Canti Còrsi/Cose diverse/Cantu Corsu

by Jean-Pierre Lucciardi

[ 88 ]

I

Cantu Corsu

A i Corsi chi so nant’a fruntiera.

Ajò, Corsi! lu cornu sfiamazza
E rimbomba per ogni cuntrata;
Cispra cinta e cherchera imbuffata
Currimu prestu, tutti a la guerra.

Ricòcca lu cornu
E strepita e rughia,
E quand’ellu mughia
All’erme ci chiama.

Scòte lu sangue u sonu d’u cornu,
Face d’un Còrsu un beru guerrieru,
Ognunu si lampi, arditu e fieru,
Imbalestratu nantu a fruntiera.

Ricòcca lu cornu...

[ 90 ]

Ajò, Corsi lascemu a pulitica;
A Francia è cara cume una mamma
A populu fattu, a la so chiama
Ci’òle a difende la so bandera.

Ricòcca lu cornu...

Un bile nimicu preputente
E sanguinariu più che Nerone,
Bole ch’in Francia, in ogni fucone
S’annidi la Morte e Mammapiera.

Ricòcca lu cornu...

Ghietta pertuttu focu e spaventu
Per ogni locu sumena dòlu;
A corcia vecchia pienghiè u figliolu,
A tinta giovana s’addispera.

Ricòcca lu cornu...

Quante jente ammantate di neru!
L’Alemanacciu face spavecchiu.
Di u nostru sangue giovanu e becchiu,
Sempre ne sperghiè, mattina e sera.

Ricòcca lu cornu...

[ 92 ]

Currimu tutti, più nun si terdi.
Di la Justizia a voce ci chiama:
Se no’ un stirpemu sta razza infama.
Un c’è più pace nantu la terra.

Ricòcca lu cornu
E strepita e rughia,
E quand’ellu mughia
All’erme ci chiama.