Biblia/Nove Testamento/Luca/Luca 6

Luca

6

Le Senior del sabbato

¹In un die de sabbato^[1], durante que Jesus transiva per campos de grano, su discipulos colligeva spicas e, fricante los in lor manos, los mangiava^[2]. ²Alcun phariseos diceva: “Proque face vos lo que non es licite facer in un die de sabbato?”. ³Jesus respondeva: “Esque vos non legeva re lo que David faceva quando ille e su companiones habeva fame? ⁴Ille entrava in le domo de Deo, prendeva le panes consecrate, los mangiava e etiam los dava a su companiones, ben que solmente al sacerdotes esseva permittite mangiar los^[3]”. ⁵Ergo ille les diceva: “Le Filio del Homine es le Domino del sabbato^[4]”.

Un homine con un mano desiccate

⁶In un altere die de sabbato, Jesus entrava in un synagoga e doceva. Il habeva ibi un homine cuje mano dextere esseva desiccate^[5]. ⁷Le doctores del Lege le observava attentivemente pro vider si ille haberea operate un curation in un die de sabbato, a fin de trovar un accusation contra ille. ⁸Ma Jesus cognosceva lor pensamentos, e diceva al homine con le mano desiccate: “Leva te e sta hic in le medioǃ”. Assi ille se levava e stava ibi. ⁹Alora Jesus les diceva: “Io demanda a vos: Es il licite in un die de sabbato facer le bon o le mal, salvar un vita o destruer lo?”. ¹⁰E post haber reguardate circum se a tote illes, ille diceva al homine: “Extende tu manoǃ”. Ille lo faceva e su mano esseva sanate. ¹¹Ma illes esseva plen de furor insipiente e debatteva le unes con le alteres super lo que illes haberea potite facer a Jesus.

Le selection del duodece apostolos

¹²In ille dies, Jesus sortiva e vadeva al monte pro orar. Ille passava le nocte integre in oration a Deo. ¹³Al alba, ille appellava su discipulos e seligeva duodece ex illes, que ille nominava apostolos: ¹⁴Simon (a qui ille dava le supernomine Petro) e su fratre Andrea, Jacobo e Johannes, Philippo e Bartholomeo, ¹⁵Mattheo e Thomas, Jacobo, filio de Alpheo, e Simon, supernominate le Zelota, ¹⁶Judas, filio de Jacobo, e Judas Iscariothe, qui deveniva un traitor.

Le sermon sur le plateau

¹⁷Post descender con illes, ille stava sur un plateau. Un grande gruppo de su discipulos habeva se congregate insimul a un multitude copiose de gente de tote Judea, Jerusalem e del region costari de Tyro e Sidon. ¹⁸Illes habeva venite pro audir le e pro esser sanate de lor maladias. Illes qui esseva affligite per spiritos immunde esseva alsi curate. ¹⁹Tote le turba quereva tanger le, proque un potentia exiva de ille e sanava omnes.

²⁰Alora, elevante su reguardo verso su discipulos, Jesus diceva: “Benedicte^[6] es vos, le pauperes, quia vostre es le regno de Deo. ²¹Benedicte es vos, qui nunc ha fame, quia vos essera satiate. Benedicte es vos, qui nunc plora, quia vos ridera. ²² Benedicte es vos, quando vos essera odiate e insultate, e vostre nomine essera infamate^[7] a causa del Filio del Homine^[8]. ²³Gaude in celle die e exulta, proque un grande recompensa expecta vos in le celo; De facto, vostre ancestres^[9] faceva le mesmo al prophetas^[10].

²⁴Ma guai a vos, le riccos, quia jam vos recipeva vostre consolation. ²⁵Guai a vos, qui ora es satiate, quia vos habera fame. Guai a voi, qui ora ride, quia lugera e plorara. ²⁶Guai a vos, quando totes parlera ben de vos, proque lor ancestres faceva le mesmo con le false prophetas.

²⁷Ma a vos, qui ascolta, io dice: Ama vostre inimicos, e beneface les qui odia vos, ²⁸benedice les qui maledice vos, preca pro les qui calumnia^[11] vos. ²⁹Al persona qui te percute sur un gena, offere etiam le altere; e a le qui prende tu tunica, non le obstacula prender  etiam tu mantello. ³⁰Da a quicunque te pete, e non require le restitution de lo que alcuno ha prendite de te. ³¹Tracta le alteres como tu volerea que illes te tracta^[12].

