Canti Còrsi/Cose andate/A Cherchera
A u mio cuginu F. A. Cristofini,
Direttore di scola.
Tu chi teni quante u primu
A lu dialettu corsu,
Boli accettà per piecè,
Chi nun ti darà rimorsu,
Sta cherchera chi babbone
Lasciò in fondu d’un cascione.
J.-P. Lucciardi.
«Millu, millu, u Cursacchiolu,
Cum’ellu passa impinnatu;
I so calzoni a la coscia
Schizzanu per ogni latu,
Cu e tracolle a funicella
Ghiunghienu sottu l’ascella.
«Ma pattu a merchià sticchitu
E dirittu cume un i;
Si all’isbenuta s’abassa
Sentite lu cri-cricri.
Scosce e strisce in ogni latu
E si resta sculappatu.
«Quessa a deve per sicuru
A’ moda chi corre avale,
Cridendu chi sia un lussu
Di vestesi a chernevale.
Dice: «Un so micca... maltese
Che un mi vesti a la frencese.»
«Ghiè per quessa ch’ha lampatu
A cherchera in d’un agnone,
Per serve di nidu a e puce,
O per tuppanne un tuvone,
Duve li topi a la lesta.
Ghiunghienu a fà la so festa.
«E cusi si sbarrazzatu,
O Còrsu di la cherchera;
Principiasti per lascialla
Pertuttu a la bandulera,
Eppò ci rinunciasti
Tutt’affattu, e ti scurdasti.
«Hai a memoria fallace.
— Un nigà chi tantu è bera —
Quandu ignori li servizi
Ch’ell’ha resu la cherchera,
Tantu sia a li pastori
Cume puru a li signòri.
«Pensa a quelli giuvanotti
Cume andavanu attillati,
Cu e mane in di la cherchera
E li mustacci inturchiati;
Ucchjghiendu le zitelle
Chi cuscianu a e purtelle.
«Paria chi quella cherchera
Purtassi la calamita;
S’attirava tutt’i cori
E li facia una ferita
Chi ghiera senza dulore
Perchè benia da l’amore.
«Eppò avia altre virtù,
Còrsu: a vita ti strignia;
Ti tenia u spinu in frenu,
Salvu d’ogni malattia;
Ti dava cume man’ forte
A un travagliu d’ogni sorte.
«Era un beru magazzinu:
C’era trisore e cultellu;
Specchiu, spiglia, lima e petra,
Zolfu, e d’esca un bucinellu;
Cun tant’altre cusarèlle,
Còspidu, filu e curdelle.
«C’era anc’una lesinucia;
Un rasoghiu imbucinatu;
Un ghergione, aghi e stacchette,
Pecia, asciugna e assalimatu;
Palle, polbara e squatroni,
Paternostri e sant’antoni.
«In un cantu ci tenia
Un porta-munete a perte:
Per cacciacci a casu un scudu
Ci vulia aduprà l’erte.
Raramente ne surtia
E tu sempre solli avia.
«Imbece ch’in d’u curpettu
So troppu a la manighiata;
Faci per pigliacci un francu
Ti ne colla una manata.
E cusi, Còrsu, sarai
Riccu si, ma mache in guai.
«Torna prestu all’usi antichi;
Ascolta la to cherchera;
Sappia chi a li to caccari
L’è stata sempre sincera,
E burrebbe chi ancu tu
Prusperassi di più in più.
«Aspettendu chi su jornu
Per te ghiunga lu più prestu,
Beni e cacciami di qui,
Còrsu caru, ma sia lestu,
Chi a cherchera ti darà
U laziu di travaglià.»
— Cusi, senza fà sfiamazzi,
Sola sola, a lu bughione,
A cherchera si lagnava
D’infungassi in quell’agnone.
Ma lu Còrsu scortu, scortu,
Dicia: «Zitta, ch’hai lu tortu.»