Bondjoû, mårene, et boune santé

From Wikisource
Jump to navigation Jump to search
Ôtès modêyes : Ortografeye di dvant 1900Feller
Bondjoû, mårene et boune santé (18inme sieke) 
by o.n.c., edited by Lucien Mahin
prumî coplet



I.

Bondjoû, mårene, et boune santé
Bondjoû, mårene, et boune santé
Dji vén cweri m' cougnou d' Noyé !
Sav bén, a çou k' dj' ô dire,
Ki l' schapeu des åmes a skepyî,
Pus bea k' ene andje do cir ?

5 coplets: 1, 2, 3, 7, 8


II.
 
Dvins on ståve il a-st adschindou
Dvins on ståve il a-st adschindou
Les bons bierdjîs ont-st acorou,
Tertos å pus abeye
Il est si bea, il a l' air si doûs:
Corans vite l' aler vey

III.

Hay, djans, corans î tot dansant,
Hay, djans, corans î tot dansant,
Vey li miråke di cist efant
K' a skepyî d' ene pucele !
Dxhombere tu, Djhene ! Dxhombere tu, Djhan!
Dixhombere tu, båshele !

10 coplets: 1, 2, 3, 4, 7, 8, 9, 15, 18, 19



IV.

Hay, don, bén vite, nosse vî Cola !
Hay, don, bén vite, nosse vî Colas !
Prind abeymint tos tes haernas
Et si t' dixhombere rade !
Si dji n' mi trompe, i sont ddja la,
Ca il ont pris l' savate

V.

Djans, don, noste Ernou, rimowe tu
Djans, don, noste Ernou, rimowe tu
Ti prindrès l' djambon, s' il est cût,
Si n' roveye nén l' makêye !
Va-z è bénrade, ni t' ritoûne pus
Et s' cour tot al valêye !

VI.

O, sour Maroye, vinoz avou !
O, sour Maroye, vinoz avou !
Nos pasrans pamon m' fré Ernou,
K' i nos moenne al valêye :
I fwait si spès ki dj' a pawou
Ki ns n' soeyanxhe dirôbêyes.
 
VII.

(Maroye)

Grand-pere, vos poitroz bén l' fizik !
Grand-pere, vos poitroz bén l' fizik !
So vosse nez vs metroz des berikes
Et s' loucroz vs el potale
Tot å coron di nosse botike:
Vos trovroz des brocales.

VIII.

(Djihene)

O, souxh, Maroye, ki fwait i froed !
O, souxh, Maroye, ki fwait i froed !
Les dints m' tchakèt, s' a dj' må mes doets:
Très doûs Diè, kéne djalêye !
Cist efant serè moirt di froed :
Poirtans lyi po ene blamêye !

IX.

(Djihan)

Por mi, dj' lyi poitrè des fagots,
Por mi, dj' lyi poitrè des fagots,
Et des loumrotes tot plin m' sårot
Ki sont-st e nosse coulêye.
Ç' serè po les rtchåfer tertos ,
Djôzef, Diè et Mareye

X.

(Maroye)

Por mi, dji lyi poitrè m' cotrê,
Por mi, dji lyi poitrè m' cotrê,
Po fé des faxhes et des lignrês
Ey al mere, des tchåssetes.
Vos lezî keuzroz bén, s' i vs plait:
Dj' a do fi e m' taxhete.

XI.

(Li Mere)

Por mi, dji lyi poitrè m' vantrin
Por mi, dji lyi poitrè m' vantrin
Il est si bea, si est i si fén
K' on direut del prôpe soye.
Ç' serè po lyi fé des beguéns!
N' est i nén vraiy, Maroye ?

XII.

(Djihan)

Por mi, dji lyi poitrè m' sårot;
Por mi, dji lyi poitrè m' sårot
I n' est nén fén, s' n' est i nén gros ;
Et s' a dj' des plomes di cîne.
Vos metroz totafwait e m' bot
Po poirter al payelinne

XIII.

(Li Mere)

Dj' a do souke po fé on batisse
Dj' a do souke po fé on batisse
Po l' mere di l' efant, k' est si trisse
Si trisse et si dzolêye
O, k' n' esteut ele e nosse lodjisse
Cwand ele s' a-st acoûtchî !

XIV.

(Djihene)

Cuzene Maroye, alez schoûter,
Cuzene Maroye, alez schoûter,
I m' shonne ki dj' ô l' efant criyî…
Doûs Diè, so dj' ewaerêye !
Et pu do côp, vos racourroz,
Ki nos sepanxhe li vraiy.

XV.

(Maroye)

Awè, ciete, i sont la leus troes,
Awè, ciete, i sont la leus troes,
L' efant so l' four, tot moirt di froed,
Et l' mere tote edjalêye;
Li vî bouname les louke tot roed:
Vos dirîz k' i tuzene

XVI.

Moussans dvins, et s' nos adjenans,
Moussans dvins, et s' nos adjenans,
Nos irans adorer l' efant
Et lyi ofri nosse cour.
C' est çou k' i vout, l' Divin Efant
K' est la coûtchî so l' four.

XVII.

Diè vs wåde, degne mere et li cpagneye !
Diè vs wåde, degne mere et li cpagneye!
Les andjes nos ont dit des merveyes
Nos ont fwait si binåjhes
Di cist efant ki nos vnans vey !
Vos plait-st i bén k' djel båjhe ?

XVIII.

(L' Aviedje)

Oyi, biedjresse, tot l' adorant
Oyi, biedjresse, tot l' adorant
Båjhîz les pî di mi efant
K' a skepyî inte deus biesses
C' est lu k' est l' fi do Tot-Pouxhant:
Vos lyi rfiestixhroz s' fiesse

XIX.

(Djihene)

Schoûtez, don, mere, k' ele pårlêye bén !
Schoûtez, don, mere, k' ele pårlêye bén !
Loukîz cisse boke, ci bea mintén:
Ni dirîz vs nén ene andje ?
Neni, ciete, mere, n' end alans nén:
Ashians nos so cisse plantche !


Note Wikisourd

Cisse modêye cial a replaecî des mots k' i gn a pa des ôtes, pus tipicmint walons, cabén k' i n' åyexhe sitî siervous ki dins ene ôte contrêye e 20inme sieke.

Po on riscrijhaedje a môde Feller (1938), loukîz l' antolodjeye lidjwesse da Delbouille; po cåzu l' minme tecse, såf so l' Aberteke

Li 17inme coplet est rindou e francès dins les mwaissès modêyes, et les riscrijhaedjes e Feller. Eto est i insi so l' Aberteke.