³²Si vos ama solmente illes qui ama vos, qual merito exceptional haberea vos?^[13] Nam mesmo le peccatores ama illes qui les ama. ³³E si vos beneface solmente illes qui beneface vos, qual merito exceptional haberea vos? Nam mesmo le peccatores face le mesmo. ³⁴E si vos presta solmente a illes ab le quales vos spera reciper, qual merito exceptional haberea vos? Nam mesmo le peccatores presta a peccatores a que illes pote esser plenmente repagate. ³⁵Al contrario, ama vostre inimicos e beneface les; presta sin expectar alco in retornoǃ Alora vostre recompensa essera grande, e vos demonstrara esser filios del Deo altissime, quia ille ipse es benigne verso gente ingrate e mal. ³⁶Sia vos misericorde justo como vostre Patre es misericordeǃ

Re le non judicar

³⁷Non judica, e vos non essera judicate; non condemna, e vos non essera condemnate. Pardona e vos essera pardonate. ³⁸Da, e a vos essera date: un mesura plen, comprimite, e exuberante essera versate in vostre gremio. Proque con le mesura con que vos mesura, vos essera mesurate”^[14].

{{verse|chapter=6|verse=39}Jesus etiam diceva a illes un similitude: “Poterea un ceco guidar un altere ceco? Non ambes caderea in un fossa^[15]? ⁴⁰Un discipulo non es superior a su magistro, ma omne discipulo ben instruite essera como su magistro^[16].

⁴¹Proque vide tu le stupula^[17] in le oculo de tu fratre, ma non vide le trabe que il ha in tu proprie oculo? ⁴² Quomodo pote tu dicer a tu fratre: ‘Fratre, lassa me remover le stupula ab tu oculo’, quando tu non vide le trabe que es in tu proprie oculo? Hypocrita! Primo remove le trabe ab tu oculo e tunc tu videra clarmente pro remover le stupula ab le oculo de tu fratre.

⁴³Non existe un arbore bon que produce fructo mal, ni un arbore mal que produce fructo bon. ⁴⁴Cata arbore es recognoscibile per su proprie fructo. On non collige ficos de spinas, ni vindemia uvas de un rubo^[99]. ⁴⁵Le homine bon trahe le ben del bon thesauro de su corde, e le homine mal trahe le mal del mal. Proque del abundantia del corde parla su bucca^[100].

⁴⁶Proque vos me appella: ‘Senior, Senior’, e non face lo que io dice? ⁴⁷Qui veni a me e ascolta mi parolas e los face, io vos monstra a qui ille es simile: ⁴⁸Ille es como un homine qui edifica su domo. Ille cavava profundemente e poneva le fundamento sur le petra. Quando le inundation veniva, le fluvio batteva contra ille domo, ma non poteva mover lo, proque illo esseva ben edificate. ⁴⁹Ma qui ascolta e non mitte in practica es como un homine qui edifica su casa super le terra sin fundamentos. Quando le fluvio lo batteva, illo cadeva subito, e le ruina de ille casa esseva grande”.

Notas

1. In le tradition judaic, le sabbato (heb. Shabbat) es le septime die del septimana, dedicate al reposo e al culto, con stricte regulas super lo que es permittite facer.
2. Deuteronomio 23:25.
3. Levitico 24:9; 1 Samuel 21:1-6.
4. Isto significa que Jesus, como Messia, ha le autoritate divine de determinar lo que es permittite o non in le die de sabbato – un declaration radical in su contexto, ubi le phariseos insisteva super un interpretation rigide del Lege.
5. Contrahite e paralysate.
6. Benedicte’ (gr. μακάριοι) indica que Deo activemente favori iste gruppos, malgrado lor apparente miseria. “Benedicte” implica un acto de Deo (non solo un stato emotional); un promissa (vs. un constatation). Le dimension communal del benediction, non solmente individual.
7. O “rejectate como mal”.
8. 1 Petro 4:14.
9. O “patres”.
10. 2 Chronicas 36:16; Actos 7:52.
11. O “maltracta”.
12. Mattheo 7:12.
13. Le discipulos del Christo debe haber un standard plus alte que “le peccatores”.
14. Isto reflecte le costume antique de mesurar grano con generositate: on comprime lo pro adder plus, e al fin on lassa lo exuberar. Jesus illustra como Deo retribue nostre generositate con un benediction excedente (cf. Malachia 3:10).
15. Mattheo 15:14.
16. Mattheo 10:24-25; Johannes 13:16; 15:20.
17. "‘Stupula’ (gr. κάρφος) es un parola classic pro un fragmento de paglia o ligno sic – como un festuca que pote irritar le oculo. Jesus usa iste imagine hyperbolic pro criticar le hypocrisia de judicar alteres pro defectos minor, ignorante le proprie peccatos major."