Biblia/Nove Testamento/Marco/Marco 9

Marco

9

¹E illes les diceva: “In veritate il ha alicunes qui sta hic le quales non cognoscera^[1] le morte ante vider le regno de Deo venir con potentia”.

Le transfiguration

²Sex dies plus tarde, Jesus prendeva con se Petro, Jacobo e Johannes e les conduceva a parte^[2], sol, sur un monte alte. Ibi, in lor presentia, ille esseva transfigurate. ³Su vestimentos deveniva brillantemente blanc, plus que qualcunque lavandero in le mundo haberea potite blanchir los. ⁴Alora Elia appareva ante les, insimul a Moses, e illes parlava con Jesus. ⁵Assi Petro interloqueva^[3] e diceva a Jesus: “Rabbi, il es bon pro nos esser hic. Vamos facer tres cabanas, uno pro te, uno pro Moses e uno pro Elia”⁶(pois que ille non sapeva que dicer, durante que illes esseva espaventate). ⁷Alora un nube veniva e adumbrava les, e un voce veniva ab le nube e diceva: “Iste es mi amatissime^[4] Filio. Ascolta le”. ⁸E subito, quando illes circumspectava, illes non videva plus alicuno con ille, ma solmente Jesus.

⁹Quando pois illes descendeva del monte, ille les ordinava de non contar a alicuno in re lo que illes habeva vidite usque post le Filio del Homine haberea resurgite ex le mortos. ¹⁰Illes reteneva assi pro se mesme iste parola^[5] ben que, inter se, illes discuteva que poteva significar iste resurger ex le mortos.

¹¹Illes poneva a Jesus iste question: “Proque le expertos in le Lege</ref>O “scribas”.</ref> dice que Elia debe venir primo?”. ¹²E ille les respondeva: “Il es certe que Elia debe venir primo e restaurar omne cosas. Totevia, proque le Scriptura dice que le Filio del Homine debera suffrer multo e esser dispreciate^[6]? ¹³Ma io dice vos que Elia jam ha venite, e illes le ha tractate secundo lor placer^[7], precisemente como le Scripturas dice de ille”.

Le discipulos de Jesus non succedeva sanar un infirmo

¹⁴E quando illes retornava al discipulos, illes videva un grande turba circum illes e le expertos del lege que disputava con illes. ¹⁵E tosto tote le turba, vidente le, esseva stupefacite e, currente verso ille, le salutava. ¹⁶E ille les demandava: “De que disputava vos con illes?”. ¹⁷E un del turba le respondeva: “Magistro, io te portava mi filio, possedite de un spirito che le rende mute. ¹⁸Quandocunque illo le prende, illo le jecta a terra e le face spumar, e ille stride le dentes e deveni rigide. E io diceva a tu discipulos que illes expelle tal spirito, ma illes non lo poteva facer. ¹⁹Jesus les respondeva: “O generation incredule, usque a quando io debera supportar vos? Porta le a me”. ²⁰Alora illes le portava le puero. Quando le spirito le videva, tosto le causava convulsiones; ille cadeva a terra e se rolava,; spuma exiva alsi de su bucca. ²¹Jesus demandava a su patre: “De quante tempore isto le occurre?”. E ille diceva: “Desde su infantia. ²²Frequentemente illo le jecta in le foco e in le aqua pro facer le morir. Ma si tu pote facer alique, habe compassion e adjuta nos”. ²³E Jesus le diceva: “Si tu pote? Toto es possibile a illes qui crede”. ²⁴Assi, immediatemente le patre del puero exclamava: “Io crede, ma adjuta mi incredulitate”.

²⁵Ora, quando ille videva que un turba plus grande accurreva, Jesus reprehendeva le spirito immunde dicente a illo: “Spirito mute e surde, io te commanda de exir e de non plus entrar in iste puero”. ²⁶E con grande critos e terribile convulsiones illo sortiva. Le puero nunc pareva como un cadavere, tanto que multes diceva: “Ille moriva”. ²⁷Ma Jesus tenente un mano del puero, le levava e ille stava.

