Bin v’la st-on râre èdon surmint

From Wikisource
Jump to navigation Jump to search
Joyeux rèspleus  (1899)  by Jean Bury
Bin v’la st-on râre èdon surmint
[ 14 ]
BIN V’LA ST-ON RÂRE ÈDON SURMINT

Monologue comique dè répertoére Veders

(Louquant d’vès l’coulisse)

1

Cours à Ghèle, valet, lais-me è pâye,
Bin, diale mi strône, t’as dè toupet !
Louquîz don l’laid houpieu pîmâye’
Tinte croufieu, t’ârè l’air pus spet !
(A public)
Ni vint-i nin blaguer m’laide tiesse,
Mes oûyes, mi vinte, mes pîds, mes mains,
Lu qu’a mon l’cogne d’ine gins qu’d’ine biesse !
Bin v’là st-on râre èdon surmint !

2

J’âreus bin toért di m’fer dè l’bîle,
Et d’rèsponde à ses boègnes râv’lais.
Pa, vos l’kinohez, c’est l’sot Gilles,
On n’a mâye pondou nou si laid.
Il a n’narenne pus grosse qu’on pogne
Et n’geaive co pus grêye qu’on fiérmint.
N’a t-i nin l’front d’dîre qui j’fais sogne !
Bin v’la st-on râre èdon surmint !

[ 15 ]

3

C’est pasqui j’vins d’lî dire si compte
Parè, qui s’a volou mâv’ler.
C’est portant vrèye ; tos ses boègnes contes,
Fou d’vos clicottes vis frît sât’ler.
Ji conte ine blague et v’la l’roubiesse
Qu’èl dit st-à m’feumme ! « Madame j’ôs bin,
Qui v’s’avez s’t-on gros clâ so l’f……jambe,
Bin v’la st-on râre èdon surmint !

4

On côp qu’jesteus târd amon m’maisse,
Ji dis : cours et m’chambe et prinds-i
Mes hârds di dimègnes, qui m’feume faisse
Todis l’vôye disqu’â bal sins mi.
Ni va-t-i nin â bal sins geinne
Avou m’feume et mes bons mous’mints,
Qui m’rimette seul’mint l’aute samainne !
Bin v’la st-on râre èdon surmint !

5

Po v’dîre qui n’fais mâye rin d’adrame,
A Sainte Margarite ine aute côp
I s’fa-t-on mâlheur avou l’trame,
Comptant so n’mèdaye, li bâbeau,
Bin qui fait-i, mâgré m’colére ?
I lait s’prâchî m’pauve pitit chin
Po-z-aller sâver m’laide belle-mére !
Bin v’la st-on râre èdon surmint !