Berdaqqa (Qayıpnazarov)
Sahrada sayraǵan búlbildey,
Bolmasa da qonarǵa gúliń.
Xalıq muńına ún qostıń birdey,
Qádirińdi biledi eliń.
Oqıp kórsem shiyrin sózińdi,
Júregime jıllı tiyedi.
Xalıq perzentiseń, xalıq ózińdi,
Óz ulınday kórip súyedi.
Sen jasaysań, seniń izińdi,
Altınday tot baspas sóziń bar.
Súyikliseń, hár bir sózińde,
Xalıq máńgi umıtpas óziń bar.
Xalıqtı ezgen jawız dushpandı,
Mudamı jek kórip kettiń sen.
Erkin zaman, baǵı-bostandı,
Kóp saǵınıp árman ettiń sen.
Qosıǵıńdı tıńlatıp xalıqqa,
Yoshıp-yoshıp shertkende sazdı.
Sán bergendey jaynatıp baǵqa,
Kútken ediń xalıq ushın jazdı.
Bir bahadır nıq buwıp belin,
Gúreslerde jeńimpaz keldi.
Qıyınlıqtan qutqardı elin,
Xalıqqa baxıt, xalıqqa jaz keldi.
El azat, ráhátli ómir,
Kókte kún júzge nur shashtı.
Erkin ósken elimde házir,
Ármanlarıń júzege astı.
El jańa, jer jańa, abadan,
Xalıq turmısı gúllenip ketti.
Kanallar qazılıp tazadan,
Sen ósken jer túrlenip ketti.
Húr Watanım baxıt baǵında,
Taǵı óser, gúllener, bayır.
Keleshektiń nurlı tańında,
Biziń menen jasaysań shayır.
Sahrada sayraǵan búlbildey,
Bolmasa da qonarǵa gúliń.
Xalıq muńına ún qostıń birdey,
Qádirińdi biledi eliń.