²⁸Quando tamen Jesus entrava in le domo, su discipulos le demandava privatemente: “Quare nos non poteva expeller un tal spirito?”. ²⁹¹Ille les diceva: “Iste sorta de spirito pote esser expellite solmente con le precaria”.

Secunde prediction del morte e resurrection de Jesus

³⁰Illes quitava celle region e percurreva le Galilea. Jesus non voleva que alicuno sapeva que ille esseva ibi, ³¹quia ille desirava passar plus de tempore con su discipulos e docer le. Ille les diceva: “Le Filio del Homine essera consignate in le manos de su inimicos, illes le occidera, e post tres dies ille resurgera”. ³²Illes, tamen, non comprendeva iste parolas e timeva peter explicationes.

Le plus eminente in le regno

³³Post haber pervenite a Capernaum e stabilite se in un domo, Jesus demandava a su discipulos: “De que discuteva vos durante le cammino?”. ³⁴Illes, tamen, taceva, quia illes disputava qui esseva inter les le plus eminente^[8]. ³⁵Ergo ille se sedeva, vocava le Duodece e les diceva: “Quicunque vole esser le primo, debe poner se al ultime placia e esser le servitor de omne alteres”. ³⁶Pois ille poneva un puero in lor medio e, prendente le in su bracios, Jesus les diceva: ³⁷“Quicunque recipe un puero como iste in mi nomine, recipe me; e quicunque me recipe, recipe non me solmente sed alsi mi Padre qui me mandava”.

Emplear le nomine de Jesus

³⁸Johannes diceva a Jesus: “Magistro, nos videva alicuno expeller demones in tu nomine, ma nos le lo prohibeva, quia ille non pertine a nostre circulo de discipulos^[9]”. ³⁹Jesus, tamen diceva: “Non le lo prohibe, quia necuno qui face un miraculo in mi nomine poterea cito parlar mal de me. ⁴⁰Quicunque non adversa nos es pro nos. ⁴¹In veritate io vos dice, non perdera su recompensa quicunque vos da mesmo un cuppa de aqua propter vos porta le nomine de Christo.

⁴²Si alicuno scandalisa^[10] un de iste parvulos qui crede in me, il esserea melio pro ille que un grande mola esseva ligate circa su collo e jectate in le mar. ⁴³Si vostre mano te scandalisa^[11], abscinde lo! Il esserea melio pro te entrar in le vita eterne con un mano solmente plus tosto que vader con duo manos a in le inferno, ubi il ha un foco inextinguibile, ⁴⁴[ubi le verme nunquam mori e le foco nunquam se extingue]^[12]. ⁴⁵E si tu pede te scandalisa, amputa lo! Il esserea melio pro te entrar claude in le vita eterne plus tosto que vader con duo pedes a in le inferno, ⁴⁶[ubi le verme nunquam mori e le foco nunquam se extingue]^[13]. ⁴⁷Si tu oculo te scandalisa, evelle lo! Il esserea melio entrar a in le regno de Deo con un oculo solmente que esser jectate con duo oculos in le inferno, ⁴⁸ubi le verme nunquam mori e le foco nunquam se extingue. ⁴⁹Quia omnes essera ponite a proba^[14] con le foco. ⁵⁰Le sal es bon pro condir, ma si le sal perde su sapor, quomodo potera vos render lo de novo salate? Vos debe haber in vos le qualitate del sal e viver in pace le unes con le alteres.

Notas

1. Litt. “gustara”.
2. O “privatemente”.
3. O “respondeva”.
4. Le fortia de “amatissime” es sovente: pertinente a uno que es le unic de su classe, ma al mesme tempore particularmente amate e tenite car.
5. O “Illes observava fidelmente”.
6. O “tractate con disdigno”.
7. O “ille le faceva toto que illes desiderava”.
8. O “major”.
9. O “sequitores”.
10. O “induce peccar”.
11. O “te causa peccar”.
12. Iste verso manca in le plus antique manuscriptos.
13. Iste verso manca in le plus antique manuscriptos.
14. O litt. “salate”.