre ku les djins vont-z esse pus djintis intèr zês, èt ki dès pus grands interloyins [liens de solidarité] vont s’ nouwè. Çu srot si bin si on rcåzrot dpus èssan.ne ! - Èt l’ syince… la mèdcine : èlle årè co fwêt dès avancêyes avu ça. C’ est bin ! Èt pu, on clape ses deûs mwins èssan.ne po dènè des bravôs a tos cès-t-la ki nous åront sognè. On n’ les rovîrè nin !


lu 20 du mârs

Po l’ tchessè vöye…

… on dèt dmèru « confiné ». C’ est in mot k’ on n’ atind nin sovint. On dèt dmèru « raclös », cwè ! Minme si l’ solê lût ; minme si ça nos cosse. On dèt-z esse des djins ki comperdèt les rîles a sîre, et les fére sin.nes [faire siennes]. Minme si, a costè d’ nozötes, gn è-n è brâmint ki s’ fijèt rmarker come des « pinsamis », leû fwèblesse, leu rin du tout d’ civisse. Ça fwèt dul pon.ne, mês çu pon.ne la, k’ on vike asteure, mosture bin, a l’ agrandichant, li pure nature des omes. Nosse payis s’ unn’ è sortu putot bin, jusk’ asteûre. Mês ratindans co in pö, ca pol momint, on sondje k’ on n’ est nén co chapè. On dèt choûtè, et dmèrè raclös ; c’ est la mèyeûte des tchözes a fére. « Dumèrèz a vosse måjon, purnèz bin sogne du vos, èt des ötes ! » Ces mots la k’ on lît tocostè, choûtans les.


lu 25 du mârs

Est çku tolmonde choûte ?

Des bwargnasses et des fös vèråts, gn è plin les vöyes. Des « bouche-tot-djus » ossi, savèz bin, don, des cés ki s’ crwayèt pus malins ku ls ötes. Èt on wèt des djins ki n’ choûtèt nin : i vnèt è l’ Ârdene ou i vont al mér. I s’ pourmon.nèt pattavå ; i djouwèt dins des parks ås djeûs. Il ovrèt cand i n’ plèt nin. I n’ dumèrèt nin a one bone longueûr du vèjin. I raftèt ttafwêt dins les grands botikes. Mins on djoû, la k’ i rescontrèt l’ police ki s’ pourmon.ne, et raf po leu pwate-manöye ! Vla pocwè k’ on dèt-z esse raclös pus lontins jusk’ å dîj-nouv du mwès d’ avri, et moutèt dpus. On s’ è sovinrè. Mon Diu ! Cand pörans dj’ tchessè vöye çu lêd djâle la ki dusbråle lu monde, et k’ i n’ î rvinche pus ?


Lu 30 du mârs

Èt après ç’ racloyadje la ?

La vîe contunûrè. On brêrè ses mwârts, on les contrè, on les aterrè. On rvicrè come duvant… û nin. On rtravayrè, on rîrè, on fiestrè ; çu srè dèr, mês on î arivrè. Les èfants rîront a scole èt l’ monde continûrè a toûrnè. On srè pus rwêtant dins tot, dju crwâ. Lu fin du racloyadje. Ou dzeû, on dit k’ ça srot pol trwâs d’ mêy. Ratindans ! Dju wêrans bin.


Lu 15 d’ avri 2020.

Lu dusracloyadje

Dju sans lu 11 du mwès d’ mêy. Lu gouvernumint èt les sincieûs ont dècudè du dlåtchè in pö les djins. Ouf, ti ! Il astot tins.

Mês çu n’ est nin co gangnè.

On put rcîre cate djins a s’ måjon, èt todi les minmes dins in cercladje du 100 kilomètes.

Les magazins èt les martchands vont rdrovu leû-z uch.

Les scolîs vont rintrè.

Bin, c’ est dja ça !

Mês on dèt todi respectè les mwaisses rîles [règles de base]. Lu vîrûsse n’ est nin co vöye. Èt i pus rarivè come in voleûr, èt co pus fwârt ku l’ prèmî cöp. Èt nozötes esse rassèrès et raclös co in cöp.

Choûtans tortos, èt å diâle çu vîrûsse la. I n’ årè nin nosse pê.

Moutèt k’ on pörè-z alè an condjî an-n estè.

Adon, dju souwête a tortos in boun estè èt des bounes vacances.


Lu 11 du mêy 2020

Accint et sistinme ortografike

L’ accint del sicrijhause, c’ est l’ ci d’ après Libin èt copurade d’ après Sint-Houbert.

Rumarke su les « O » longs Dj’ ê pris l’ sistème Feller-Pierret-Mouzon ö po l’ cogne naziålijhêye, et l’ sistème « Rasgoutadje » å pou l’ O long franc.