Canti Còrsi/Cose viste/Lamentu di a Corsica
A u scio A. Bernamonti.
Ispettore di e scòle.
Povara me,
Abandunata e sola;
A mezzu mare
Cu la mio famigliola;
Cun affettu amu la Francia,
Cume l’ama una figliola.
Ma sa mamma, in d’i mio dòli.
Micca sempre mi cunsola.
Quandu cridia
Ogni pena cessata,
Perch’era, infine,
Frencese diventata,
Fu per me più gran curdogliu
Di vedemi assediata
D’a miseria e da li guai,
Povera disgraziata!
Qual’è ch’è causa,
O Dio! di tantu male;
Si tu. Pulitica,
Nimicu capitale;
Chi cun te porti ogni viziu
L’Imbidia e l’Odiu murtale.
Oghie la curruzzione
— Per to colpa — è generale.
Crudu destinu
Tantu funestu e avaru;
Un ci sarà,
Signore, alcun riparu;
Sarà propriu scritta in beru
— Oh! quantu ci costa caru! —
Chi mai più ci sarà bè
Per noi Còrsi... O fattu amaru!
I mio figlioli
So sempre a leticassi:
Cun tradimentu
Cercanu a bindicassi;
Si danu colpi murtali
E un pònu junghie a sfugassi,
Perchè impussibile è
L’uni e l’altri ad accurdassi.
U ricu un tene
L’operaju mischinu:
E l’insulente
Oltraggia u so vicinu;
A ragione e la justizia
Un so rese a u puvarinu.
Di l’Isula di Belleza
Piengu lu tristu destinu.
Solu a pensacci,
Mi jeccia u sangue in senu;
Chi, pe sti loghi,
Duv’ogni situ è amenu,
Ci sia tanta gativezza
E in core tantu velenu.
Si meritanu s’ingrati
Ch’ellu i s’inghiotti u terrenu
Rotondu e Cintu
Cosa fate all’alture?
Perchè un falate
A sfundà ste pianure?
Eppò a mette sottu sopra
Strade e monti, erburi e mure.
E un lasciate pe sti loghi
Che ruvine e che sciagure.
Tu, Liamone,
Cun Golu e Tavignanu,
Impetuosi,
Sperghjtevi luntanu;
Purtate pertuttu angosce
E mettite tuttu in pianu,
Per chi ognunu u so paese
U cerchi, ma sempre invanu.
Frebbe maligne
E bestie di rapina,
Currite tutte
D’a serra a la marina;
Distrughjte ste campagne
Mettite tuttu in ruvina.
Chi u silenziu più lugubre
Regni qui sera e mattina.
Dolci acelletti
Più pe sti loghi un state;
O stelle, o sole,
Più luce un n’imbiate,
E ste terre di discordia
In di e tenebre lasciate,
Ch’elle sianu per sempre
Da i viventi abandunate.
Grazia! Signore!
Un date stu flagellu,
Chi so accecata
Da u gran dulore... e quellu
Face perde la ragione
E in core mette un cultellu,
Perchè impussibile pare
Chi si possa odià u fratellu.
U Còrsu è statu
Un figliolu amurosu,
Pienu d’ardore,
Onestu e birtuosu:
Sopra u puntu di l’onore
Ghiè statu sempre jelosu,
Prontu a bersà pe la Patria
U so sangue generosu.
U mio passatu
Tuttu pienu è di gloria;
Fatti sublimi
Da tenesi in memoria;
Fu qui chi la libertà
Colse la prima vittoria.
A lutta per l’uguaglianza
Di la Corsica è la storia
D’i mio figlioli
Ne so fiera e orgogliosa:
Perchè fu Roma
Di Cirnu imbidiosa.
E la città di Cartago
Anch’ella ne fu ghielosa.
A lutta chi si sustenne
Fu una lutta gluriosa.
Un Còrsu caru,
Pertuttu rinumatu,
Purtò di a Francia
U nome in ogni latu.
Fu in Egittu vitturiosu
E in Europa in ogni statu.
Fece legge, e cu lu Papa
Signonu lu Cuncurdatu.
Avia avutu
Altri figlioli cari;
Di Sambucucciu
A vita ognunu impari;
E Sampieru cun de Paoli
Chi so forse senza pari.
Molti e tanti di l’esiliu
Cunuscinu i frutti amari.
Eppò tant’altri
Chi si fecenu onore,
In di la lutta
Contr’u vile oppressore,
L’odiosu Jenuvese
Chi, ancu avà sentu lu core
Chi mi strughiè e strappa in pettu...
Tantu fu forte u dulore.
Signore fate
Chi stu populu fieru.
Cammini sempre
Cun enimu sinceru,
Nantu e traccie di l’onore,
Di u duvere e di lu veru;
E nutrisca in di u so core
Sempre un nobile penseru.
Regnà poss’ella
A pace in d’i paesi;
Sempre tranquilli,
Amabili e curtesi,
Sianu tutti l’abitenti
D’ogni colpa e male, illesi.
Cessà possa la «Vindetta».
Rigalu d’i Jenuvesi.
Se rividessi
Ste culline adumbrate,
E le campagne
Fiurite e cultivate,
Cu li magazini pieni
D’ogni sorte di derrate;
Eppò e lutte eletturale.
Bedele morte e interrate,
Allora si,
Cesserebbe u mio piantu,
Benediscendu,
Abbreccenduli tantu,
Sti figlioli tantu cari
Che lodu cun preggiu e bantu.
E sperendu chi ciò sia
Francia, do fine a u mio cantu.