Biblia/Nove Testamento/Marco/Marco 11

Marco

11

Le entrata triumphal de Jesus

¹Ora, durante que Jesus e su discipulos se approximava a Jerusalem, apud le urbes de Bethphage e Bethania sur le Monte del Olivos, Jesus mandava in avante duo de illes con iste instructiones: ²“Vade in ille village contra vos e, si tosto que vos entra in illo, vos videra ibi ligate un juvene asino que nemo ancora lo cavalcava. Disliga lo e duce lo hic. ³E si alicuno quere a vos: ‘Que face vos?’, dice solmente: “Le Senior lo necessita e tosto ille lo retornara’”. ⁴Le duo discipulos ergo vadeva, trovava le pullo in le strata ligate ante le porta de un domo e lo disligava. ⁵Alicun circumstantes les videva e les diceva: “Que face vos? Proque disliga vos celle pullo?”. ⁶Alora illes les diceva sicut Jesus les habeva dicite e illes esseva permittite de prender lo.

⁷Alora illes duceva le pullo a Jesus, coperiva su dorso con lor mantellos e Jesus se assideva supra illo. ⁸E durante que assi Jesus transiva, multes in le turba extendeva lor mantellos sur le strata e alteres extendeva brancas foliate excidite in le agros. ⁹Jesus esseva in le centro del procession, e le gente que le circumstava clamava: “Hosanna!^[1] Sia benedicite ille qui veni in le nomine del Senior! ¹⁰Benedicite sia le regno veniente de nostre ancestre^[2] David! Hosanna in le celos excelse!”. ¹¹Assi Jesus entrava in Jerusalem e vadeva in le area del Templo. Post haber perscrutate toto, ille lo quitava proque jam il esseva vespere e retornava a Bethania con su dece-duo discipulos.

Jesus maledice un fichiero

¹²Le matino sequente, quando illes exiva de Bethania, Jesus habeva fame. ¹³E quando ille notava de longe un fico con plen foliage, ille vadeva ibi pro vider si ille trovarea ficos a mangiar. Ma il habeva solmente folios proque il esseva tro tosto in le saison pro trovar fructos^[3]. ¹⁴Ma Jesus diceva al arbore: “De ora in avante, nulle persona mangera plus fructos de te in eterno!”. E su discipulos audiva iste su parolas.

Le purification del Templo

¹⁵Quando illes retornava a Gerusalem, Jesus entrava in le area del Templo, ille comenciava expeller de illo venditores e emptores de animales a usar pro le sacrificios cerimonial. Ille subverteva le tabulas del cambiatores de moneta e le sedes del venditores de columbas, ¹⁶e prohibeva a quicunque de emplear le Templo como un mercato. ¹⁷Ille les doceva dicente: “Le Scriptura declara: ‘Mi Templo essera appellate domo de oration pro omne gentes’, ma vos lo transformava in un spelunca de robatores”. ¹⁸Quando le chefes del sacerdotes e le scribas audiva de lo que Jesus habeva facite, illes comenciava planar como occider le. Tamen illes le timeva proque le gente esseva admirate de su doctrina. ¹⁹Ille mesme vespere Jesus e su discipulos quitava le citate.

²⁰Le matino sequente, quando illes transiva apud le fichiero que Jesus habeva maledicite, le discipulos remarcava que illo habeva siccate usque su radices. ²¹E Petro, recordante, exclamava: “Rabbi! Ecce le fichiero que tu malediceva: illo siccava e moriva!”. ²²E respondente, Jesus diceva a su discipulos: “Habe fide in Deo! ²³In veritate vos poterea dicer a iste montania: ‘Que tu sia levate e jectate in le mar’, e illo evenirea. Ma vos debe vermente creder que illo evenira sin haber alcun dubita in vostre corde. ²⁴Pro isto io dice a vos, vos pote precar pro qualcunque cosa e, si vos crede que vos lo recipeva, illo essera vostre. ²⁵Ma quando vos preca, primo pardona, si vos ha alique contra alicuno, assi etiam vostre Patre, qui es le celos, pardonara vostre peccatos”^[4].

Le autoritate de Jesus defiate

²⁷E illes veniva de novo a Jerusalem. Como ille ambulava in le area del templo. le chefes del sacerdote, le magistros del lege religiose e le ancianos le accedeva ²⁸e diceva a ille: “Con qual autoritate tu face iste cosas? Qui te ha date iste autoritate pro facer los?”. ²⁹Jesus respondeva a illes: “Io dicera a vos con qual autoritate io face iste cosas si vos responde solmente a un mi question: ³⁰‘Le autoritate de Johannes a baptisar proveniva del celo, o illo esseva simplemente human?’ Responde me!”. Illes, tamen, debatteva^[5] inter se: “Si nos dice que illo proveniva del celo, ille dicera a nos: ‘Proque, alora, vos non credeva a ille?’ ³¹Ma esque nos pote aventurar nos dicer que illo esseva simplemente human?”. De facto illes timeva lo que le populo haberea facite, proque omnes credeva que Johannes esseva vermente un profeta. ³²Assi illes finalmente replicava: “Nos non lo sape”. E Jesus respondeva: “Alora io non dicera a vos con qual autoritate io face iste cosas”.

Notas

1. O “Sia laudate Deo”.
2. Litt. “patre”.
3. O “il non esseva ancora le tempore de ficos”.
4. Alicun manuscriptos adde verse 26: “Ma si vos refusa pardonar, vostre Patre in celo non pardonara vostre peccatos (vide Mattheo 16:15).
5. O “cogitava”.