Canti Còrsi/Cose diverse/Serinatu di Seppu
O la mio stella lucente,
U mio grombulu di granu.
Mai più che tu poi sente
A mio voce da luntanu;
Chi ti stai in casa chiosa,
La mio perla preziosa!
Bramaria d’esse un acellu
Per tirà tamantu volu,
Finu a nantu u to purtellu,
A cantà la notte solu;
E pudè fà un serinatu
A te, o pegnu tantu amatu
Cantaria tuttu pietosu
Cu lu core nantu a mana,
Eppò sarrebbe anziosu
Di sapè se tu si sana.
Finu all’alba cantaria,
Eccu cosa diceria:
«Ti ricordi quellu jornu
Quandu in casa mi piettai
Guattu, guattu in di lu scornu,
E che t’un benia mai?
A to mamma maliziosa
Dubitava di qualcosa.
«Tu dicesti: «In d’u purtone,
O mà, sentu chi c’è un cane,
Dammi prestu su bastone
Che li sciacchi a duie mane»
Tirendu dui Anticristi
Mi basciasti eppò fughjsti.
«Una sera racuntava
Una fola a u to fucone.
E all’appiettu ti tuccava
Pianu, pianu lu to ermone.
Nantu e gambe tu, all’accortu,
Mi festi un pizzicu tortu.
«Quandu sentu la to voce.
Cusi dolce e cristallina,
Mi staria a mane in croce
Da la sera a la mattina.
Mai stancu d’ascultatti,
Sempre fissu a contemplatti.
«Un ghiornu a lu fiumicellu
Ci specchiavamu in di l’onda,
Treghiulava un benticellu
Chi facia trimà ogni fronda,
E nostre facce ballavanu
In di l’acqua... e si basciavanu.
«Bidi chi turnasti rossa
Cume un beru pivarone;
Ti venne cume una scossa
E cascava in d’u rione,
Se un t’avessi, risulutu,
Subitu purtatu ajutu.
«Ti strignisti a la mio vita
Trimulendu d’a peura;
Ti purtai mezza svanita.
Nant’un lettu di virdura
Era pallida e sudava...
Eju, u corciu, t’asciuvava.
«Quandu jungu qualchi sera
Di notte sottu a to casa;
Ti juru s’ell’un n’è bera,
Siane certa e persuasa,
Sentu lu mio curicellu
Chi batte cume un mertellu.
«Mi ne ritornu cuntentu
E so tuttu sullevatu:
E mi pare in su mumentu
U celu d’avè tuccatu,
Se vecu in di la serata
A to stanza alluminata.
Perchè sì, la mio Lucrezia,
Fra le donne a più ghientile;
U mìo specchiu di Venezia,
A mìo rosula d’aprile.
Si a mio nave in altu mare,
U mio Dio sopra l’altare.
«Quale più di me, beatu,
Sarà — ma mi pare un sonniu —
Quandu t’averaghiu a latu
U jornu di u matrimoniu:
Dopu chi u prete ci ha unitu,
Inseme, moglie e maritu?»