Canti Còrsi/Cose viste/A Funtana all'Olmu

by Jean-Pierre Lucciardi

[ 46 ]

III

A Funtana all’Olmu

O funtanuccia all’Olmu, cusi cara
Pe li ricordi che tu mi rammenti;
O quantu ci aghiu passatu mumenti,
A u cantu di a to acqua fresca e chiara.

A sera a u to spiscinu, ognunu a gara
Ghiunghïa a dissitassi. E più cuntenti
Currianu i zitelli, impazienti
Di fassi un ballu a sonu di chitarra.

Avale sentu dì, ch’incaspitratu
U spiscinu sarà, cume un caprettu,
E notte e ghiornu deve stà serratu.

O l’ingrati! Cum’è? t’hanu custrettu
A nigȧ u beie a un povaru assitatu,
O a dalli un acqua merza? O! chi dispettu!